រាជធានីភ្នំពេញ ៖ លោក ជា ចំរើន ដែលគេស្គាល់ថា ធ្លាប់ជាសាកលវិទ្យាធិការ នៃសាកលវិទ្យាល័យចំរើនពហុបច្ចេកវិទ្យា និងក្នុងនាមលោកជាក្រុមប្រឹក្សាភិបាលអង្គការអភិវឌ្ឍន៍យុវជនខ្មែរ (KYDO) បានសម្រេចតែងតាំងលោក ស្រី ចំរើន ជាប្រធានអង្គការ ដើម្បីចូលរួមអភិវឌ្ឍន៍ធនធានមនុស្ស និងរកការងារជូនយុវជនយុវនារី បន្តវេនជាតិ ។
លោក ជា ចំរើន បានប្រកាសនៅលើហ្វេសប៊ុកផ្ទាល់របស់លោកនាម៉ោង៩ព្រឹកថ្ងៃទី២៥ វិច្ឆិកា ២០២០នេះថា «ក្នុងនាមខ្ញុំផ្ទាល់ ជា ចំរើន និងក្រុមប្រឹក្សាភិបាលអង្គការអភិវឌ្ឍន៍យុវជនខ្មែរ (KYDO) សម្រេចតែងតាំង លោក ស្រី ចំរើន ជាប្រធានអង្គការ ដើម្បីចូលរួមអភិវឌ្ឍន៍ធនធានមនុស្ស និងរកការងារជូនយុវជនយុវនារីបន្តវេនជាតិ ។ សូមបងប្អូនកូនក្មួយ មេត្តាជួយគាំទ្រគាត់ ក្នុងការដឹកនាំគ្រប់គ្រងអង្គការ ឲ្យមានប្រសិទ្ធភាពខ្ពស់ និងជោគជ័យចាប់ពីពេលនេះតទៅ» ។
ការសម្រេចតែតាំងនេះ ធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីលោក ស្រី ចំរើន បានបង្ហោះសារនៅលើបណ្តាញសង្គម បង្កឲ្យមានការភ្ញាក់ផ្អើលកាលពីថ្ងៃម្សិលមិញអោយដឹងថា បច្ចុប្បន្ន លោកគ្មានជម្រើសអ្វី ក្រៅពីចាប់យករបរលក់ទំនិញផ្សេងៗ ដូចជាជ្រក់ជើងមាន់ជាដើម ដឹកតាមអនឡាញ ហើយផ្ទះក៏ស្នាក់នៅបណ្ដោះអាសន្ន ម៉ូតូក៏ជិះបណ្ដោះអាសន្ន ស្ថាប័ន និងក្រុមហ៊ុន ក៏គេមិនហ៊ានទទួលឲ្យធ្វើការ ថែមទៀត ។
ជាការកត់សម្គាល់ កន្លងមក លោក ស្រី ចំរើន ធ្លាប់ប្រកាសថា ខ្លួនជាតំណាងឲ្យនិស្សិត និងធ្លាប់បានចូលប្រឡូកការងារជាច្រើន សកម្មភាពក្នុងរឿងនយោបាយ ហើយរឿងដែលលោកលេចធ្លោជាងគេ គឺការប្តឹងលោក កឹម សុខា អតីតប្រធានស្តីទីគណបក្សសង្គ្រោះជាតិ ជាច្រើនករណី ដូចជាករណីពុករលួយ និងករណីចោទអង្គរក្សលោកកឹម សុខា ប្រើអំពើហិង្សា និងដាក់ញតិ្តទៅរដ្ឋសភាជាតិ ដើម្បីឲ្យលោក កឹម សុខា ចេញមុខបកស្រាយចំពោះខ្សែអាត់សំឡេង ដែលគេយល់ថា ជាសំឡេងសាសងស្នេហារវាងលោក កឹម សុខា និងនាង ខុម ចាន់ដារាទី ឬស្រីមុំ ជាដើម ៕
អត្ថបទពាក់ព័ន្ធ ៖ លោក ស្រី ចំរើន ធ្លាប់ចេញមុខប្តឹងលោក កឹម សុខា ក្លាយជាអ្នកដឹកអីវ៉ាន់លក់តាមអនឡាញ
ចែករំលែកព័តមាននេះ