រាជធានីភ្នំពេញ ៖ រថយន្តស្ទូចមួយគ្រឿងបើកឡើងស្ពានព្រះមុនីវង្សចាស់ ស្រាប់តែរលត់ម៉ាស៊ីនចាប់ហ្វ្រាំងមិនស៊ី បណ្ដាលឲ្យរអិលថយក្រោយជ្រុលទៅបុកបង្កាន់ដៃដែកជុំវិញបរិវេណស្ពាន រងការខូចខាតអស់៥ផ្ទាំង កាលពីវេលាម៉ោង៩និង១០នាទីយប់ថ្ងៃទី២៤ ខែវិច្ឆិកា ឆ្នាំ២០២០ នៅចំណុចគល់ស្ពានព្រះមុនីវង្សចាស់…
រាជធានីភ្នំពេញ ៖ រថយន្តស្ទូចមួយគ្រឿងបើកឡើងស្ពានព្រះមុនីវង្សចាស់ ស្រាប់តែរលត់ម៉ាស៊ីនចាប់ហ្វ្រាំងមិនស៊ី បណ្ដាលឲ្យរអិលថយក្រោយជ្រុលទៅបុកបង្កាន់ដៃដែកជុំវិញបរិវេណស្ពាន រងការខូចខាតអស់៥ផ្ទាំង កាលពីវេលាម៉ោង៩និង១០នាទីយប់ថ្ងៃទី២៤ ខែវិច្ឆិកា ឆ្នាំ២០២០ នៅចំណុចគល់ស្ពានព្រះមុនីវង្សចាស់ ផ្លូវជាតិលេខ១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។
តាមសម្តីបុរសជាអ្នកបើករថយន្តបានអោយដឹងថា មុនពេលកើតហេតុ គាត់បានបើករថយន្តស្ទូចម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D3064 បានចេញពីបុរីមួយកន្លែងនៅខណ្ឌច្បារអំពៅ ក្នុងគោលបំណងចូលទៅក្រុងភ្នំពេញ ដោយបានធ្វើដំណើរតាមបណ្ដោយផ្លូវជាតិលេខ១ ក្នុងទិសដៅពីកើតទៅលិច ។
តាមប្រភពដដែលបានបន្តថា លុះមកដល់ចំនុចកើតហេតុខាងលើបានបើកឡើងស្ពានព្រះមុនីវង្សចាស់ ជិះដល់ពាក់កណ្ដាលស្ពាន ស្រាប់តែរថយន្តមានបញ្ហា បណ្ដាលឲ្យរលត់ម៉ាស៊ីន ហើយជាន់ហ្វ្រាំងក៍មិនជាប់ទៀត ទើបបណ្ដាលឲ្យរថយន្តរអិលថយក្រោយយ៉ាងលឿន ណាមួយដោយសារខ្លាចបង្កគ្រោះថ្នាក់ដល់អ្នកដំណើរដែលមកពីក្រោយផ្សេងៗទៀត ទើបគាត់បានបួងចង្កូតឡើងឃឿនគល់ស្ពាន ក៍ជ្រុលទៅបុកបង្កាន់ដៃដែកជុំវិញបរិវេណស្ពានបាក់ខ្ទេចអស់ចំនួន៥ផ្ទាំង ហើយរថយន្តអស់ល្បឿនកល់ជាប់ បត់ក្បាលត្រឡប់ក្រោយវិញ ទៅណាលែងរួច ។
ក្នុងហេតុការណ៍នេះដែរ គឺមិនបណ្ដាលឲ្យមានគ្រោះថ្នាក់ដល់មនុស្សណាម្នាក់នោះទេ ចំណែកអ្នកបើកបរក៍មិនបានរត់គេចទៅណាដែរ។
ក្រោយពេលកើតហេតុ គេឃើញមានកម្លាំងសមត្ថកិច្ចមូលដ្ឋានក៍ដូចជាជំនាញចរាចរណ៍ខណ្ឌច្បារអំពៅ បានចុះទៅកន្លែងកើតហេតុ រួចហើយក៍បានឃាត់ខ្លួនអ្នកបើកបរ រួមទាំងរថយន្ត ប្រគល់ខាងជំនាញចរាចរណ៍ក្រុងភ្នំពេញ ចុះទៅស្ទូចយកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការរាជធានីភ្នំពេញដើម្បីរង់ចាំធ្វើការដោះស្រាយ៕ (កែសម្រួលដោយ ៖ ធីតា)
ចែករំលែកព័តមាននេះ