ខេត្តព្រះវិហារ ៖ គណៈប្រតិភូខណ្ឌទួលគោក និងខណ្ឌ៧មករា កាលពីរសៀលថ្ងៃទី១១ កុម្ភៈ បានចុះទៅសាកសួរសុខទុក្ខ និងនាំអំណោយទៅឧបត្ថម្ភដល់កងទ័ពនៅវរសេនាតូចអន្តរាគមន៍លេខ៣៩៣ ចំណុះកងពលតូចអន្តរាគមន៍៩ និងគ្រួសារយុទ្ធជនពលីនៅសមរភូមិមុខដែលឈរជើងនៅចំណុចអូរចាក់ច្រែង ស្រុកជាំក្សាន្ត ខេត្តព្រះវិហារ ។
អំណោយដែលនាំទៅឧបត្ថម្ភដល់កងទ័ពនៅក្នុងឱកាសនោះមានចំនួន២៤មុខ គិតជាថវិកាអស់ចំនួន១៤.២០៨.០០០រៀល ។ បន្ទាប់ពីផ្តល់អំណោយឧបត្ថម្ភដល់កងទ័ពវរសេនាតូចអន្តរាគមន៍លេខ៣៩៣ ដែលជាវរៈចងសម្ព័ន្ធមេត្រីភាពជាមួយខណ្ឌទាំងពីររួចមក គណៈប្រតិភូក៏បានចុះសាកសួរសុខទុក្ខ និងឧបត្ថម្ភដល់គ្រួសារយុទ្ធជនពលីឈ្មោះនឹម កុសល ដែលបានពលីនៅសមរភូមិមុខ បន្សល់ទុកប្រពន្ធ និងកូនចំនួន២ឱ្យនៅកំព្រា ហើយបាននាក់ឧបត្ថម្ភថវិកាចំនួន៤.៦៨០.០០០រៀល។ សំភារនិងថវិកាសរុបទាំងអស់ចំនួន១៨.៨៨៨.០០០លានរៀល ។
លោកសេង រតនៈ ជំនួយការសម្តេចអគ្គមហាសេនាបតីតេជោហ៊ុន សែន និងជាអភិបាលខណ្ឌទួលគោក ក្នុងនាមមន្ត្រីរាជការក្នុងខណ្ឌទួលគោក ក៏បានផ្តាំផ្ញើនូវការសាកសួរសុខទុក្ខដល់នាយទាហាន ពលទាហាន ដែលឈរជើងនៅសមរភូមិមុខ ។ ជានិច្ចកាល ទោះបីមន្ត្រីរាជការស្ថិតនៅសមរភូមិក្រោយក៏ដោយ តែងតែគិតគូរដល់សុខទុក្ខយុទ្ធជននៅសមរភូមិមុខនិងចុះមកសួរសុខទុក្ខព្រមទាំងនាំអំណោយជួយឧបត្ថម្ភដល់កងទ័ពជាបន្តបន្ទាប់ ។
លោកសេង រតនៈ បានបន្តថា អំណោយដែលបាននាំមកឧបត្ថម្ភកងទ័ពនៅពេលនេះ គឺបានមកពីសប្បុរសជន មន្ត្រីរាជការ កងកម្លាំង ប្រជាពលរដ្ឋ ក្នុងខណ្ឌទួលគោក រួមគ្នាជួយលើកទឹកចិត្តដល់កងទ័ព នៅសមរភូមិមុខ ។ នេះជាលើកទី២ហើយ ដែលខណ្ឌទួលគោក និងខណ្ឌ៧មករាបានចុះសាកសួរសុខទុក្ខ និងនាំអំណោយឧបត្ថម្ភដល់កងទ័ពវរសេនាតូចអន្តរាគមន៍លេខ៣៩៣ បន្ទាប់ពីមានការប្រយុទ្ធគ្នារវាងកងទ័ពកម្ពុជា និងកងទ័ពសៀមឈ្លានពាននាខែកុម្ភៈ ឆ្នាំ២០១១ ។
ជាការឆ្លើយតបលោកវរសេនីយ៍ឯកកែប សុផល ប្រធានវរសេនាតូចអន្តរាគមន៍លេខ៣៩៣ ក៏បានថ្លែងអំណរគុណដល់គណៈប្រតិភូខណ្ឌទាំងពីរព្រមទាំងបេជ្ញាចិត្តយ៉ាងមោះមុត ឈរជើងការពារបូរណភាពទឹកដីមិនឱ្យសត្រូវឈ្លានពានបានឡើយ ៕
ចែករំលែកព័តមាននេះ