ខេត្តសៀមរាប ៖ ទីបំផុត ក្នុងរយៈពេល៤៩ថ្ងៃ «សាយ» បានរត់ដល់ក្រុងសៀមរាប នៅថ្ងៃទី២៣ វិច្ឆិកា ដោយរកបានថវិកាប្រមាណ៤០ម៉ឺន៥ពាន់៥៧៩ដុល្លារ ជូនមន្ទីរពេទ្យកុមារអង្គរដោយមានការចាំទទួលស្វាគមន៍យ៉ាងកក់ក្តៅពីមហាជន…
ខេត្តសៀមរាប ៖ ទីបំផុត ក្នុងរយៈពេល៤៩ថ្ងៃ «សាយ» បានរត់ដល់ក្រុងសៀមរាប នៅថ្ងៃទី២៣ វិច្ឆិកា ដោយរកបានថវិកាប្រមាណ៤០ម៉ឺន៥ពាន់៥៧៩ដុល្លារ ជូនមន្ទីរពេទ្យកុមារអង្គរដោយមានការចាំទទួលស្វាគមន៍យ៉ាងកក់ក្តៅពីមហាជន ។ យុទ្ធនាការរត់ដើម្បីសប្បុរសធម៌ជាមួយសាយ បើតាមគម្រោង សាយ នឹងប្រើពេល៩៩ថ្ងៃ ដោយរត់ជុំវិញប្រទេសកម្ពុជា ដើម្បីរៃអង្គាសថវិកា ជួយដល់មន្ទីរពេទ្យកុមារអង្គរ នៅខេត្តសៀមរាបនេះ ។
ថ្លែងក្នុងសន្និសីទសារព័ត៌មាននៅព្រឹកថ្ងៃដដែលនេះលោក អ៊ួន បឋម ហៅសាយ និយាយថា ខ្ញុំប្រឹងរត់លំបាកវេទនានេះ គឺយើងចង់បង្ហាញថា ខ្ញុំពិបាកប៉ុណ្ណេះ ប៉ុន្ដែសម្រាប់ខ្ញុំមើលឃើញថាមន្ទីរពេទ្យពិបាកជាងខ្ញុំ ខ្ញុំរត់មួយថ្ងៃប្រហែលចាយពេលនៅ
លើផ្លូវ ៦ទៅ៨ម៉ោង ប៉ុន្ដែពេទ្យសឹងតែ២៤ម៉ោង…ខ្ញុំព្យាយាមរត់ដើម្បីរៃអង្គាសថវិកាជួយមន្ទីរពេទ្យ តែមន្ទីរពេទ្យគាត់ព្យាយាមដើម្បីជួយជីវិតក្មេងៗ» ។
នេះជាលើកទី១ហើយដែលបុរសខ្មែរវ័យ៣០ឆ្នាំរូបនេះ បានបង្កើតព្រឹត្តិការណ៍សប្បុសធម៌មួយក្នុងនាមជាប្រជាពលរដ្ឋខ្មែរម្នាក់ សម្រាប់ជួយសង្គមបែបនេះ ។ សាយ និយាយថា៖«អ្វីដែលខ្ញុំចង់ឃើញដែរនោះ សម្រាប់ខ្ញុំផ្ទាល់ក៏ដូចជាមហាជន យើងតែងឃើញកម្មវិធីជាច្រើន សូម្បីតែក្នុងស្រុកខ្មែរ គឺសុទ្ធតែបរទេសជាអ្នកបង្កើត ហើយយើងជាជនជាតិខ្មែរទៅចូលរួម ដើម្បីជួយទៅដល់សង្គមខ្មែរខ្លួនឯង ដូច្នេះខ្ញុំបង្កើតកម្មវិធីនេះឡើងចង់បង្ហាញថា ជនជាតិខ្មែរក៏អាចបង្កើតនូវកម្មវិធីសង្គមធំៗឬដ៏ល្អមួយ ហើយឱ្យមានការចូលរួមពីប្រជាជនខ្មែរយើងដើម្បីជួយសង្គមខ្លួនឯង…»។
ព្រឹត្តិការណ៍សប្បុរសធម៌របស់សាយ បានចាប់ផ្តើមពីថ្ងៃទី៦ ខែតុលាមក ។ មុនពេលមកដល់ខេត្តសៀមរាបនេះ សាយ បានរត់ពីភ្នំពេញ មកកំពង់ស្ពឺ តាកែវ កែប កំពត កំពង់សោម កោះកុងពោធិ៍សាត់ បាត់ដំបង បៃលិន និងក្រុងសិរីសោភ័ណ ដោយប្រើរយៈពេល៤៩ថ្ងៃហើយ ។ លោក អូ៊ន បឋម ដែលបងប្អូនគ្រួសារខ្មែរយើងស្គាល់ឈ្មោះថា «សាយ» គឺជាតារាចម្រៀងដ៏មានឈ្មោះបោះសំឡេងនៅកម្ពុជា សហការជាមួយសហកថ្ងៃទី២៣ ខែវិច្ឆិកា ឆ្នាំ២០២០ ។
លោកពៅ ពិសិដ្ឋ អភិបាលរងខេត្ត បានទទួលស្វាគមន៍ដោយមានការចូលរួមពីថ្នាក់ដឹកនាំមន្ទីរ អាជ្ញាធរក្រុង ស្រុក និងសភាសហព័ន្ធយុវជនកម្ពុជាខេត្ត ក្រុង ស្រុក ដើម្បីចូលរួមលើកទឹកចិត្តចំពោះលោក សាយ និងសហការី ដើម្បីសុខភាពក៏ដូចជាការចូលរួមជាមួយកម្មវិធី «រត់ដើម្បីសប្បុរសធម៌ជាមួយសាយ» ដើម្បីប្រមូលថវិកា ក្នុងការទ្រទ្រង់ នូវសកម្មភាពនៃការព្យាបាលកុមារកម្ពុជា ដោយឥតគិតថ្ងៃ របស់មន្ទីរពេទ្យកុមារអង្គរ ។ ក្នុងសកម្មភាពនៃការ«រត់ដើម្បីសប្បុរស ធម៌ជាមួយសាយ»នេះ ពេលមកដល់ទឹកដីខេត្តសៀមរាប នៅល្ងាចថ្ងៃទី២១ វិច្ឆិកាដល់ស្រុកក្រឡាញ់ ហើយនៅល្ងាចថ្ងៃទី២២ វិច្ឆិកា បានមកដល់ស្រុកពួក និងនៅព្រឹកថ្ងៃទី២៣ បានបន្តមកដល់ ក្រុងសៀមរាប ដោយមានបងប្អូនប្រជាពលរដ្ឋ សិស្សានុសិស្ស បានទទួលស្វាគមន៍នៅតាមដង
ផ្លូវ ។
រហូតមកដល់ព្រះរាជដំណាក់សៀមរាប បានចូលធ្វើការបូជាផ្កាភ្ញី ទៀន ធូប ថ្វាយព្រះអង្គចេកព្រះអង្គចម ដើម្បីបួងសួងសុំនូវសេចក្តីសុខ ជូនដល់ប្រជា ពលរដ្ឋកម្ពុជា សំខាន់កុមារកម្ពុជា ដែលជាធនធានមនុស្សក្នុងការបន្តវេន ក្នុងកិច្ចអភិវឌ្ឍប្រទេសជាតិ ឲ្យបានឆ្លងរួចផុតពីជំងឺទាំងពួង សំខាន់ជំងឺកូវីដ១៩ ។ បើតាមលោក ទេព ណាវី នាយកប្រតិបត្តិការនៃមន្ទីរពេទ្យកុមារអង្គរ បានឲ្យដឹងថា ចាប់តាំងពីមានវិបត្តិកូវីដ១៩ ការគៀងគរថវិកាពីខាងក្រៅប្រទេសមានការធ្លាក់ចុះ ដែលជាហេតុនាំឲ្យមន្ទីរពេទ្យមានបញ្ហាប្រឈមនឹងកង្វះថវិកាប្រតិបត្តិការ ។
ដូច្នេះលោកសុំអំពាវឲ្យពលរដ្ឋកម្ពុជា ទាំងអស់រួមគ្នាដើម្បីជួយកុមារកម្ពុជា តាមរយៈការជួយមន្ទីរពេទ្យ ។ លោកបន្តទៀតថា ចាប់តាំងពីបើកដំណើរការមក មន្ទីរពេទ្យបានធ្វើការពិនិត្យ និងព្យាបាលជំងឺកុមារ បានជាង២លានករណី ។ ក្រៅពីពិនិត្យនឹងព្យាបាលជំងឺ មន្ទីរពេទ្យកុមារអង្គរក៏ជាកន្លែងបណ្តុះបណ្តាលជំងឺកុមារដល់គ្រូពេទ្យមកពីគ្រប់ទិសទីផងដែរ ។ មន្ទីរពេទ្យត្រូវការថវិកាប្រចាំឆ្នាំប្រមាណជា៦,៥លានដុល្លារអាមេរិក ក្នុងនោះ៨៥ភាគរយ ជាថវិកាសប្បុរសជនក្រៅប្រទេស ។
លោក អ៊ួន បឋម ហៅសាយ ដែលជាអ្នកផ្តួចផ្តើមយុទ្ធនាការនេះ បាននិយាយថា យុទ្ធនាការនេះលោកគ្រោងរត់ក្នុងរយៈពេល៩៩ថ្ងៃចេញពីរាជធានីភ្នំពេញ ទៅ២១ខេត្តក្រុងក្នុងប្រទេសកម្ពុជា ដោយចាប់ផ្ដើមពីថ្ងៃទី៦ ខែតុលា ដែលជាថ្ងៃកំណើតផ្ទាល់របស់លោក ដោយក្នុងមួយថ្ងៃតម្រូវឲ្យរត់ចម្ងាយប្រមាណ៤០គីឡូម៉ែត្រ ។ លោក សាយ បន្តថា រាល់មូលនិធិទាំងអស់ដែលទទួលបាន ពីសប្បុរសជនដែលគាំទ្រសកម្មភាពនេះ នឹងត្រូវឧបត្ថម្ភដោយផ្ទាល់ជូនទៅមន្ទីរពេទ្យកុមារអង្គរ ។
លោក ពៅ ពិសិដ្ឋ អភិបាលរងខេត្ត ជំនួសមុខឱ្យឯកឧត្តមអភិបាលខេត្តក៏បានធ្វើការថ្លែងអំណរគុណចំពោះការលះបង់របស់លោក អ៊ួន បឋម ដែលបានបង្កើតកម្មវិធីនេះឡើង ដើម្បីជាការក្រើនរំលឹកសតិស្មារតី របស់ជនរួម ជាតិខ្មែរយើង ឲ្យមានស្មារតីចេះជួយគ្នា រួមសាមគ្គីគ្នា ក្នុងការទ្រទ្រង់ដល់ធនធានមនុស្ស សំខាន់ចំពោះសុខភាពកុមារ ដែលជាទំពាំងស្មងប្ញស្សីនៃអនាគតប្រទេសជាតិ ។ លោកបន្ដថា សកម្មភាពរបស់លោកនឹងអាចក្លាយជាគំរូសម្រាប់យុវជនកម្ពុជាដទៃទៀត ក្នុងការរួមចំណែកតបស្នងចំពោះប្រទេសជាតិ ទៅតាមលទ្ធភាពរៀងៗខ្លួន ។
ព្រោះប្រជាពលរដ្ឋម្នាក់ៗនៅក្នុងសង្គមជាតិ គួរចូលរួមចែករំលែកដោះស្រាយបញ្ហាមិនថាតូចឬធំ រក្សាឲ្យបាននូវការរួបរួមគ្នា ដើម្បីភាពរីកចម្រើនទាំងអស់គ្នា ដែលកុមារនៅកម្ពុជា អាចទទួលបានឱកាសដូចៗគ្នា ក្នុងការលូតលាស់ប្រកបដោយសុខភាពបរិបូណ៌ និងក្លាយជាធនធានមនុស្សដ៏ល្អសម្រាប់ការអភិវឌ្ឍប្រទេសជាតិ ។ លោកបានបញ្ជាក់ថា ការផ្ដល់មូលនិធិដល់មន្ទីរពេទ្យកុមារអង្គរ ទោះតិចក្ដីឬច្រើនក្ដី គឺពិតជាទង្វើសប្បុរសធម៌ បង្កប់ទៅដោយអត្ថន័យនិងក្ដីមេត្តាដ៏សម្បើមសម្រាប់ជីវិតកុមារនៅកម្ពុជាយើង ៕
ចែករំលែកព័តមាននេះ