បារាំង៖ អតីតប្រធានាធិបតីបារាំង លោកនីកូឡាស សាកូហ្សី កំពុងប្រឈមមុខនឹងរឿងរន្ធត់មួយនៅសាលសវនាការ ហើយករណីរបស់លោកចាត់ទុកជាប្រវត្តិសាស្ត្រសម្រាប់ប្រទេសបារាំងផងដែរ បន្ទាប់ពីលោក សាកូហ្សី ត្រូវបានចោទប្រកាន់ពីបទប្រព្រឹត្តអំពើពុករលួយ និងជេរប្រមាថ ចោទប្រកាន់ពីបទព្យាយាមសូកប៉ាន់ចៅក្រមជាថ្នូរនឹងព័ត៌មានអំពីការស៊ើបអង្កេតលើហិរញ្ញវត្ថុគណបក្សរបស់គាត់។ នេះបើយោងតាមការចុះផ្សាយរបស់សារព័ត៌មាន BBC ។
លោក សាកូហ្ស៊ី គឺជាអតីតប្រធានាធិបតីដំបូងគេនៅប្រទេសបារាំងសម័យទំនើបដែលបានចូលទៅអង្គុយក្នុងក្រចកសេះពាក់ព័ន្ធសំណុំរឿងពុករលួយនេះ ។ លោក សាកូហ្ស៊ី បានដឹកនាំប្រទេសបារាំងពីឆ្នាំ ២០០៧ ដល់ឆ្នាំ ២០១២ ។
ទោះយ៉ាងណាការបង្ហាញខ្លួនជាលើកដំបូងរបស់លោកនៅតុលាការ គឺមានវត្តមានត្រឹមរយៈពេលខ្លី។ អង្គសវនាការត្រូវបានផ្អាកបន្ទាប់ពីធ្វើបានត្រឹម ៣០ នាទី និងបន្តវិញរហូតដល់ថ្ងៃព្រហស្បតិ៍ ពីព្រោះតួអង្គសំខាន់មួយក្នុងរឿងក្តីនេះ គឺអតីតចៅក្រមជាន់ខ្ពស់ Gilbert Azibert ត្រូវតម្រូវឲ្យមានការពិនិត្យសុខភាពសិន។
គាត់មានអាយុ ៧៣ ឆ្នាំហើយមិនបានបង្ហាញខ្លួននៅក្នុងក្រចកសេះជាមួយនឹងជនជាប់ចោទរបស់គាត់ គឺលោកសាកូហ្ស៊ី អាយុ ៦៥ ឆ្នាំ និងអតីតមេធាវីរបស់អតីតប្រធានាធិបតី គឺ Thierry Herzog ។ មានសញ្ញាសួរអំពីដំណើរការរបស់តុលាការជុំវិញរឿងក្តីមួយនេះ ដោយសារតែមានការរំខានពីវីរុសកូវីដ ១៩ ផងដែរ ។
យ៉ាងណាមិញ ការជំនុំជម្រះក្តីគ្រោងនឹងដំណើរការរហូតដល់ថ្ងៃទី ១០ ខែធ្នូ។ ប្រសិនបើរកឃើញថា មានកំហុសអតីតប្រធានាធិបតីបារាំង លោក សាកូហ្សី អាចប្រឈមនឹងការជាប់ពន្ធនាគាររយៈពេល ១០ ឆ្នាំ និងពិន័យជាប្រាក់ចំនួន ១លានអឺរ៉ូ ឬប្រមាណជិត ១.២ លានដុល្លារអាមេរិក ។
អតីតប្រធានាធិបតីស្តាំនិយមមួយរូបទៀត គឺលោក ហ្សាក់ជីឈីរ៉ាក់ (Jacques Chirac) ត្រូវបានកាត់ទោសឱ្យជាប់ពន្ធនាគាររយៈពេល ២ ឆ្នាំក្នុងឆ្នាំ ២០១១ ពីបទបង្វែងមូលនិធិសាធារណៈ និងរំលោភសេចក្តីទុកចិត្តពីសាធារណជន។ បទល្មើសបានចុះកាលបរិច្ឆេទនៃការប្រព្រឹត្តរបស់គាត់កាលគ្រាមានតួនាទីជាអភិបាលក្រុងប៉ារីស។ ប៉ុន្តែគាត់មិនបានបង្ហាញខ្លួននៅក្នុងតុលាការទេដោយសារសុខភាពមិនល្អ។ តែកន្លងមកគាត់បានបដិសេធថា បានប្រព្រឹត្តខុសឆ្គង ៕ ដកស្រង់ចេញពីវេបសាយ ៖ bbc
ចែករំលែកព័តមាននេះ