រាជធានីភ្នំពេញ ៖ ជាតិជាម្តាយគឺពុំមានអ្វីសប្បាយចិត្តនឹងបានឃើញកូនៗដើរតាមគន្លងធម៌នោះទេ ។ តួយ៉ាងអ្នកនាងម៉េង កែវពេជ្ជតា អាចចាត់ទុកជាមាតាក៏ប្រពៃដែលបានចិញ្ចឹមបីបាច់ថែទាំ ទំនុកបំរុងកូនៗប្រុសស្រីបានយ៉ាងល្អឥតខ្ចោះ ក្នុងតួនាទីជាម្តាយផង ជាឪពុកផង…
រាជធានីភ្នំពេញ ៖ ជាតិជាម្តាយគឺពុំមានអ្វីសប្បាយចិត្តនឹងបានឃើញកូនៗដើរតាមគន្លងធម៌នោះទេ ។ តួយ៉ាងអ្នកនាងម៉េង កែវពេជ្ជតា អាចចាត់ទុកជាមាតាក៏ប្រពៃដែលបានចិញ្ចឹមបីបាច់ថែទាំ ទំនុកបំរុងកូនៗប្រុសស្រីបានយ៉ាងល្អឥតខ្ចោះ ក្នុងតួនាទីជាម្តាយផង ជាឪពុកផង រហូតអ្នកនាងបានជម្រុញបំផុសកូនៗដែលមាននិស្ស័យខាងសិល្បៈពីកំណើតផងនោះ ឲ្យបានចូលរួមចំណែកជាមួយអ្នកនាងក្នុងការអភិរក្ស និងអភិវឌ្ឍវិស័យវប្បធម៌ សិល្បៈចម្រៀង និងការលេងឧបករណ៍ភ្លេងបុរាណ និងសម័យ ។
តួយ៉ាងនៅថ្ងៃច័ន្ទ ទី២៣ ខែវិច្ឆិកា ឆ្នាំ២០២០ នេះទៀត សោតអ្នកនាង ម៉េង កែវពេជ្ជតា បានបង្ហោះរូបភាពពីរសន្លឹកដែលមួយសន្លឹក គឺជារូបអ្នកនាងថតជាមួយកូនស្រីពៅ ពេជ្ជតា សង្វាពេជ្រ គ្រងសម្លៀកបំពាក់ឈុតប្រពៃណីខ្មែរ និងមួយសន្លឹកទៀតជារូបថតកូនស្រីតែម្នាក់ឯងឈរយ៉ាងសមសួន ដែលានាងតូចបានគ្រងឈុតសំពត់ពណ៌លឿងកាត់ពណ៌មាស ជាមួយនឹងអាវប៉ាក់ដៃវែង បួងសក់ឡើងលើ ជាមួយស្នាមញញឹមយ៉ាងសុភាពសុទន់ ដែលធ្វើឲ្យអ្នកគាំទ្រពោលវាចាថា «ទាំងម្តាយ ទាំងកូនស្រស់ស្អាត និងសមសួនដូចគ្នា» ។
អមជាមួយនឹងការបង្ហោះរូបថតរបស់ខ្លួនដែលតែងតែនែបនិត្យជាមួយនឹងកូនៗនោះ អ្នកនាង ម៉េង កែវពេជ្ជតា តារាចម្រៀងជើងចាស់ និងមានទឹកដមសម្លេងក្រអួនក្រអៅពីរោះរណ្តំ ជាពិសេសមានសមត្ថភាពខ្ពស់ក្នុងការបកស្រាយចម្រៀងគ្រប់ទម្រង់មិនថាសម័យ បុរាណ ឬយីកេ ក៏បានបង្ហោះសារអមជាមួយនឹងរូបថតរបស់នាងជាមួយនឹងកូនស្រីថា «រីករាយថ្ងៃច័ន្ទ ថ្ងៃបានចូលរៀន ថ្ងៃចូលធ្វើការជាថ្មី ទាំងអស់គ្នា 23.11.2020 ។ សូមរក្សាការប្រុងប្រយ័ត្នជាមួយ កូវីដ-19 គ្រប់ពេលណា៎សំណព្វចិត្តទាំងអស់គ្នា » ។
ទោះបីជាខ្លឹមសារខ្លី ដែលមានន័យខ្លឹមទាក់បានចិត្តអ្នកគាំទ្រឲ្យបញ្ចេញវាចារសរសើរដល់អ្នកនាង ម៉េង កែវពេជ្ជតា និងកូនស្រីថា ពិតជាស្រស់ស្អាតខ្លាំងក្នុងឈុតប្រពៃណីខ្មែរ ជាពិសេសនោះអ្នកគាំទ្រខ្លះបានលើកចំៗតែម្តងអំពីកូនស្រីរបស់អ្នកនាងថា «ស្អាតខ្លាំងម្លេះក្មួយស្រី» ខណៈអ្នកគាំទ្រផ្សេងទៀត ក៏បានបញ្ចេញមតិថា នាងតូចមានមុខមាត់ស្រស់ស្អាតដូចអ្នកម្តាយផងដែរ ។
ប៉ុន្មានថ្ងៃមុននេះអ្នកនាង ម៉េង កែវពេជ្ជតា ក៏បានបញ្ចេញនូវសារក៏មានខ្លឹមសារមួយក្នុងការរួមចំណែកដល់ការងារសិល្បៈនិងវប្បធម៌របស់ប្រទេសជាតិ ដែលសាររបស់អ្នកនាងមានខ្លឹមសារទាំងស្រុងថា «ការបណ្តុះគំនិតស្រលាញ់លើកស្ទួយសិល្បៈវប្បធម៌ប្រពៃណីជាតិខ្លួន ក៏ជាទង្វើដែលបញ្ជាក់ថា បានការពារសិល្បៈវប្បធម៌ប្រពៃណីយរបស់ជាតិខ្លួនរួចទៅហើយ » ។
អ្នកនាង ម៉េង កែវពេជ្ជតា ដែលប្រសូត្រក្នុងត្រកូលអ្នកសិល្បៈបានបន្តថា «ខ្ញុំ និងកូនតូចៗរបស់ខ្ញុំ រួមទាំងត្រកូលម៉េង បានខំវេចស្ពាយសិល្បៈវប្បធម៌ខ្មែរដ៏ថ្លៃថ្លា ទៅចែកចាយជូនភ្ញៀវជាតិ និងអន្តរជាតិគ្រប់ច្រកល្ហកទាំងក្នុងប្រទេស និងក្រៅប្រទេសអោយគេបានឃើញ បានស្គាល់កាន់តែទូលំទូលាយបន្ថែមទៀតនូវអ្វីដែលជាភាពថ្លៃថ្នូររបស់ខ្មែរ ខំឡើងកូនៗ» ។
ប្រាកដណាស់ កូនប្រុសស្រីរបស់អ្នកនាងម៉េង កែវពេជ្ជតា ជាមួយអតីតស្វាមីដែលជាមន្ត្រីមានឋានៈមុខមាត់ខ្ពស់ក្នុងជួររាជរដ្ឋាភិបាល គឺមានមុខមាត់ស្រស់ស្អាត ញញឹមស្រស់និងគួរឲ្យស្រលាញ់ ។ អ្វីដែលកាន់តែពិសេសបំផុតនោះ គឺអ្នកនាង ម៉េង កែវពេជ្ជតា បានបណ្ដុះបណ្ដាល កូនប្រុសស្រីទាំងពីរដួងឲ្យចេះនូវជំនាញខាងសិល្បៈជាច្រើននិងធ្លាប់បានប្រឡូកក្នុងការសម្តែងលើឆាកអន្តរជាតិជាមួយអ្នកនាងផងដែរ ព្រោះថាកូនប្រុសច្បងរបស់អ្នកនាង គឺប្អូនប្រុស ពេជ្ជ រតនៈ មានសមត្ថភាពអាចលេងឧបករណ៍ ទ្រសោ និងព្យាណូ ចំណែកប្អូនស្រីពៅនាងតូច ពេជ្ជតា សង្វាពេជ្រ ក៏មានសមត្ថភាពខ្ពស់ អាចលេង វីយូឡុង និង ទ្រសោ ហើយក៏អាចច្រៀងបានពីរោះផងដែរ៕
ចែករំលែកព័តមាននេះ