រាជធានីភ្នំពេញ ៖ ទើបតែចាប់មានមុខនៅក្នុងវិស័យប្រដាល់បានមួយប្រាវ អ្នកលេងគុនខ្មែរ អេលីត លីម៉ី ដែលត្រូវបានគេស្គាស់ថា គឺជាកូនសិស្សរបស់អតីតកីឡាករ ស៊ន អេលីត ដែលជាបងបង្កើតរបស់កីឡាការិនី ស៊ន សៀវម៉ី ស្រាប់តែមានដំណឹងទទួលមរណភាពទាំងវ័យក្មេង។ ដំណឹងមរណភាពរបស់លោកបានធ្វើឱ្យលោក ស៊ន អេលីត ក្ដុកក្ដួលចិត្តយ៉ាងខ្លាំង ខណៈពេលដែលលោកស្ទើរតែមិនជឿថា ត្រឹមតែហេតុការណ៍មួយសោះ តែបានផ្តាច់ជីវិតកូនសិស្សរបស់លោកទាំងវ័យក្មេងបែបនេះ។
យោងតាមការបង្ហោះរបស់លោក ស៊ន អេលីត ដែលជាគ្រូបង្វឹក បានប្រកាសថា កូនសិស្សរបស់លោកបានទទួលមរណភាពក្នុងវ័យ១៨ឆ្នាំ កាលពីយប់ថ្ងៃទី២២ ខែវិច្ឆិកា ឆ្នាំ២០២០ នៅមន្ទីរពេទ្យកាល់ម៉ែត ដែលហេតុការណ៍នេះ គឺបន្ទាប់ពីកូនសិស្សរបស់លោករអិលជើងធ្លាក់ពីជណ្តើរ បណ្ដាលឱ្យបោកក្បាលតែម្តង។ ហើយរហូតមកទល់ពេលនេះ សពរបស់កីឡាករ អេលីត លីម៉ី ទើបតែបានធ្វើបុណ្យនៅស្រុកកំណើតប៉ុណ្ណោះ ស្ថិតនៅក្នុងភូមិក្របៅទី១ ឃុំព្រែកអំពិល ស្រុកខ្សាច់កណ្តាល ខេត្តកណ្តាល ហើយក៏មានកីឡាករក្នុងក្លិបមិនតិចនោះទេ បានបង្ហាញការសោកស្ដាយយ៉ាងខ្លាំង។
លោក ស៊ន អេលីត ដែលជាគ្រូបង្វឹក និងជាប្រធានក្លិបបានបង្ហាញអារម្មណ៍ស្ទើរតែនិយាយមិនចេញនៅពេលរំលឹកពីមូលហេតុនៃការបាត់បង់ជីវិតរបស់ អេលីត លីម៉ី ដែលទើបមានវ័យ១៨ឆ្នាំ។ លោក ស៊ន អេលីត បានបញ្ជាក់ថា មកទល់នឹងពិធីបុណ្យសពទើបតែបានបញ្ចប់នេះ លោកមិនទាន់អាចកំណត់មូលហេតុជាក់លាក់នៃការបាត់បង់ជីវិតរបស់កីឡាកររូបនេះបាននៅឡើយទេ ដោយលោកបញ្ជាក់មិនអស់ចិត្ត សម្រាប់មូលហេតុដែលលោកដាក់ការសង្ស័យមាន២ គឺបាត់បង់ជីវិតដោយសារត្រូវខ្សែភ្លើងឆក់ ហើយបណ្ដាលឱ្យធ្លាក់ពីលើជណ្តើរច្រើនជាង។
បើតាមដកស្រង់សម្ដីពីគ្រូបង្វឹករូបនេះ បានរៀបរាប់ពីដើមចមដែលនាំឲ្យកើតហេតុខាងលើថា នៅល្ងាចថ្ងៃទី២២ ខែវិច្ឆិកា ឆ្នាំ២០២០ ក្លិបមានគំរោងរៀបចំកម្មវិធីជប់លៀងមួយ ដើម្បីអបអរដល់កីឡាករដែលទទួលបានជ័យលាភី។ ពេលនោះ លោក អេលីត ក៏បានប្រាប់កូនសិស្សពីគំរោងមួយនេះ។
លោកបន្តថា ក្រោយមក លោកក៏បានចេញទៅក្រៅ ហើយកូនសិស្សក៏នាំបាននាំគ្នាបោសសម្អាត និងរៀបចំអំពូលភ្លើងនៅផ្នែកខាងក្រោយនៃក្លិប។ នៅក្នុងការរៀបចំអំពូលភ្លើងនោះដែរ ជនរងគ្រោះខាងលើបានឡើងជណ្តើរដើម្បីលើកអំពូលឲ្យខ្ពស់ជាងមុន ប៉ុន្តែត្រូវបានធ្លាក់ចុះធ្វើឱ្យរងរបួសក្បាលផ្នែកខាងក្រោយយ៉ាងដំណំ។ បន្ទាប់មកត្រូវបានបញ្ជូនទៅមន្ទីរកាល់ម៉ែត តែជាអកុសលគ្រូពេទ្យនៅទីនោះអះអាងថា ឈាមបានចូលកកក្នុងខួរក្បាល លីម៉ី បាត់ទៅហើយ ជាហេតុធ្វើឲ្យគេបាត់បង់ជីវិតនៅទីនោះតែម្តង។
លោកបន្តថា ទំហំនៃការបោកក្បាលទំនងមិនគួរឱ្យកូនសិស្សរបស់លោកឈានដល់មរណភាពនោះទេ ទើបលោកសង្ស័យថា កូនសិស្សត្រូវឆក់ខ្សែភ្លើងច្រើនជាង។
យ៉ាងណាមិញ លោកបន្តថា អ្វីៗគឺបានបញ្ចប់ទៅហើយ ហើយកូនសិស្សរបស់លោកក៏មិនអាចវិលត្រលប់មកវិញដែរ តែសម្រាប់លោកពិតជាសោកស្ដាយ និងថាគឺជាវិប្បដិសារីដ៏ធំបំផុត ដែលកូនសិស្សរបស់លោកពោរពេញដោយការតស៊ូ និងមានឆន្ទៈនៅក្នុងវិស័យកីឡារបស់លោក បែរជាបានជួបប្រទះរឿងបែបនេះ។
ជាមួយគ្នានោះ លោកក៏បានទទូចឱ្យកីឡាករផ្សេៗងទៀត បង្កើនការយកចិត្តទុកក្នុងការថែរក្សាសុខភាពផងដែរ ដែលមរណភាពនេះ លោកចាត់ទុកថា គឺជាបទពិសោធន៍ដ៏អាក្រក់ សម្រាប់កីឡាករទាំងអស់។
ចែករំលែកព័តមាននេះ