រាជធានីភ្នំពេញ ៖ អង្គការដើម្បីភាពញញឹមនៃកុមារបានរៀបចំរាត្រីសប្បុរសធម៌នៅមជ្ឈមណ្ឌលរបស់អង្គការកាលពីថ្ងៃទី៩ និងទី១០ មេសា ដោយលក់សំបុត្រឱ្យ ទស្សនិកជនចូលទស្សនាដើម្បីរកមូលនិធិជួយទ្រទ្រង់ដល់ការចិញ្ចឹមកុមារនៅក្នុងមណ្ឌល។
អង្គការដើម្បីភាពញញឹមនៃកុមារជាអង្គការមិនមែនរដ្ឋាភិបាលមួយដែលបានបង្កើតតាំងពីឆ្នាំ១៩៩៦មក ក្នុងគោលបំណងដើម្បីជួយដល់កុមារ យុវជន និងគ្រួសារក្រីក្រនៅតំបន់ចាក់សំរាមស្ទឹងមានជ័យ ដោយផ្ដោតសំខាន់ទៅលើការអប់រំចំណេះដឹងទូទៅ និងការបណ្ដុះបណ្ដាលវិជ្ជាជីវៈ ។ បច្ចុប្បន្នអង្គការដើម្បីភាពញញឹមនៃកុមារផ្ដល់ជំនាញវិជ្ជាជីវៈរហូតដល់១៩ជំនាញនៅក្នុងសាលាទាំងប្រាំបីនៃមជ្ឈមណ្ឌលបណ្ដុះបណ្ដាលវិជ្ជាជីវៈ និងទ្រទ្រង់អាហារូបករណ៍ដល់យុវនិស្សិត
មួយចំនួនដែលបន្ដថ្នាក់ឧត្ដមសិក្សាតាមបណ្ដាសាកលវិទ្យាល័យរដ្ឋ។
ក្នុងឆ្នាំសិក្សាថ្មីនេះយុវជនថ្មីចំនួន២៧៤នាក់ ត្រូវបានទទួលចូលក្នុងកម្មវិធីបណ្ដុះបណ្ដាលវិជ្ជាជីវៈ។ ជាសរុបអង្គការដើម្បីភាពញញឹមនៃកុមារមានយុវជន១.៤៧៤ នាក់ ស្ថិតក្នុងបន្ទុកប្រចាំថ្ងៃនៃសាលាបណ្ដុះបណ្ដាលវិជ្ជាជីវៈ ។ ដើម្បីដោះស្រាយបញ្ហា ដែលត្រូវប្រឈមមុខនេះរាត្រីសប្បុរសធម៌ នឹងត្រូវរៀបចំដើម្បីស្វែងរកថវិកាពីសំណាក់ មហាជន សហគ្រាស និងភ្នាក់ងារអភិវឌ្ឍន៍នានា ។ ក្រោមស្មារតី“ទាំងអស់គ្នា…យើងអាចធ្វើបាន…”លោកអ្នកអាចចូលរួមក្នុងកម្មវិធីមនុស្សធម៌ដែលមានតែមួយគត់នេះតាមរយៈការទិញសំបុត្រតំលៃ២ដុល្លារ ជួយផ្សព្វផ្សាយព័ត៌មានបន្ដលក់សំបុត្រក្នុងក្រុមហ៊ុន គ្រួសារ ឬមិត្ដភក្ដិរបស់លោកអ្នក និងផ្ដល់អំណោយសប្បុរសធម៌មកដល់អង្គការយើងខ្ញុំ ។
រាត្រីសប្បុរសធម៌ពោរពេញទៅដោយកម្មវិធីសប្បាយៗជក់ចិត្ដដិតអារម្មណ៍ មានដូចជាតារាចំរៀងផលិតកម្ម ROCK ការប្រគំតន្ដ្រីខ្មែរ-បរទេស របាំប្រពៃណីខ្មែរ ការ បង្ហាញម៉ូដ សៀករហស្សកម្ម ការចាប់រង្វាន់អនុស្សាវរីយ៍ ល្បែងកំសាន្ដសំរាប់កុមារ ស្ដង់អាហារ ។ សូមបញ្ជាក់ថា រាត្រីសប្បុរសធម៌នេះប្រព្រឹត្ដឡើងដោយមានសហប្រតិបត្ដិការជាមួយក្រុមហ៊ុន NOKIA និងដោយមានការឧបត្ថម្ភពីធនាគារ ANZ Royal ក្រុមហ៊ុន ប្រេងឥន្ធនៈ TOTAL សេវាផ្ញើប្រាក់ Wing សាលារៀន Norhtline ក្រុមហ៊ុនទេសចរណ៍ Asian Trial គ្រឹះស្ថានមីក្រូហិរញវត្ថុ SAMIC គ្រឹះស្ថានមីក្រូហិរញវត្ថុ AMRIT បណ្ដាក្រុមហ៊ុននានា និងសប្បុរជនផ្សេងៗ ទៀត ៕
ចែករំលែកព័តមាននេះ