ខេត្តស្វាយរៀង ៖ មន្ទីរសុខាភិបាលខេត្តបានធ្វើសន្និបាតបូកសរុបការងារឆ្នាំ២០១០ និងលើកទិសដៅឆ្នាំ២០១១ កាលពីថ្ងៃទី១០-១១ មីនា ដោយមានការអញ្ជើញចូលរួមជាអធិបតីពីសំណាក់លោកសាស្ត្រាចារ្យ អេង ហួត រដ្ឋលេខាធិការក្រសួងសុខាភិបាល និងលោកជៀង អំ អភិបាលខេត្ត ។ អញ្ជើញចូលរួមក្នុងសន្និបាតនោះមានអស់លោក លោកស្រី ប្រធាន-អនុប្រធានមន្ទីរសុខាភិបាល មន្ទីរពេទ្យបង្អែកស្រុកប្រតិបត្តិមណ្ឌលសុខភាពឃុំ អភិបាល-អភិបាលរងស្រុក-ក្រុង ក្រុមប្រឹក្សាឃុំ-សង្កាត់ អ្នកស្ម័គ្រចិត្តភូមិ និងតំណាងអង្គការសង្គមស៊ីវិល សរុប១៤០នាក់ ។
លោកវេជ្ជបណ្ឌិត វន វិណារ៉ា អនុប្រធានមន្ទីរសុខាភិបាលខេត្ត បានអានរបាយការណ៍សង្ខេបពីសមិទ្ធផលសុខាភិបាលឆ្នាំ២០១០ ថា ខេត្តស្វាយរៀងមានមន្ទីរពេទ្យបង្អែកស្រុកប្រតិបត្តិចំនួន៣ គឺស្វាយរៀង រមាសហែក និងជីភូ មន្ទីរពេទ្យខេត្តមួយ និងមណ្ឌលសុខភាព៣៨ ។ ដោយមានការគាំទ្រ និងសហការគ្នាល្អពីក្រសួងសុខាភិបាល មន្ទីរ ស្រុកប្រតិបត្តិមណ្ឌលសុខភាព អង្គការដៃគូអភិវឌ្ឍន៍នៃអង្គការមិនមែនរដ្ឋាភិបាល អាជ្ញាធរមូលដ្ឋាន មន្ទីរនានា និងអ្នកស្ម័គ្រចិត្តភូមិ មានឆន្ទៈក្នុងការធ្វើការជាក្រុម និងសាមគ្គីផ្ទៃក្នុងបានល្អ មានការផ្តល់សេវា២៤ម៉ោងលើ២៤ម៉ោង ។ ជាមួយគ្នានេះ យើងមានថវិកា លើកទឹកចិត្តដល់ឆ្មបមណ្ឌលសុខភាព ដល់ឆ្មបបុរាណ និងអ្នកស្ម័គ្រចិត្តភូមិ ជាពិសេសមានការលើកលែងបង់ថ្លៃសេវាចំពោះជនក្រីក្រ ។ របាយការណ៍ក៏បានកត់សម្គាល់ដែរថា ចំពោះសហគមន៍ដោយសារចំណេះដឹងនៅមានកម្រិត និងភាពក្រីក្រ គឺមានទម្លាប់សម្រាលកូននៅផ្ទះ និងមានជំនឿអរូបី។ ចំពោះសេវាសុខាភិបាល ក៏នៅខ្វះធនធានមនុស្ស ចំណេះដឹងនៅមានកម្រិត បុគ្គលិកឆ្មបមួយចំនួននៅដើរសម្រាលកូនតាមផ្ទះ ខ្វះសំភារ ឱសថ និងបរិក្ខារ ខ្វះបន្ទប់រង់ចាំ និងក្រោយសម្រាលខ្វះមធ្យោបាយបញ្ជូនអ្នកជំងឺ ។
អ្វីដែលគួរឱ្យចាប់អារម្មណ៍គឺឆ្នាំ២០១០ មានអ្នកជំងឺអេដស៍ថ្មីដែលបានចូលមកទទួលសេវា មានចំនួន១៦៨នាក់ ។ អ្នកជំងឺសកម្មដែលកំពុងទទួលសេវាមានចំនួនសរុប១.១២៧នាក់ ទូទាំងខេត្ត ។ រីឯអ្នកជំងឺអេដស៍នៅតាមផ្ទះមានក្រុមថែទាំអ្នកជំងឺចំនួន១៦ក្រុមរបស់អង្គការចំនួន២ សរុប១.៥២៧នាក់។
តាមការធ្វើតេស្តឈាម លទ្ធផលប្រចាំឆ្នាំ២០១០ មានអតិថិជនមកធ្វើតេស្តសរុប ១១.៥៤១នាក់ មានលទ្ធផលវិជ្ជមាន១៧៣នាក់ គិតជាភាគរយមាន៥,១% ដែលជាប្រការគួរឱ្យព្រួយបារម្ភ ។ ជំងឺរបេងសរុប៣.០០៤នាក់ អត្រាព្យាបាលជាសះស្បើយរក្សាខ្ពស់ បាន៧០% ហើយចំពោះគម្រោងសម្រាប់ជំងឺរបេងស៊ាំនឹងឱសថកំពុងត្រូវបានអនុវត្ត ។ ចំពោះគ្រោះថ្នាក់ចរាចរណ៍ចូលមកសម្រាកព្យាបាលនៅមន្ទីរពេទ្យក្នុងឆ្នាំ២០១០ គឺមានរបួស ប៉ះទង្គិចក្បាល២២២នាក់ របួសក្រៅពីប៉ះទង្គិចក្បាលមាន៩៧៧នាក់ ស្លាប់១៤នាក់ ។
លោកជៀង អំ អភិបាលខេត្ត បានកោតសរសើរដល់មន្ត្រីសុខាភិបាលទាំងអស់ដែលបានសហការល្អជាមួយអាជ្ញាធរគ្រប់លំដាប់ថ្នាក់ និងអង្គការដៃគូ បម្រើសេវាសុខាភិបាលជូនប្រជាពលរដ្ឋប្រកបដោយសមភាព តម្លាភាព និងគណនេយ្យភាព ជាសេចក្តីទុកចិត្តរបស់ប្រជាពលរដ្ឋ ។ លោកជៀង អំ ក៏បានផ្តាំផ្ញើដល់មន្ត្រីពាក់ព័ន្ធទាំងអស់ត្រូវបន្តសហការល្អ ផ្តល់សេវា សាធារណៈ ជាពិសេសសេវាសុខាភិបាលឱ្យកាន់តែប្រសើរ ឆ្លើយតបទៅនឹងសេចក្តីត្រូវការរបស់ប្រជាពលរដ្ឋ ជាពិសេសប្រជាពលរដ្ឋក្រីក្រ គ្មានលទ្ធភាពរកសេវាឯកជន ។
លោកអេង ហួត រដ្ឋលេខាធិការក្រសួងសុខាភិបាល មានប្រសាសន៍ក្នុងឱកាសបិទសន្និបាតនោះថា ក្នុងការអនុវត្តគោលនយោបាយនិងយុទ្ធសាស្ត្រចតុកោណរបស់រាជរដ្ឋាភិបាលដែលដឹកនាំប្រកបដោយគតិបណ្ឌិតរបស់សម្តេចតេជោហ៊ុន សែន គឺការលើកកម្ពស់វិស័យសុខាភិបាល គិតគូរដល់សុខុមាលភាពជូនប្រជាពលរដ្ឋ ដោយការប្រើប្រាស់ថវិកាជាតិ ជាមូលនិធិបង់ជួសប្រជាពលរដ្ឋសម្រាប់លើកកម្ពស់ជីវភាពប្រជាលរដ្ឋក្រីក្រ និងឧបត្ថម្ភពេទ្យឆ្មប និងអ្នកស្ម័គ្រចិត្ត ។ ជាមួយនេះ ផ្សព្វផ្សាយព័ត៌មានសុខាភិបាលឱ្យបានទូលំទូលាយ រួមទាំងការផ្តល់សេវាមូលនិធិសមធម៌ដល់ជនក្រីក្រនៅជនបទ ៕
ចែករំលែកព័តមាននេះ