រដ្ឋមន្ត្រីការបរទេសរបស់បណ្តាប្រទេសជាសមាជិកអង្គការកិច្ចសហប្រតិបត្តិការសៀងហៃ OCS បានជួបប្រជុំគ្នាកាលពីថ្ងៃទី៣ មិថុនា ដោយផ្តោតការពិភាក្សាលើយុទ្ធសាស្ត្រសម្រាប់ការពង្រីកអង្គការនោះនាពេលអនាគត ហើយរៀបចំកិច្ចប្រជុំកំពូល OCS ដែលគ្រោងធ្វើនាខែកក្កដាខាងមុខនេះនៅទីក្រុងអ៊ូហ្វារបស់រុស្ស៊ី ។
រដ្ឋមន្ត្រីការបរទេសទាំងនេះបានសម្រេចលើរូបមន្តនៃយុទ្ធសាស្ត្រអនាគតផ្តោតលើការពង្រីក OCS រហូតដល់ឆ្នាំ២០២៥ ដែលលើកទឹកចិត្តដល់កិច្ចសហប្រតិបត្តិការរវាងបណ្តារដ្ឋជាសមាជិកខាងវិស័យនយោបាយ សន្តិសុខ សេដ្ឋកិច្ច និងវប្បធម៌ ។
រដ្ឋមន្ត្រីការបរទេសទាំងនេះដែលរួមប្រជុំគ្នានៅក្រុងមូស្គូ បានអនុម័តគម្រោងសេចក្តីសម្រេចចិត្តដើម្បីឱ្យប្រទេសឥណ្ឌា និងប៉ាគីស្ថានចូលជាសមាជិក OCS ។
បង្កើតឡើងកាលពីឆ្នាំ២០០១ OCS រួមមានប្រទេសជាសមាជិកចិន កាហ្សាក់ស្ថាន កៀហ្ស៊ីស៊ីស្ថាន រុស្ស៊ី តាហ្ស៊ីគីស្ថាន និងអ៊ូបេគីស្ថាន ដែលជាសមាជិកពេញសិទ្ធិ ។ ប្រទេសអាហ្វហ្គានីស្ថាន ឥណ្ឌា អុីរ៉ង់ ម៉ុងហ្គោលី និងប៉ាគីស្ថាន ជាអ្នកសង្កេតការណ៍ ហើយប្រទេសបេឡារុស តួកគី និងស្រីលង្ការ ជាដៃគូចរចា ។ គឺប្រទេសរុស្ស៊ីដែលក្នុងឆ្នាំ២០១៥នេះ ជាប្រធានប្តូរវេនរបស់ OCS ។
ក្នុងកិច្ចប្រជុំនេះ រដ្ឋមន្ត្រីការបរទេសចិនលោកវ៉ាងយី អំពាវនាវកាលពីថ្ងៃទី៤ មិថុនា ដល់ OCS ឱ្យដើរតួនាទីកាន់តែស្ថាបនាក្នុងការថែរក្សាសន្តិសុខ និងស្ថេរភាពតំបន់ ។ ក្នុងកិច្ចប្រជុំដែលផ្តោតលើសន្តិសុខ និងស្ថេរភាពតំបន់ លោកវ៉ាង ធ្វើការកត់សម្គាល់ថា សភាពការណ៍ពិភពលោក និងតំបន់មានលក្ខណៈស្មុគស្មាញ ដូច្នេះ OCS ត្រូវដើរតួនាទីកាន់តែស្ថាបនា ហើយរួមចំណែកថែមទៀតដល់សន្តិសុខ និងស្ថេរភាពតំបន់ ៕
ចែករំលែកព័តមាននេះ