រាជធានីភ្នំពេញ ៖ កម្ពុជា ជាប់ចំណាត់ថ្នាក់លេខ៣ ក្នុងពិភពលោក (ក្នុងចំណោម១៦៦ប្រទេស) និងលេខ១ នៅអាស៊ី ជាប្រទេស ដែលមានស្ថានភាពគ្រប់គ្រងជំងឺកូវីដ-១៩…
រាជធានីភ្នំពេញ ៖ កម្ពុជា ជាប់ចំណាត់ថ្នាក់លេខ៣ ក្នុងពិភពលោក (ក្នុងចំណោម១៦៦ប្រទេស) និងលេខ១ នៅអាស៊ី ជាប្រទេស ដែលមានស្ថានភាពគ្រប់គ្រងជំងឺកូវីដ-១៩ និងផលប៉ះពាល់ពីជំងឺបានល្អជាងគេ នេះបើតាមរបាយការណ៍ Bureau de Prospective Economique (BPE) ។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងប្រាប់ទីភ្នាក់ងារសារព័ត៌មានកម្ពុជាតាមរយៈទូរស័ព្ទនារសៀលថ្ងៃទី២០ វិច្ឆិកា ២០២០នេះថា “ខ្ញុំសូមចូលរួមអបអរសាទរ ចំពោះចំណាត់ដ៏ល្អរបស់កម្ពុជា នៅក្នុងការគ្រប់គ្រងការឆ្លងរាលដាល និងផលប៉ះពាល់ នៃវីរុសកូវីដ-១៩ ប៉ុន្តែសូមរម្លឹកដល់ប្រជាពលរដ្ឋកម្ពុជាទាំងអស់ មិនត្រូវធ្វេសប្រហែសជាដាច់ខាត និងត្រូវតែយកចិត្តទុកដាក់ បង្កើនការប្រុងប្រយ័ត្នទ្វេដង” ។
លោកជំទាវ សង្កត់ធ្ងន់ថា កម្ពុជាជាប់ចំណាត់ថ្នាក់ល្អ ក៏ពិតមែន ប៉ុន្តែយើងមិនត្រូវធ្វេសប្រហែសជាដាច់ខាត និងត្រូវតែយកចិត្តទុកដាក់បង្កើនការប្រុងប្រយ័ត្នទ្វេដង ព្រោះថា ជំងឺកូវីដ-១៩ នៅបន្តមានសន្ទុះ នៃការឆ្លងរាលដាល ទាំងកម្រិតពិភពលោក ទាំងកម្រិតប្រទេសនៅអាស៊ាន ពុំទាន់ថមថយនៅឡើយទេ ។
លោកជំទាវបានបន្ថែមថា “ការវាយតម្លៃនេះ ជារឿងល្អ ហើយក៏បានឆ្លុះបញ្ចាំងពីការខិតខំប្រឹងប្រែងរបស់កម្ពុជា ក្នុងការទប់ស្កាត់ការរីករាលដាល នៃវីរុសកូវីដ-១៩ បានដោយជោគជ័យផងដែរ” ។
គិតមកត្រឹមយប់ថ្ងៃទី២០ វិច្ឆិកា ២០២០នេះ ប្រទេសកម្ពុជាមិនមានការឆ្លងវីរុសកូវីដ១៩ ចូលក្នុងសហគមន៍ទេ ហើយភាគច្រើន គឺជាករណីនាំចូល ។ រហូតមកដល់ពេលនេះ ក្រសួងសុខាភិបាលកម្ពុជា រកឃើញអ្នកឆ្លងកូវីដ-១៩ សរុប ៣០៤ករណី និងព្យាបាលជាសះស្បើយ សរុបចំនួន ២៩៤នាក់ កំពុងសម្រាកព្យាបាល ចំំនួន១០នាក់ និងគ្មានស្លាប់ទេ ៕
កម្ពុជាជាប់លំដាប់ទី៣ លើពិភពលោក និងលេខ១នៅអាស៊ី ក្នុងការទប់ស្កាត់កូវីដ-១៩ បានល្អបំផុត
ចែករំលែកព័តមាននេះ