ខេត្តកំពត ៖ ករណីជម្លោះដីធ្លីរវាងអ្នកភូមិ ជាមួយក្រុមហ៊ុន សូ ងួន ដែលមានខ្មាន់កាំភ្លើងលួចបាញ់ប្រហារ បណ្តាលឲ្យសន្តិសុខម្នាក់បាត់បង់ជីវិត និងម្នាក់ទៀតរងរបួសជាទម្ងន់នោះ គិតត្រឹមថ្ងៃទី១៩ វិច្ឆិកា ត្រូវបានសមត្ថកិច្ចនគរបាលជំនាញខេត្តកំពតស្រាវជ្រាវនឹងឃាត់ខ្លួនជនសង្ស័យបានចំនួន២នាក់ ។ សូមរំលឹកថា ៖ ខ្មាន់កាំភ្លើងបាញ់ចេញពីក្នុងព្រៃបង្កឱ្យសន្តិសុខក្រុមហ៊ុនសូ ងួន បាត់ជីវិត
សេចក្តីរាយការណ៍ឱ្យដឹងថា ជនសង្ស័យម្នាក់ឈ្មោះ ញាន សែង ភេទប្រុស អាយុ២៣ ឆ្នាំ រស់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត (ចូលរួមប្រព្រឹត្ត)និងម្នាក់ទៀតឈ្មោះ ស៊ឹម ថែ ភេទប្រុស អាយុ២១ ឆ្នាំ រស់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត (ស៊ឹម ថែ ជាកូនបង្កើតរបស់ឈ្មោះ ស៊ូ ធា ជាជនដៃដល់) ។
ជាមួយគ្នានោះ សមត្ថកិច្ចបានចុះទៅឆែកឆេរដល់ផ្ទះជនសង្ស័យឈ្មោះ ស៊ូ ធា រឹបអូសបានប្រទះអាវុធកែច្នៃចំនួន២ដើម ដោយឡែក អាវុធអាកា ជនសង្ស័យបានយកទៅជាមួយ ។
នៅពេលឃាត់ខ្លួន ជនសង្ស័យទាំង២នាក់បានឆ្លើយសារភាពថា «ជនដៃដល់ដែលធ្វើសកម្មភាពបាញ់ប្រហារសន្តិសុខក្រុមហ៊ុន សូ ងួន គឺឈ្មោះ ស៊ូ ធា ជាមេខ្លោង ដោយបានប្រើប្រាស់កាំភ្លើងអាកា ហើយពេលនេះ កំពុងលាក់ខ្លួននៅលើភ្នំចម្ងាយពីកន្លែងកើតហេតុ៥ គីឡូម៉ែត្រ ដោយភ្ជាប់នូវអាវុធអាកា១ដើមទៅជាមួយផង ។
ករណីខាងលើនេះ សមត្ថកិច្ចបាននឹងកំពុងធ្វើការឡោមព័ទ្ធនៅជើងភ្នំនោះ ដើម្បីចាប់ខ្លួនជនដៃដល់ ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ