រាជធានីភ្នំពេញ ៖ មន្ត្រីនគរបាលនៅអង្គភាពអន្តរាគមន៍ព្រែកឯងម្នាក់ ត្រូវបានកម្លាំងនគរបាលព្រហ្មទណ្ឌខណ្ឌពោធិ៍សែនជ័យ ធ្វើការឃាត់ខ្លួន និងដកហូតអាវុធខ្លី១ដើម រួចនាំទៅសាកសួរ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមច្បាប់ ក្រោយពីបុរសនេះដកកាំភ្លើងខ្លីអាម៉េបញ្ចូលគ្រាប់ភ្ជង់គម្រាមបាញ់សម្លាប់មិត្តភក្ដិម្នាក់ ដែលជាមន្ត្រីនគរបាលដូចគ្នា ព្រោះតែខឹងហុចបារីដែលជ្រុះលើដីឲ្យជនរងគ្រោះជក់តែមិនព្រមទទួលយកជាហេតុធ្វើឲ្យជនសង្ស័យផ្ទុះកំហឹង ។
ហេតុការណ៍នេះបានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង២២និង៣០នាទីយប់ ថ្ងៃទី១៨ ខែវិច្ឆិកា ឆ្នាំ២០២០ នៅចំណុចក្នុងភោជនីយដ្ឋាន «ហ្ស៉ឹម» ស្ថិតនៅតាមបណ្ដោយផ្លូវរថភ្លើងក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជ ធានីភ្នំពេញ ។
បុរសជាជនសង្ស័យឈ្មោះ រ៉េត សុគន្ធ អាយុ២៦ឆ្នាំ មុខរបរ មន្ត្រីនគរបាល អង្គភាពអន្តរាគមន៍ព្រែកឯង ស្នាក់នៅក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ប្រើប្រាស់អាវុធខ្លី០១ដើម ម៉ាកG LOCK 19 ពណ៌ខ្មៅ លេខRTP3532 ផលិតនៅប្រទេសអាមេរិក មានគ្រាប់ចំនួន០៩គ្រាប់ និងបង់១ ។ ចំណែកបុរសដែលជាជនរងគ្រោះមានឈ្មោះ ប៉ុន សិទ្ធារាជ្យ ភេទប្រុស អាយុ២៦ឆ្នាំ មុខរបរមន្ត្រីនគរបាល មានទីលំនៅផ្ទះលេខ១៣៣ ផ្លូវបេតុង ភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ត្រូវជាមិត្តភក្ដិជនសង្ស័យខាងលើ ។
តាមរបាយការណ៍នគរបាលព្រហ្មទណ្ឌខណ្ឌពោធិ៍សែនជ័យបានឲ្យដឹងថា ជនសង្ស័យ និងជនរងគ្រោះ គឺជាមិត្តភក្ដិនឹងគ្នា ហើយនៅមុនពេលកើតហេតុបាននាំគ្នាទៅផឹកស៊ីនៅក្នុងភោជនីយដ្ឋានខាងលើរួមជាមួយមិត្តភក្ដិផ្សេងទៀត មានគ្នាសរុបប្រហែល១០នាក់ ។ លុះពេលផឹកស៊ី បានមួយសន្ទុះក្រោយមកជនសង្ស័យបានហុចបារី១ដើម ទៅឲ្យជនរងគ្រោះជក់ ប៉ុន្តែខណៈនោះបារីបានធ្លាក់ទៅលើដី ហើយជនសង្ស័យក៏បានឱនរើសបារីនោះ រួចហុចឲ្យជនរងគ្រោះម្ដងទៀត ប៉ុន្តែជនរងគ្រោះបានប្រកែកមិនព្រមយកបារីដែលជ្រុះនេះឡើយ គឺទាមទារចង់បានបារីថ្មីវិញ ។
ប្រភពដដែលបានបន្តថា ដោយសារតែបែបនេះបានធ្វើឲ្យជនសង្ស័យផ្ទុះកំហឹងដោយនិយាយថា ជនរងគ្រោះមើលងាយខ្លួនក៏កើតទៅជាទំនាស់ពាក្យសម្តី និងគ្នាមួយប្រាវ បន្ទាប់មកទៀត ជនសង្ស័យបានទាញយកអាវុធខ្លីម៉ាក G LOCK 19 ចេញពីក្នុងកាបូបដាក់សម្ភារៈមកអាម៉េបញ្ចូលគ្រាប់ រួចភ្លង់គម្រាមបាញ់ទៅលើជនរងគ្រោះ ។ ប៉ុន្តែពេលនោះក៏ត្រូវបានមិត្តភក្ដិដែលផឹកស៊ីរួមតុជាមួយគ្នាឃាត់បំបែកចេញពីគ្នារៀងៗខ្លួន ហើយជនសង្ស័យបានគេចខ្លួនបាត់ស្រមោល ចំណែកជនរងគ្រោះក៏បានទៅដាក់ពាក្យបណ្តឹងនៅផ្នែកនគរបាលយុត្តិធម៌នៃអធិការដ្ឋាននគរបាលខណ្ឌពោធិ៍សែនជ័យឲ្យជួយអន្តរាគមន៍ ។
ប្រភពខាងលើបានបញ្ជាក់ទៀតថា ក្រោយពីទទួលបានពាក្យបណ្តឹងកម្លាំងនគរបាលព្រហ្មទណ្ឌ ខណ្ឌពោធិ៍សែនជ័យ បានចុះធ្វើការស្រាវជ្រាវ លុះដល់វេលាម៉ោង៥ល្ងាច ថ្ងៃទី១៩ ខែវិច្ឆិកា ឆ្នាំ២០២០ ទើបឈានដល់ការឃាត់ខ្លួនជនសង្ស័យដល់ផ្ទះតែម្ដង ។ ខណៈនោះកម្លាំងដកហូតអាវុធខ្លី០១ដើម ម៉ាកG LOCK 19 ពណ៌ខ្មៅ លេខRTP3532 ផលិតនៅប្រទេសអាមេរិក មានគ្រាប់ចំនួន០៩គ្រាប់ និងបង់១ បន្ទាប់មកបាននាំទៅសាកសួរ និងកសាងសំណុំរឿង ដើម្បីបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធីច្បាប់ ៕
ចែករំលែកព័តមាននេះ