រាជធានីភ្នំពេញ ៖ បុរសម្នាក់ជាកម្មករសំណង់នៅក្នុងឃ្លាំងមួយកន្លែង បានបែកគំនិតលួចយកម៉ូទ័រពីក្នុងឃ្លាំងទៅបញ្ចាំនឹងបុរសម្នាក់ទៀតដែលមិនស្គាល់គ្នាសោះក្នុងតំលៃ20$រហូតដល់ម្ចាស់ឃ្លាំងដឹងរឿងសួរនាំមកដល់កន្លែងស្នាក់នៅរបស់បុរសទទួលបញ្ចាំ ក៏បង្កឲ្យមានការឈ្លោះប្រកែកគ្នាផ្អើលសមត្ថកិច្ចខណ្ឌសែនសុខ ចុះមកណែនាំតែម្តង កាលពីម៉ោង8និង15នាទីយប់ ថ្ងៃទី18 ខែវិច្ឆិកា ឆ្នាំ2020 តាមបណ្តោយផ្លូវម៉ុងរិទ្ធី នៅចំណុចបន្ទប់ជួលលេខ៤ ស្ថិតក្នុងភូមិបាយ៉ាបសង្កាត់ភ្នំពេញថ្មី ខណ្ឌសែនសុខ ។
បើតាមសាក្សីដែលឃើញការណ៍បានឱ្យដឹងថា មុនពេលកើតហេតុ គឺមានជនសង្ស័យម្នាក់ដែលធ្វើការនៅក្នុងឃ្លាំងមួយកន្លែង ហើយមិនដឹងយ៉ាងមិចនោះទេ បានជាជនសង្ស័យរូបនេះលួចយកម៉ូទ័រពីក្នុងឃ្លាំងទៅបញ្ចាំនៅឯបន្ទប់ជួលលេខ៤ ក្នុងតំលៃចំនួន20$តាំងពីមួយខែមុនម្ល៉េះ ។
សាក្សីខាងលើបន្តថា លុះរហូតមកដល់ថ្ងៃកើតហេតុខាងលើនេះ ក៏ស្រាប់តែថៅកែបានដឹងរឿងរ៉ាវថា កូនចៅខ្លួនបានលួចយកទៅបញ្ចាំក៏ឱ្យជូនទៅដល់កន្លែងបញ្ចាំ ស្រាប់តែប្រពន្ធរបស់បុរសដែលទទួលបញ្ចាំនោះបានប្រកែកថា មិនឱ្យម៉ូទ័រនោះវិញទេ បើចង់បានយកលុយ10ម៉ឺនរៀលមកលួសវិញទើបឱ្យ ប៉ុន្តែម្ចាស់ឃ្លាំងគាត់មិនដឹងថាបញ្ចាំប៉ុន្មាននោះទេ គ្រាន់តែចង់បានរបស់គាត់យកមកវិញតែប៉ុណ្ណោះធ្វើឱ្យមានការឈ្លោះប្រកែកគ្នាឡើងផ្អើលទៅដល់សមត្ថកិច្ចខណ្ឌសែនសុខ ចុះមកអន្តរាគមន៍ទាំងយប់ ។
សាក្សីខាងលើបន្តទៀតថា ក្រោយមកខាងបុរសដែលទទួលបញ្ចាំឈ្មោះ ដាវី អាយុ30ឆ្នាំ មានមុខរបរកម្មករសំណង់ ស្នាក់នៅបន្ទប់លេខ4 សង្កាត់ភ្នំពេញថ្មី ខណ្ឌសែនសុខ បានយល់ព្រមប្រគល់ម៉ូទ័រឲ្យវិញ ដោយមិនមានការប្រកែកទេ ។ ចំណែករឿងលុយលួសនោះ ថៅកែបានបញ្ជាក់ថាគិតគូរជាមួយអ្នកដែលយកមកបញ្ចាំទៅ គាត់យកតែម៉ូទ័រត្រឡប់ទៅវិញប៉ុណ្ណោះ ។
ក្រោយពេលកើតហេតុខាងលើនេះ ភាគីខាងជនរងគ្រោះមិនចង់ឱ្យមានរឿងរ៉ាវវែងឆ្ងាយនោះទេ ទើបមិនដាក់ពាក្យបណ្តឹង ហើយយកម៉ូទ័រត្រឡប់ទៅវិញ ដើម្បីបញ្ចប់រឿងតែម្តង៕
ចែករំលែកព័តមាននេះ