រាជធានីភ្នំពេញ ៖ មានការចាប់អារម្មណ៍មិនតិចទេ បន្ទាប់ពីក្លិបបាល់ទាត់នៅប្រទេសម៉ាឡេស៊ីមួយចំនួនត្រូវបានរំសាយដោយសារការរាតត្បាតនៃជំងឺកូវីដ-១៩ស្របពេលដែលកីឡាករកម្ពុជា ធារី ចន្ថាប៊ីន ដែលកំពុងប្រកបអាជីពបាល់ទាត់នៅទីនោះក៏ដល់ពេលវេលាត្រូវបញ្ចប់កុងត្រាជាមួយក្លិបរបស់ខ្លួនផងដែរ ។ អ្នកគាំទ្រកំពុងចាំមើល ថាតើកីឡាករកូនកាត់បារាំងរូបនេះ នឹងបង្ហាញខ្លួនលេងឱ្យក្លិបបាល់ទាត់នៅក្នុងស្រុក ឬនឹងរកឱកាសលេងនៅក្រៅប្រទេសបន្តទៀត ។
យ៉ាងណាក៏ដោយ នៅក្នុងស្ថានភាពវិបត្តិសាកលដែលបណ្ដាលមកពីការរីករាលដាលនៃជំងឺកូវីដ-១៩បែបនេះ គឺលោកអាចនឹងនៅស្ងៀមសិនក៏ថាបាន។
យោងតាមការប្រកាសនៅលើទំព័រហ្វេសប៊ុករបស់លោកកាលពីពេលថ្មីៗកន្លងទៅនេះ បានបង្ហាញយ៉ាងច្បាស់ថា លោកនឹង បាយៗពីហ្វេនដែលធ្លាប់គាំទ្រលោកក្នុងក្លិបប្រទេសម៉ាឡេស៊ីនោះ ។ នេះគឺជាការបញ្ចប់បេសកកម្ម របស់លោកជាមួយក្លិប Perak FA ដែលស្ថិតក្នុងលីគកំពូលម៉ាឡេស៊ី(Malaysia Super League) ។ អ្នកគាំទ្រធ្លាប់រំពឹងថា លោកនឹងបន្តការងារទៅមុខទៀត បើទោះជាមានការរំខានដោយកូវីដ-១៩ក្ដី ។ លោកបានបង្ហោះជាសាធារណៈថា «លាហើយអ្នកគាំទ្រ!
សូមអរគុណដល់មិត្តរួមក្រុមទាំងអស់ ក្រុមការងារ គ្រូបង្វឹក និងអ្នកគាំទ្រដែលបានជួយខ្ញុំ គ្រប់យ៉ាង ។ សង្ឃឹមថា គ្រប់គ្នានឹងជួបតែ សំណាងល្អ និងជោគជ័យនៅថ្ងៃខាងមុខ»។ នេះជាសំណេររបស់កីឡាករកូនកាត់ខ្មែរ -បារាំង ធារី ចន្ថាប៊ីន ទៅកាន់ក្លិបបាល់ទាត់ Perak FA ក្រោយរូបលោកបានចប់កិច្ចសន្យាត្រឹម១រដូវ កាលជាមួយក្លិប ខណៈខ្លួនជាកីឡាករកូតា អាស៊ានរបស់ក្លិបប្រចាំលីគកំពូលម៉ាឡេស៊ី មួយនេះ ដែលជួយឱ្យមហាជនស្គាល់ច្បាស់ពីសមត្ថភាពរបស់កីឡាករកម្ពុជានៅលើតារាងបាល់ទាត់បរទេស ។ កីឡាករសមាជិកក្នុងក្រុមជម្រើសជាតិកម្ពុជារូបនេះបានបន្តសំណេរទៀតថា ៖«2020 ជាឆ្នាំមួយមិនងាយស្រួលឡើយ។
សង្ឃឹមថា អ្វីៗនឹងប្រសើរឡើងឆាប់ៗ ។ អរគុណអ្នកទាំងអស់គ្នាដែលបានផ្ញើសារ និងគាំទ្រ ។ ខ្ញុំកំពុងតែសម្លឹងមើលទំព័រថ្មី នៃអាជីព បាល់ទាត់របស់ខ្ញុំ ។ ខ្ញុំនឹងប្រាប់ដល់គ្រប់គ្នា ឆាប់ៗ ។ សូមថែរក្សាខ្លួន » ។
គួរបញ្ជាក់ថា ពេញ១រដូវកាលឆ្នាំ ២០២០ ជាមួយក្លិប Perak FA កីឡាករ ធារី ចន្ថាប៊ីន បានជួយក្លិបមួយនេះ ឈ្នះជើងឯកពានបើក រដូវកាល Unity Shield និងបានឈរក្នុងចំណាត់ថ្នាក់លេខ ៤ ក្នុងចំណោមក្លិបទាំង១២ ប្រចាំលីគកំពូលម៉ាឡេស៊ី ខណៈដែលកីឡាកររូបនេះ បានក្លាយជាអ្នករកបាន១គ្រាប់ក្នុងនាមជាខ្សែបម្រើនៅក្នុងការប្រកួតដ៏សំខាន់មួយ។
ហេតុផលនៃការបញ្ចប់កុងត្រានេះ គឺដោយសារតែពានរង្វាន់ 2020 Malaysia Cup និង ពានរង្វាន់ 2020 Malaysia FA Cup ដែលជាព្រឹត្តិការណ៍ដ៏ធំរបស់ប្រទេសម៉ាឡេស៊ីត្រូវបានសហព័ន្ធកីឡាបាល់ទាត់ម៉ាឡេស៊ីសម្រេចរំសាយចោល វិញដោយសារបញ្ហាកូវីដ-១៩នៅតែបន្ត ។
ធារី ចន្ថាប៊ីន ក៏ត្រូវបានគេស្គាល់ថា គឺជាកីឡាករដែលបានធ្វើដំណើរពីប្រទេសបារាំងមកកម្ពុជាដំបូងបំផុតតាមរយៈកិច្ចសន្យាជាមួយក្លិបភ្នំពេញក្រោនកាលពីខែតុលា ឆ្នាំ២០១២ កន្លងទៅ ដំណាលគ្នានឹងមិត្តភក្ដិមកពីបារាំងជាមួយគ្នា កុក បូរីស និងគួច ដានី បន្ទាប់ពីពួកគេបានធ្វើដំណើរជាមួយក្រុមបាល់ទាត់កូនខ្មែរ-អឺរ៉ុបដែលដឹកនាំដោយអតីតវីរបុរសបាល់ទាត់ខ្មែរប៉ែន ផាត មកប្រកួតនៅកម្ពុជាអំឡុងពាក់កណ្ដាលឆ្នាំ២០១២ ។
លោកល្បីឈ្មោះក្រោយពីជាប់ឈ្មោះក្នុងក្រុមជម្រើសជាតិកម្ពុជាកាលពីឆ្នាំ២០១៤រហូតដល់ខែតុលា ឆ្នាំ២០១៧ ។ នៅដើមរដូវកាលឆ្នាំ២០១៧ លោកបានចេញទៅចូលរួមជាមួយក្លិប Krabi FC សមាជិកពានរង្វាន់លីគលំដាប់ទី២ នៅប្រទេសថៃ ខណៈនៅពាក់កណ្ដាលរដូវកាលរូបគេបានផ្លាស់មកលេងនៅកម្ពុជាវិញជាមួយក្លិបអគ្គិសនីកម្ពុជា ។ នៅឆ្នាំ២០១៨ និង២០១៩ រូបគេបានចូលរួមជាមួយក្លិបTerengganu FA នៅលីគកំពូលម៉ាឡេស៊ី ខណៈដើមរដូវកាលឆ្នាំ ២០២០ សមាជិកក្រុមជម្រើសជាតិកម្ពុជារូបនេះចូលរួមជាមួយក្រុម Sukhothai នៅលីគកំពូលថៃ មុនបន្តទៅដល់ក្លិបPerak FA របស់ម៉ាឡេស៊ី នេះ ៕
ចែករំលែកព័តមាននេះ