រាជធានីភ្នំពេញ ៖ រដ្ឋមន្ត្រីក្រសួងអប់រំយុវជន និងកីឡា លោកបណ្ឌិតសភាចារ្យ ហង់ ជួន ណារ៉ុន បានសម្រេចលើកពេលនៃការប្រកួតកីឡាសិស្សបឋមសិក្សាថ្នាក់ជាតិលើកទី១ ទៅខែធ្នូវិញ…
រាជធានីភ្នំពេញ ៖ រដ្ឋមន្ត្រីក្រសួងអប់រំយុវជន និងកីឡា លោកបណ្ឌិតសភាចារ្យ ហង់ ជួន ណារ៉ុន បានសម្រេចលើកពេលនៃការប្រកួតកីឡាសិស្សបឋមសិក្សាថ្នាក់ជាតិលើកទី១ ទៅខែធ្នូវិញ បន្ទាប់ពីមានព្រឹត្តិការណ៍ថ្ងៃទី៣ វិច្ឆិកា កើតឡើងមកនោះ។
តាមការគ្រោងទុក ការប្រកួតកីឡាសិស្សបឋមសិក្សាថ្នាក់ជាតិលើកទី១ ឆ្នាំ២០២០នេះ នឹងរៀបចំធ្វើឡើងចាប់ពីថ្ងៃទី២០ដល់ថ្ងៃទី២៩វិច្ឆិកា តែបន្ទាប់ពីព្រឹត្តិការណ៍ថ្ងៃ៣ វិច្ឆិកា កើតឡើង រាល់សកម្មភាពជួបជុំនានា ត្រូវធ្វើដោយប្រុងប្រយ័ត្ន និងគោរពតាមការណែនាំរបស់ក្រសួងសុខាភិបាល និងរក្សាគម្លាតសុវត្ថិភាពរវាងគ្នានឹងគ្នាឲ្យបានល្អ ។
នៅថ្ងៃទី១៣វិច្ឆិកា លោករដ្ឋមន្ត្រីក្រសួងអប់រំ យុវជន និងកីឡា បានចុះហត្ថលេខាលើសេចក្ដីប្រកាសផ្ញើទៅប្រធានមន្ទីរអប់រំ យុវជន និងកីឡាគ្រប់រាជធានីខេត្តទូទាំងប្រទេសថា ការប្រកួតកីឡាសិស្សបឋមសិក្សាថ្នាក់ជាតិទូទាំងប្រទេស នឹងធ្វើចាប់ពីថ្ងៃទី៧ ដល់ថ្ងៃទី១៦ ខែធ្នូ ឆ្នាំ២០២០វិញ ។ នេះជាការពន្យារពេលលើកទី២ហើយសម្រាប់ព្រឹត្តិការណ៍នេះ ដោយសារតែការរំខាននៃមេរោគកូវីដ-១៩ ដែលតាមកាលវិភាគប្រកួតគ្រោងនឹងចាប់ផ្ដើមពីថ្ងៃទី២៥ មីនា ដល់ថ្ងៃទី៣ខែមេសា ២០២០ ។
លោក ដួង មាសចំរើន ប្រធាននាយកដ្ឋានអប់រំកាយ និងកីឡាសិស្ស-និស្សិត បានប្រាប់ឲ្យដឹងថា កីឡាចំនួន៨ប្រភេទនឹងដាក់ឲ្យប្រកួតនោះ មានប្រភេទកីឡាបាល់ទះ ប្រភេទ បាល់បោះ បាល់ទាត់ អត្តពលកម្ម វាយសី វាយកូនឃ្លីលើតុ តេក្វាន់ដូWT និងតេក្វាន់ដូITF។ ទីលានចំនួន៤ដែលត្រូវទទួលរៀបចំព្រឹត្តិការណ៍នោះមានទីលានក្នុងពហុកីឡដ្ឋានជាតិអូឡាំពិក វិទ្យាស្ថានជាតិអប់រំកាយ និងកីឡា វិទ្យាល័យច្បារអំពៅ និងវិទ្យាល័យបឹងកេងកង ៕
ចែករំលែកព័តមាននេះ