រាជធានីភ្នំពេញ ៖ យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៩ វិច្ឆិកា ២០២០នេះ បានអោយដឹងថា ក្នុងរយៈពេល១០ខែ…
រាជធានីភ្នំពេញ ៖ យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៩ វិច្ឆិកា ២០២០នេះ បានអោយដឹងថា ក្នុងរយៈពេល១០ខែ ឆ្នាំ២០២០នេះ កម្ពុជាបាននាំចេញអង្ករទៅកាន់ប្រទេសអូស្ត្រាលី ប្រមាណ២៥.៩៩៤តោនកើនឡើងប្រមាណ៨.៩៧១តោន ឬប្រមាណ៥២,៧ភាគរយធៀបនឹងរយៈពេលដូចគ្នាក្នុងឆ្នាំ ២០១៩កន្លងទៅ ។
ការបង្ហាញតួលេខរបស់ក្រសួងកសិកម្មរុក្ខា ប្រមាញ់ និងនេសាទ ត្រូវបានធ្វើឡើងក្រោយពេលមានការផ្សាយព័ត៌មានមួយថា ការនាំចេញអង្ករកម្ពុជាទៅកាន់អូស្ត្រាលីមានការសង្ស័យជាប់ពាក់ព័ន្ធនឹងការរំលោភសិទ្ធិមនុស្សនៅកម្ពុជា ។
ក្នុងរបាយការណ៍បានសរសេរថា វិស័យកសិកម្មកម្ពុជាបាន និងកំពុងរីកចម្រើនឥតឈប់ឈរ និងកំពុងដើរនាទីដ៏សំខាន់ទោះបីស្ថិតនៅក្នុងស្ថានភាពនៃការប្រឈមជាច្រើនរួមមានទាំងការប្រែប្រួលអាកាសធាតុសម្ពាធសេដ្ឋកិច្ចនយោបាយ និងការរាតត្បាតនៃជំងឺកូវីដ១៩ក៏ដោយ ។
បច្ចុប្បន្ននេះប្រជាកសិករកំពុងកែប្រែមុខមាត់ពីការអនុវត្តកសិកម្មតាមបែបយថាផលទៅជាលក្ខណៈប្រពលវប្បកម្ម និងកែប្រែជីវភាពរស់នៅរបស់ខ្លួនទៅជាកសិ-ពាណិជ្ជករវិញ ហើយកម្ពុជាកំពុងតែវិវឌ្ឍពីប្រទេសដែលពឹងផ្អែកលើវិស័យកសិកម្មទៅជាកសិ-ឧស្សាហកម្មវិញ ក្នុងបរិបទនៃបដិវត្តន៍ឧស្សាហកម្មទី៤ ។
ការនាំចេញផលិតផលកសិកម្មសរុបបានកើនឡើងពី៤,១៦លានតោននៅឆ្នាំ ២០១៥ កើនឡើងដល់៤,៨៨លានតោន ក្នុងឆ្នាំ ២០១៩ ស្មើនឹង១៧,៣ភាគរយ ។ សម្រាប់ការនាំចេញអង្ករវិញបានកើនឡើងដល់ជិត៥៤ម៉ឺនតោនក្នុងឆ្នាំ២០១៨ដល់៦២ម៉ឺនតោនក្នុងឆ្នាំ ២០១៩ និងបានកើនឡើងដល់៥៣ម៉ឺន៦ពាន់តោន គិតជាទឹកប្រាក់ប្រមាណជាង៣៦៦លានដុល្លារអាមេរិក ។
បច្ចុប្បន្ន ស្ថានភាពនៃការរីកចម្រើនរបស់វិស័យកសិកម្ម កម្ពុជាទាំងផ្នែកផលិតកម្ម និងការនាំចេញពិតជាបានឆ្លុះបញ្ចាំងយ៉ាងច្បាស់អំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ទាំងក្នុងក្របខ័ណ្ឌជាតិ និងអន្តរជាតិ ដោយបានយកចិត្តទុកដាក់ខ្ពស់លើការវិនិយោគវិស័យកសិកម្ម ការបញ្ចប់បញ្ហាទំនាស់ដីធ្លីកសិកម្ម និងការបង្កើតសហគមន៍កសិកម្ម និងបណ្ដុំកសិករផលិត ការផ្សាភ្ជាប់ផលិតផលនិងទីផ្សារ ការលើកកម្ពស់ភាពប្រកួតប្រជែងលើគុណភាពនិងសុវត្ថិភាពផលិតផល និងការបើករបាំងបច្ចេកទេសអនាម័យ និងភូតគាមអនាម័យសម្រាប់ជំរុញការនាំចេញកសិផលកម្ពុជាទៅកាន់ទីផ្សារអន្តរជាតិប្រកបដោយនិរន្តរភាព ។
ក្នុងសេចក្ដីប្រកាសព័ត៌មានរបស់ក្រសួងកសិកម្មរុក្ខាប្រមាញ់និងនេសាទបង្ហាញថា ភាពជឿនលឿននៃវិស័យកសិកម្មកម្ពុជា គឺសម្រេចបានដោយសារតែប្រទេសជាតិមានសុខសន្តិភាព ។ នៅក្នុងដំណាក់កាលកម្ពុជាទទួលរងនូវផលប៉ះពាល់ពីកូវីដ១៩ វិស័យជាច្រើនបានធ្លាក់ចុះ ក៏ប៉ុន្តែសម្រាប់វិស័យកសិកម្ម និងការនាំចេញផលិតផលកម្ពុជា បែរជាមានកំណើននិងសញ្ញាវិជ្ជមាន ។
ធនាគារពិភពលោកនិងធនាគារអភិវឌ្ឍន៍អាស៊ី បានដំឡើងការព្យាករណ៍សេដ្ឋកិច្ចកម្ពុជាឡើងវិញ ដោយផ្អែកលើកំណើននាំចេញផលិតផលកសិកម្មកម្ពុជា ក្នុងរយៈប៉ុន្មានខែដើមឆ្នាំនេះ ។
ប្រមុខរាជរដ្ឋាភិបាលកម្ពុជា កន្លងមកបានអំពាវនាវដល់ប្រជាពលរដ្ឋដែលរងផលប៉ះពាល់ដោយសារតែកូវីដ១៩ ងាកមកធ្វើអាជីវកម្មកសិកម្ម ចិញ្ចឹមសត្វ និងដាំដុះដើម្បីផ្គត់ផ្គង់ដល់សណ្ឋាគារ ភោជនីយដ្ឋាន និងសម្រាប់នាំចេញទៅកាន់ទីផ្សារអន្តរជាតិផងដែរ ។
សម្ដេចថា៖« ក្នុងពេលមានវិបត្តិនៃជំងឺសកល តម្រូវការផ្សេងទៀតបានធ្លាក់ចុះតែតម្រូវការនៃការហូបចុកមិនថមថយទេ មានតែមានកំណើនខ្ពស់ជាងមុន ដូច្នេះហើយទើបធ្វើឱ្យប្រទេសផលិតអាហារមានសក្ដានុពលខ្ពស់ » ៕
ចែករំលែកព័តមាននេះ