ខេត្តប៉ៃលិន ៖ គេសង្កេតឃើញដីភ្នំមួយកន្លែង ត្រូវបានគ្រឿងចក្រក្រុមហ៊ុនម៉ៅការ ធ្វើផ្លូវជីកកកាយដឹកយកទៅចាក់ស្ថាបនាផ្លូវ នៅក្បែរក្រវ៉ាត់ព្រំដែន ដើម្បីសម្រួលដល់ការធ្វើដំណើររបស់ប្រជាពលរដ្ឋ ដែលការជីកកកាយដីភ្នំនេះ ធ្វើឡើងកាលពីព្រឹកថ្ងៃទី១៨ វិច្ឆិកា ឆ្នាំ២០២០ ស្ថិតនៅក្នុងភូមិ អូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃ
លិន ។
ប្រភពព័ត៌មានបានឱ្យដឹងថា ដោយសារតែតម្រូវការចាំបាច់ក្នុងការប្រើប្រាស់ភ្នំមួយចំនួននៅភូមិអូរឈើក្រំ និងភូមិផ្សារព្រំ ឃុំស្ទឹងកាច់ ស្រុកសាលាក្រៅ ទើបក្រុមហ៊ុនស្ថាបនាផ្លូវ បានស្នើសុំទៅខាងអាជ្ញាធរខេត្តប៉ៃលិន ដើម្បីសម្របសម្រួលឱ្យយកគ្រឿងចក្រទៅជីកកកាយដីភ្នំ យកទៅក្រាលធ្វើផ្លូវ នៅជាប់នឹងក្រវ៉ាត់ព្រំដែន ។
ប្រភពបន្តទៀតថា ការជីកកកាយដីភ្នំធ្វើផ្លូវនេះ គេមិនកំណត់ថា ត្រូវការប៉ុន្មានកន្លែងនោះទេ ពោលគឺប្រើប្រាស់ដីភ្នំរហូតដល់ធ្វើផ្លូវរួចរាល់តែម្តង ។ ចំណែកប្រជាពលរដ្ឋ រស់នៅក្នុងភូមិខាងលើមានការសប្បាយរីករាយ ដោយឃើញអាជ្ញាធរខេត្តយកភ្នំខាងលើជាសម្បត្តិរដ្ឋ បម្រើឱ្យប្រយោជន៍សាធារណ: ទោះបីជាជីកកកាយទំហំធំប៉ុណ្ណាក៏ពួកគាត់នៅតែមិនទាស់ទាល់អ្វីនោះទេ ពោលគឺគាំទ្រតែម្តង កុំឱ្យតែជីកយកទៅលក់ដូរបម្រើជាប្រយោជន៍ផ្ទាល់ខ្លួន ។
ពាក់ព័ន្ធទៅនឹងបញ្ហានេះ មេការក្រុមហ៊ុនធ្វើផ្លូវម្នាក់ មិនបញ្ចេញឈ្មោះ បានឱ្យដឹងថា ពួកគេហ៊ានយកគ្រឿងចក្រទៅជីកកកាយដីភ្នំនៅក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ បែបនេះយកមកក្រាលធ្វើផ្លូវ គឺដោយសារមានលិខិតអនុញ្ញាតិ ចេញពីរដ្ឋបាលខេត្តប៉ៃលិន ។ បើតាមប្រភពព័ត៌មានលោក ធូ ភា អភិបាលរងខេត្តប៉ៃលិន និងជាអ្នកនាំពាក្យសាលាខេត្តប៉ៃលិន បានឱ្យដឹងថា ខាងលោកអត់សូវដឹងរឿងនេះច្បាស់ដែរ ចំពោះការជីកកកាយដីភ្នំ បើចង់ដឹងច្បាស់ឱ្យសួរនាំទៅខាងមន្ត្រីនៃមន្ទីរជំនាញ រ៉ែ និងថាមពលខេត្ត ទើបច្បាស់ជាង ។
ក្រោយមក ភ្នាក់ងារយើងក៏បានទាក់ទងទៅលោក សុខ សួន ប្រធានមន្ទីររ៉ែ និងថាមពលខេត្តប៉ៃលិនបានឱ្យដឹងថា ខាងលោក បានធ្លាប់ចុះទៅត្រួតពិនិត្យមើលដែរ ដោយតម្រូវឱ្យក្រុមហ៊ុន ធ្វើផ្លូវខាងលើជីកកកាយជារបៀបលក្ខណ:បច្ចេកទេស ដោយមិនឱ្យប្រើប្រាស់ជារបៀបអនាធិបតេយ្យនោះឡើយ ។ លោកបន្តទៀតថា ខាងលោកមិនដឹងច្បាស់ថា តើក្រុមហ៊ុនត្រូវការយកភ្នំប៉ុន្មាន ដើម្បីជីកកកាយយកទៅចាក់ធ្វើផ្លូវនោះទេ ពោលគឺគិតតាមសភាពជាក់ស្តែង ៕
ចែករំលែកព័តមាននេះ