ខេត្តសៀមរាប ៖ មន្ត្រីរដ្ឋាករទឹកខេត្តសៀមរាបម្នាក់បានបើកបររថយន្តក្នុងស្ថានភាពស្រវឹងបោះពួយក្នុងល្បឿនលឿន ហើយឆ្លងផ្លូវជ្រុលទៅបុកម៉ូតូកង់បីឥណ្ឌាមួយគ្រឿង បណ្តាលឱ្យរបួសមនុស្សចំនួន២នាក់ ដោយបន្សល់ទុកស្លាកលេខរថយន្តនៅនឹងកន្លែង រួចបើកគេចខ្លួន តែសំណាងល្អ ប៉ូលិសតាមចាប់បានរថយន្តបង្កនិងមនុស្សមកវិញ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១១យប់ថ្ងៃទី១៤ ខែវិច្ឆិកា ឆ្នាំ២០២០ ស្ថិតនៅតាមផ្លូវជាតិលេខ៦ ស្ថិតក្នុងភូមិទឹកវិល សង្កាត់ទឹកវិល ក្រុងសៀមរាប ខេត្តសៀមរាប។
តាមប្រភពព័ត៌មានបានឱ្យដឹងថា ដោយមានការភិតភ័យ គ្រួសារជនបង្កបានយករថយន្តមកប្រគល់ឱ្យសមត្ថកិច្ច រួចក៏ត្រឡប់ទៅផ្ទះវិញ។
តាមប្រភពព័ត៌មានបានបន្តថា ជនបង្កឈ្មោះ ដឿយ ស៊ីដេត អាយុ៣១ឆ្នាំ ជាមន្ត្រីរដ្ឋាករទឹកខេត្តសៀមរាប មានទីលំនៅភូមិទឹកវិល សង្កាត់ទឹកវិល ក្រុងសៀមរាប។
តាមប្រភពព័ត៌មានបានបន្ថែមថា ភាគីខាងជនបង្កបានព្យាយាមសុំសម្របសម្រួលជា មួយជនរងគ្រោះ ដោយព្រមសងការខូចខាតជួយជុលម៉ូតូ និងជួយការព្យាបាលប្រេះឆ្អឹងជើងក្នុងតម្លៃ៥០០ដុល្លារ ។ គ្រានោះជនរងគ្រោះមិនយល់ព្រមតាមសំណូមពររបស់ជនបង្កនោះទេ ដោយបានស្នើឱ្យសមត្ថកិច្ចចាត់ការទៅតាមផ្លូវច្បាប់។
បើតាមការបំភ្លឺពីលោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាប បានឱ្យដឹងនៅថ្ងៃទី១៦ វិច្ឆិកា នេះថា បន្ទាប់ពីលោកទទួលបានព័ត៌មានករណីគ្រោះថ្នាក់ចរាចរណ៍នៅជិតសង្កាត់ទឹកវិល ហើយជនបង្ករត់គេចខ្លួន ។ គ្រានោះលោកក៏បានបញ្ជាកម្លាំងនគរបាលប៉ុស្តិ៍ទឹកវិលនិងកម្លាំងប្រជាការពារ ដេញតាមរក។ លោកបន្តថា ក្រោយមកជនបង្កបានយករថយន្តមកប្រគល់ឱ្យសមត្ថកិច្ចរួចក៏ត្រឡប់ទៅផ្ទះទាំងយប់វិញ ។ លោកបន្ថែមថា បន្ទាប់ពីទទួលបានរថយន្តបង្ក លោកក៏ប្រគល់ឱ្យនគរបាលចរាចរចាត់ការបន្តតាមផ្លូវច្បាប់ ។
ជុំវិញករណីខាងលើនេះដែរ លោកវរសេនីយ៍ឯក ជឹម សុវណ្ណ នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប មិនបានបំភ្លឺលម្អិតឱ្យភ្នាក់ងារកោះសន្តិភាពដឹងនៅឡើយទេ នាវេលាម៉ោង១និង២០នាទីរសៀលថ្ងៃទី១៦ ខែវិច្ឆិកា ឆ្នាំ២០២០ គ្រាន់ប្រាប់តាមតេឡេក្រាមថា កំពុងដោះស្រាយ ។ ដោយឡែកប្រជាពលរដ្ឋនៅក្នុងក្រុងសៀមរាបទន្ទឹងរង់ចាំមើលថា ពេលដល់ថ្ងៃកំណត់នេះ តើជនបង្កអាចចូលខ្លួនដោះស្រាយ សងសំណងដល់ជនរងគ្រោះតាមផ្លូវច្បាប់ដែរឬទេ ៕ (កែសម្រួលដោយ ៖ ធីតា)
ចែករំលែកព័តមាននេះ