ធនាគារកណ្តាលមីយ៉ាន់ម៉ា បានបង្ហាញក្រដាសប្រាក់ថ្មីតម្លៃ១០.០០០ Kyarts នឹង ចាប់ផ្តើមចរាចរនៅលើទីផ្សារចាប់ពីថ្ងៃទី១ កក្កដា ២០១៥តទៅ ។ ក្រដាសប្រាក់ថ្មីតម្លៃប្រហែល១០ដុល្លារនេះ គុណភាពក្រដាសស្វិត ផ្លាស់ប្តូរពណ៌តាមពន្លឺនិងការពារការក្លែងក្លាយ ។
ចំណុចនៃការកែលម្អថ្មី និងលេចធ្លោរួមមានតួលេខ១០.០០០ មានពណ៌បៃតងដោយជ្រុងក្រោមខាងស្តាំផ្នែកខាងក្រោយបោះពុម្ពរលោងចាំង ផ្លេកៗ និងប្តូរជាពណ៌ខៀវចាស់នៅពេលចាំងពន្លឺ ។ ក្រដាសប្រាក់ដែលមានលាយសារធាតុពិសេសទាំង២ផ្នែកអាចការពារស្នាមកោសឆូត ការពារសំណើមពីវត្ថុរាវ កម្ទេចដី ការពារក្បូរក្បាច់លើក្រដាសប្រាក់ និងពណ៌នៅមានលក្ខណៈប្រណីត ។ ចំណែកនៅខាងឆ្វេងដៃផ្នែកខាងមុខមានបោះពុម្ពជារូបផ្កាឈូកពីលើសាច់ក្រដាសប្រាក់អាចសម្លឹងឃើញបានទាំងសងខាង នៅពេលបង្វែរទៅតាមទិស។
នៅលើផ្ទៃក្រដាសប្រាក់ត្រង់ផ្នែកពណ៌ស្វាយក្រហម អាចប្តូរជាពណ៌បៃតងបាននៅពេលសម្លឹងក្នុងទិសផ្សេងពីគ្នា ។
ការចេញក្រដាសប្រាក់ថ្មីនេះមិនប៉ះពាល់ដល់ក្រដាសប្រាក់១០.០០០ Kyarts ចាស់ដែលបោះពុម្ពកាលពីថ្ងៃទី១៥ មិថុនា ២០១២ទេ ដោយនៅអាចចាយវាយបានជាប្រក្រតី ៕
ចែករំលែកព័តមាននេះ