AFP ផ្សាយថា ភ្នំភ្លើង Wolf ស្ថិតនៅលើប្រជុំកោះ Galapagos បានផ្ទុះជាលើកដំបូងក្នុងរយៈពេលជាង៣០ឆ្នាំ ដោយបញ្ចេញកំអែរសន្ធឹកសន្ធាប់កាលពីថ្ងៃទី២៥ ឧសភា ២០១៥។ ការផ្ទុះភ្នំភ្លើងនោះធ្វើឱ្យអ្នកជំនាញបារម្ភថា នឹងគំរាមកំហែងដល់សត្វដ៏កម្រមួយប្រភេទ គឺសត្វ Iguanas ដែលប្រទះឃើញតែនៅប្រជុំកោះ Galapage ។
ឧទ្យានជាតិក្នុងប្រជុំកោះ Galapagos បានប្រកាសអាសន្នតាមប្រព័ន្ធគេហទំព័រថា កោះអីុសាបេឡា (Isabela) គឺជាទីតាំងរបស់ភ្នំភ្លើង Wolf ជាទីជម្រករបស់សត្វ Conolopus Marthae ជាពពួកល្មូនពូជកម្រ ដែលប្រទះឃើញមានតែមួយហ្វូងគត់នៅលើពិភពលោក និងត្រូវបានស្គាល់ថាជាសត្វ «Iguanas» ពណ៌ស៊ីជម្ពូនៅប្រជុំកោះ Galapagos ។
សត្វ Iguanas ពណ៌ស៊ីជម្ពូបានរស់នៅរួមជាមួយ Iguanas ពណ៌លឿង និងអណ្តើកយក្សនៃកោះ Galapagos (Cholonoidis Becki) នៅបរិវេណខាងលិចឆៀងខាងជើងរបស់កោះធ្វើឱ្យមានក្តីសង្ឃឹមថា ពួកវានឹងមិនរងការប៉ះពាល់ទេ ។
លោកសានដ្រូ វា៉ហ្គា មន្ត្រីនាយកដ្ឋានធរណីវិទ្យានៃប្រទេសអេក្វាទ័រ និយាយថា «ការផ្ទុះបង្កឱ្យកើតជាផ្សែងក្នុងរយៈកម្ពស់ជាង១០គីឡូម៉ែត្រ និងអណ្តែតទៅភាគខាងលិចឆៀងខាងត្បូងរបស់ភ្នំភ្លើង ។ បច្ចុប្បន្ននៅមិនទាន់មានរបាយការណ៍ពីផលប៉ះពាល់ដល់ពលរដ្ឋនៅលើកោះ ដែលភាគច្រើនរស់នៅក្នុងភូមិព័រតូ វីឡាមីល (Peurto Villamil) ទេ ។
លោកវា៉ហ្គា បានប្រកាសអាសន្នថា ការបញ្ចេញកំអែររបស់ភ្នំភ្លើងនៅបន្តដំណើរការរយៈពេលជាច្រើនថ្ងៃ និងអាចមានកំអែរច្រើន ។
មន្ត្រីនៅក្នុងឧទ្យានបញ្ជាក់ថា ការផ្ទុះនោះនៅមិនទាន់បង្កគ្រោះថ្នាក់ដល់អ្នកទេសចរទេ គឺអាចធ្វើដំណើរចូលទៅទស្សនាភាពស្រស់ស្អាតរបស់ប្រជុំកោះបានជាប្រក្រតី ។
សត្វ Iguanas ពណ៌ស៊ីជម្ពូ និងលឿងត្រូវបានប្រទះឃើញនៅក្នុងឆ្នាំ១៩៨៦ និងអ្នកវិទ្យាសាស្ត្របានបែងចែកជាពពួកសត្វកម្រប្រឈមមុខនឹងការជិតផុតពូជ ។
សម្រាប់កោះ Isabela ជាកោះដ៏ធំមួយក្នុងប្រជុំកោះ Galapagos ត្រូវបានគេស្គាល់នៅទូទាំងពិភពលោក ក្រោយពីលោកឆាល ដាវីន បានទៅលេងនៅប្រជុំកោះនោះ នៅក្នុងឆ្នាំ១៨៣៥ និងស្រាវជ្រាវរហូតឈានដល់ការវិវឌ្ឍដល់ពេលបច្ចុប្បន្ន ៕
ចែករំលែកព័តមាននេះ