ព្រឹទ្ធសភាអាមេរិកកាលពីថ្ងៃទី២ មិថុនា បានអនុម័តការកែទម្រង់មួយដែលកាត់បន្ថយអំណាចរបស់ទីភ្នាក់ងារសន្តិសុខជាតិអាមេរិក NSA ពិសេសការប្រមូលបណ្តាទិន្នន័យទូរស័ព្ទ ដែលអនុញ្ញាតក្រោយការវាយប្រហារភេរវកម្មថ្ងៃទី១១ កញ្ញាមក ។
ការកែទម្រង់នោះមានឈ្មោះថា « USA FREEDOM ACT »មានទិសដៅកម្រិតកម្មវិធីរបស់ NSA ប្រមូលការលួចស្តាប់ការទាក់ទងគ្នាតាមទូរស័ព្ទ ។ អនុម័តរួចហើយដោយសភាច្បាប់នោះត្រូវចុះហត្ថលេខាដោយប្រធានាធិបតីលោកបារ៉ាក់ អូបាម៉ា ដែលក៏គាំទ្រច្បាប់នោះដែរ ។
ច្បាប់ថ្មីនោះគ្រោងផ្ទេរការស្តុកទិន្នន័យទាក់ទងតាមទូរស័ព្ទឱ្យដល់បណ្តាក្រុមហ៊ុនទូរគមនាគមន៍ ដើម្បីសម្រាលការភ័យខ្លាច លើការត្រួតពិនិត្យការទាក់ទងទូរស័ព្ទរបស់ពលរដ្ឋអាមេរិក ដោយរដ្ឋាភិបាល ។ ក្រោយច្បាប់នោះចូលជាធរមានអាជ្ញាធរអាចពិនិត្យទិន្នន័យទូរស័ព្ទដែលស្តុកទុកដោយបណ្តាក្រុមហ៊ុនទាល់តែមាននៅសម្រេចរបស់តុលាការ ។
ច្បាប់នោះគ្រោងម្យ៉ាងទៀតអនុញ្ញាតឱ្យ NSA តាមប្រមាញ់ជនសង្ស័យដែលចាត់ទុកថា «ចចកដាច់សង្វែង» ហើយឱ្យតាមដានការទាក់ទងទូរស័ព្ទរបស់ជនទាំងនោះ ។
ការលាតត្រដាងពីការលួចស្តាប់ទូរស័ព្ទពលរដ្ឋអាមេរិករបស់NSA ត្រូវបានធ្វើដោយអតីតអ្នកពិគ្រោះយោបល់របស់ទីភ្នាក់ងារនោះលោក EDWAR SNOWDEN កាលពីខែមិថុនា ឆ្នាំ២០១៣ ។
NSA បានផ្អាកទាំងស្រុងការលួចស្តាប់ទូរស័ព្ទចាប់តាំងពីថ្ងៃទី១ មិថុនាម៉ោង០និង១០នាទីមក ៕
ចែករំលែកព័តមាននេះ