ខេត្តកំពង់ចាម ៖ លោកមួង សារិន ព្រះរាជអាជ្ញារងអមសាលាដំបូងខេត្ត បានដឹកនាំកម្លាំងនគរបាលព្រហ្មទណ្ឌកំរិតស្រាលខេត្ត ចុះឆែកឆេរលំនៅឋានមួយស្ថិតនៅភូមិទី៤ សង្កាត់វាលវង់ ក្រុងកំពង់ចាម កាលពីវេលាម៉ោង២និង៣០នាទីរសៀល ថ្ងៃទី៧ មីនា ដែលលួចបើកលេងល្បែងស៊ីសងដោយខុសច្បាប់។ សមត្ថកិច្ចឃាត់មនុស្សចំនួន៨នាក់ បៀ និងអាប៉ោង ព្រមទាំងម៉ូតូចំនួន៤គ្រឿង បញ្ជូនទៅកាន់ស្នងការដ្ឋាននគរបាលខេត្ត។
លោកវរសេនីយ៍ឯក ជឹម សេងហុង ស្នងការរងនគរបាលខេត្ត ទទួលផែនកណ្តាលយុត្តិធម៌មានប្រសាសន៍ឱ្យកោះសន្តិភាពដឹងថា ក្រុមអ្នកលេងល្បែងទាំង៨នាក់ដែលត្រូវបានឃាត់ខ្លួននោះ ១-ឈ្មោះហេង សុខន ភេទប្រុស អាយុ៤៣ឆ្នាំ រស់នៅភូមិសួង សង្កាត់សួង ក្រុងសួង, ២-ឈ្មោះសុខ ខេង ភេទប្រុស អាយុ៥៣ឆ្នាំ រស់នៅភូមិវាលស្បូវ សង្កាត់សំបួរមាស ក្រុងកំពង់ចាម, ៣-ឈ្មោះជីន វន ភេទប្រុស អាយុ២៦ឆ្នាំ រស់នៅភូមិកំពង់ស្ពឺលើ ឃុំកំពង់រាប ស្រុកកោះសូទិន, ៤-ឈ្មោះអ៊ុង ប៊ុនណា ភេទប្រុស អាយុ៤៣ឆ្នាំ រស់នៅភូមិទី៤ សង្កាត់វាលវង់ ក្រុងកំពង់ចាម (ជាម្ចាស់ផ្ទះបើកល្បែង), ៥-ឈ្មោះហេង ឥទ្ធីរិទ្ធ ភេទប្រុស អាយុ៣៦ឆ្នាំ រស់នៅភូមិទី៣ សង្កាត់វាលវង់ ក្រុងកំពង់ចាម, ៦-ឈ្មោះខុន អូន ភេទប្រុស អាយុ៦៥ឆ្នាំ រស់នៅភូមិទី៣ សង្កាត់វាលវង់ ក្រុងកំពង់ចាម, ៧-ឈ្មោះហុង សន ភេទប្រុស អាយុ៤៥ឆ្នាំ រស់នៅភូមិទី៤ សង្កាត់វាលវង់ ក្រុងកំពង់ចាម និង៨-ឈ្មោះម៉ន ម៉ាប់ ភេទប្រុស អាយុ៥៤ឆ្នាំ រស់នៅភូមិគៀនជ្រៃ ឃុំគៀនជ្រៃ ស្រុកកំពង់សៀម។
លោកស្នងការរងបន្តថា មុនពេលបង្ក្រាបផ្ទះបើកល្បែងនេះប្រជាពលរដ្ឋរាយការណ៍មកកាន់រូបលោក។ ពេលទទួលព័ត៌មាននេះ រូបលោកបានចាត់កម្លាំងព្រហ្មទណ្ឌកំរិតស្រាលទៅបង្ក្រាបជាបន្ទាន់។ ក្នុងប្រតិបត្តិការនេះដឹកនាំដោយលោកព្រះរាជអាជ្ញារងអមសាលាដំបូងខេត្ត និងមន្ត្រីក្រឡាបញ្ជី ។ សមត្ថកិច្ចរឹបអូសបានម៉ូតូ៤គ្រឿង បៀ១ហ៊ូ ចានបាញ់អាប៉ោង១ ផ្តិលគ្របអាប៉ោង១ ហាន់តោ១ និងមេអាប៉ោង១។ លោកវរសេនីយ៍ឯក ជឹម សេងហុង បញ្ជាក់ថា ក្រៅពីម្ចាស់ផ្ទះ មនុស្ស៧នាក់ដែលត្រូវបានឃាត់ខ្លួននោះមានអ្នកខ្លះត្រូវបានអប់រំជាច្រើនលើកមកហើយ ទាក់ទិនទៅនឹងរឿងលេងល្បែងស៊ីសងបៀអាប៉ោង។ នាព្រឹកថ្ងៃទី៨ មីនា បុរសទាំង៨នាក់ ត្រូវបានបញ្ជូនទៅឱ្យលោកព្រះរាជអាជ្ញាអមសាលាដំបូងខេត្តដើម្បីពិន័យទៅតាមច្បាប់៕
ចែករំលែកព័តមាននេះ