រាជធានីភ្នំពេញ ៖ គ្រូបង្វឹកក្លិបភ្នំពេញក្រោនលោក ស៊ុំ វណ្ណា កាលពីថ្ងៃទី១៦ ខែវិច្ឆិកា ឆ្នាំ២០២០ បានសរសេរសារលើទំព័រហ្វេសប៊ុករបស់ខ្លួន ក្នុងចេតនាបង្ហាញពីការចែកផ្លូវគ្នាជាមួយក្លិបភ្នំពេញក្រោន ។ ពាក់ព័ន្ធបញ្ហានេះលោក កែវ សុខងន អ្នកចាត់ការក្រុមភ្នំពេញក្រោនទទួលស្គាល់ថា ក្លិបពិតជាមានគម្រោងចែកផ្លូវជាមួយគ្រូបង្វឹករូបនេះប្រាកដមែន ។
ទន្ទឹមគ្នានេះ ក្លិបភ្នំពេញក្រោនកំពុងពិចារណាលើសមាសភាពគ្រូបង្វឹកបរទេសចំនួន៤រូបដែលត្រូវមកជំនួសតំណែងលោក ស៊ុំ វណ្ណា។
គ្រូបង្វឹកបរទេសទាំង៤រូបនោះភាគច្រើនមកពីក្រៅប្រទេសរួមមាន កូរ៉េខាងត្បូង អ៊ុយក្រែន និងថៃជាដើម។
ក្រោយពីមានការលើកឡើងថា គ្រូបង្វឹកភ្នំពេញក្រោនលោក ស៊ុំ វណ្ណា បានលាលែងចេញពីតំណែង ស្រាប់តែក្លិបបាល់ទាត់ភ្នំពេញក្រោនប្រកាសលើគេហទំព័រផ្លូវការរបស់ខ្លួនថា ក្លិបមានកិត្តិយសសូមជម្រាបដល់សាធារណជនអ្នកគាំទ្រវិស័យបាល់ទាត់កម្ពុជាឲ្យបានជ្រាបថាក្លិបបានសម្រេចតែងតាំងលោក ស៊ុំ វណ្ណាដែលជាគ្រូក្រុមធំសព្វថ្ងៃនេះទៅជានាយកបច្ចេកទេសរបស់ក្លិប ។ លោកគ្រូ ស៊ុំ វណ្ណាបានចំណាយពេលជិត២រដូវកាលជាមួយក្លិបបាល់ទាត់ភ្នំពេញក្រោន ។
យើងមើលឃើញថា លោកគ្រូក៏ជាចំណែកមួយក្នុងការអភិវឌ្ឍធនធានកីឡាកររបស់យើង ដូច្នេះថ្នាក់ដឹកនាំក្លិបបានសម្រេចតែងតាំងលោកគ្រូជានាយកបច្ចេកទេស ដោយផ្តោតសំខាន់លើការអភិវឌ្ឍយុវជនថ្នាលទាំង៣កម្រិត (យុវជនអាយុក្រោម១៥ឆ្នាំ យុវជនអាយុក្រោម១៨ឆ្នាំ និងយុវជនអាយុក្រោម២១ឆ្នាំ) និងក្រុមនារីភ្នំពេញក្រោន ។ យើងសង្ឃឹមថា លោកគ្រូនឹងធ្វើការយ៉ាងសកម្មជាមួយក្រុមថ្នាលរបស់ក្លិបភ្នំពេញក្រោន ដើម្បីបណ្តុះបណ្តាលពួកគេឲ្យទទួលបានលទ្ធផលល្អសម្រាប់ក្លិប និងក្រុមជម្រើសជាតិកម្ពុជានាពេលអនាគតខាងមុខ។
គួររំលឹកថា លោក ស៊ុំ វណ្ណា ត្រូវបានតែងតាំងឲ្យធ្វើជាគ្រូជំនួយក្លិបភ្នំពេញក្រោន ដែលមានលោក Leonardo Vitorino ជាគ្រូបង្វឹកនៅថ្ងៃទី៩ ខែវិច្ឆិកា ឆ្នាំ២០១៨ ។
ក្រោយមក គ្រូបង្វឹកកម្រិត A-License រូបនេះ បានឡើងកាន់តំណែងជាគ្រូបង្វឹកបណ្តោះអាសន្នជំនួសគ្រូបង្វឹកសញ្ជាតិប្រេស៊ីលនៅថ្ងៃទី៩ ខែឧសភា ឆ្នាំ២០១៩ ។
ក្រោយដឹកនាំភ្នំពេញក្រោនឲ្យបញ្ចប់ចំណាត់ថ្នាក់លេខ៦ក្នុងក្របខណ្ឌមិត្តហ្វូនខេមបូឌានលីគឆ្នាំ២០១៩ គ្រូបង្វឹករៀនចប់បរិញ្ញាបត្រផ្នែកអប់រំកាយ និងកីឡានៅសាធារណរដ្ឋគុយបាឆ្នាំ២០១០រូបនេះ ត្រូវបានតែងតាំងជាគ្រូបង្វឹកក្លិបភ្នំពេញក្រោនពេញសិទ្ធិនៅថ្ងៃទី១៧ ខែមករា ឆ្នាំ២០២០ ។ ក្រោមការដឹកនាំរបស់លោក ភ្នំពេញក្រោនទទួលបានចំណាត់ថ្នាក់លេខ៣ក្នុងក្របខណ្ឌលីគកំពូល និងលេខ៤ក្នុងពានរង្វាន់សម្តេច ហ៊ុន សែន។
មុនមកចូលរួមជាមួយភ្នំពេញក្រោន បុរសរៀនចប់បរិញ្ញាបត្រជាន់ខ្ពស់ផ្នែកគ្រប់គ្រងធនធានមនុស្សនៅសាកលវិទ្យាល័យបញ្ញាសាស្ត្ររូបនេះ ធ្លាប់ដឹកនាំក្រុមបៀលប្រាយយូណាយ
ធីត ស៊ីម៉ាក់យូណាយធីត វេស្ទើនភ្នំពេញ និងក្រុមពាក់កណ្តាលអាជីពធីអិនកណ្តាល ៕
ចែករំលែកព័តមាននេះ