រាជធានីភ្នំពេញ ៖ ដំណើរការសាងសង់ពហុកីឡដ្ឋានជាតិមរតកតេជោនៅតែបន្តសកម្មភាពជាធម្មតា ដែលមកដល់ពេលនេះសម្រេចបានប្រមាណ៨៥ភាគរយហើយ ទោះបីប្រទេសកម្ពុជាទទួលរងឥទ្ធិពលពីការរាតត្បាតនៃជំងឺកូវីដ-១៩ ក៏ដោយ ។ ការបញ្ចប់ការសាងសង់ពហុកីឡដ្ឋានជាតិមរតកតេជោនេះ នឹងអូសបន្លាយរហូតដល់ខែឧសភា ឆ្នាំ២០២១ ខណៈដំបូងឡើយពហុកីឡដ្ឋាននេះ គ្រោងបញ្ចប់នៅចុងឆ្នាំ២០២០ ហើយត្រូវបានវាយតម្លៃលើកទីពីរថា នឹងបញ្ចប់នៅអំឡុងខែមីនា ឆ្នាំ២០២១។ នេះបើតាមការលើកឡើងរបស់លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអគ្គលេខាធិការគណៈកម្មាធិការរៀបចំការប្រកួតកីឡាស៊ីហ្គេមឆ្នាំ២០២៣។
លោក វ៉ាត់ ចំរើន ធ្លាប់អះអាងកន្លងមកថា ការពន្យារពេលក្នុងការបញ្ចប់ការសាងសង់ជាបន្តបន្ទាប់នេះ ដោយសារមានការរាំងស្ទះក្នុងការដឹកឧបករណ៍ និងសម្ភារផ្គត់ផ្គង់ឲ្យការសាងសង់ពីក្រៅប្រទេស បន្ទាប់ពីប្រទេសមួយចំនួនបានបិទព្រំដែនទឹក និងជើងហោះហើរ ដោយសារការរាតត្បាតនៃជំងឺកូវីដ-១៩។
បច្ចុប្បន្នពហុកីឡដ្ឋាននេះ បានបញ្ចប់ការសាងសង់គ្រោង១០០ភាគរយហើយ នៅឡើយតែបំពាក់គ្រឿងបរិក្ខារមួយចំនួនរួមមានកៅអី អំពូលភ្លើង ដំបូល អគារក្នុងកីឡដ្ឋាន និងការធ្វើទីលានខាងក្នុងប៉ុណ្ណោះ។
គួរបញ្ជាក់ថា ពហុកីឡដ្ឋានលំដាប់អន្តរជាតិមួយនេះ សាងសង់លើផ្ទៃដីទំហំជាង១៦ហិកតា ដោយគ្រោងចំណាយថវិកា១៥៨លានដុល្លារ ជាជំនួយឥតសំណងរបស់រដ្ឋាភិបាលចិន ។
កីឡដ្ឋាននេះ អាចផ្ទុកអ្នកទស្សនាបានប្រមាណ៦ម៉ឺននាក់ និងអាចជម្លៀសទស្សនិកជនត្រឹមរយៈពេល៧នាទីក្នុងករណីមានហេតុការណ៍មិនប្រក្រតីណាមួយកើតឡើង ។
សមិទ្ធផលទីពីរនៃពហុកីឡដ្ឋានជាតិមរតកតេជោនេះ បានបើកការដ្ឋានសាងសង់នៅថ្ងៃទី៤ មេសា ឆ្នាំ២០១៧ ក្រោមវត្តមានដ៏ខ្ពង់ខ្ពស់សម្តេចតេជោនាយករដ្ឋមន្ត្រី ហ៊ុន សែន ក្នុងអំឡុងពេលសម្ពោធដាក់ឲ្យប្រើប្រាស់សមិទ្ធផលដំណាក់កាលទី១ មានដូចជាមជ្ឈមណ្ឌលអាងហែលទឹក មជ្ឈមណ្ឌលកីឡាក្នុងសាល, ទីលានបាល់បោះនិងអគារស្នាក់នៅរបស់អត្តពលិក ។ ពហុកីឡដ្ឋាននេះសាងសង់ឡើងដើម្បីត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២នៅឆ្នាំ២០២៣ ៕
ចែករំលែកព័តមាននេះ