ខេត្តព្រះសីហនុ ៖ ប្រជានេសាទសមុទ្រចំនួនជាង៥០គ្រួសារមកប្រមូលផ្តុំគ្នានៅមុខសាលាខេត្ត ស្វែងរកការជួយអន្តរាគមន៍ ពីលោក គួច ចម្រើន អភិបាលខេត្តព្រះសីហនុ ខណៈពេលអធិការដ្ឋានរដ្ឋបាលជលផលសមុទ្រចាប់ឃាត់ទូកជំរិតទារប្រាក់ចំនួន៣លានរៀល ក្រោមលេសមិនបង់ពន្ធប្រចាំឆ្នាំ ..!
ប្រជានេសាទមានប្រុស-ស្រីជាង៥០គ្រួសារ មកពីចំណុចកំពង់ផែ ចំណតទូកនេសាទ (ទំនប់រលកចាស់ ) ស្ថិតក្នុងភូមិ០២ សង្កាត់លេខ០១ ក្រុង/ខេត្តព្រះសីហនុ កាលពីព្រឹកថ្ងៃទី១៧ ខែវិច្ឆិកា បានមកប្រមូលផ្តុំគ្នានៅខាងមុខសាលាខេត្ត ដើម្បីស្វែងរកការជួយអន្តរាគមន៍ពីលោក គួច ចម្រើន អភិបាលនៃគណៈអភិបាលខេត្តព្រះសីហនុ បន្ទាប់ពីក្រុមការងារមន្ត្រីអធិការរដ្ឋានរដ្ឋបាលជលផលសមុទ្រ បានចាប់បង្ខាំងម្ចាស់ទូកនិងកម្មករទូករបស់ពួកគាត់ដែលកំពុងនេសាទផលសមុទ្រ បង្ខំឲ្យបង់ប្រាក់ពិន័យចំនួន០៣លានរៀលហើយវេតាមវ៉ីង ក្រោមបទចោទប្រកាន់ថាម្ចាស់ទូកនេសាទមិនបានបង់ពន្ធប្រចាំឆ្នាំលើអាជីវកម្មរបស់ខ្លួន។
អ្នកស្រី តាំ សេងអាយ អាយុ៣៣ឆ្នាំ ជាប្រពន្ធពូ តេង ឈុនអ៊ី ត្រូវជាម្ចាស់ទូកនេសាទ ដែលត្រូវកម្លាំងមន្ត្រីអធិការដ្ឋានរដ្ឋបាលជលផលសមុទ្រ បានចាប់បង្ខាំងទូកនិងកម្មករទូកចំនួន០២នាក់ផ្សេងទៀត បានរៀបរាប់ទាំងក្តុកក្តួលថា បន្ទាប់ពីចេញនេសាទផលសមុទ្រនៅខាងក្រៅ ហើយវិលត្រឡប់យកផលសមុទ្រយកមកលក់នៅចំណតផែទូក ពេលបើកបរទូកមកដល់ចំណុចក្បែរកោះដែកគោលក៍ត្រូវបានកប៉ាល់កម្លាំងអធិការដ្ឋាន រដ្ឋបាលជលផលសមុទ្រ ស្ទាក់ចាប់បង្ខំឲ្យបង់ប្រាក់ចំនួន០៣លានរៀល ក្រោមបទចោទប្រកាន់ថាម្ចាស់ទូកមិនបានបង់ពន្ធលើមធ្យាបាយនេសាទប្រចាំឆ្នាំ។
ប្រភពខាងលើបានបន្តឲ្យដឹងទៀតថា បើទោះបីជាគាត់ខំពន្យល់ពីបញ្ហាប្រឈមលើមុខរបរនេសាទជួបប្រទះការលំបាក ផលនេសាទធ្លាក់ចុះយ៉ាងណាក៍ដោយក៍មន្ត្រីអធិការដ្ឋាន ជលផលសមុទ្រមិនអត់ឱនឲ្យនិងបានបង្ខំឲ្យបង់ប្រាក់វេតាមវ៉ីង ថែមទាំងបានសំឡុតគម្រាមថាបើនៅតែរឹងទទឹងនិងកសាងសំណុំរឿងបញ្ជូនទៅសាលាតំបូងខេត្តថែមទៀតផង។
ប្រជានេសាទដែលបានចូលរួមនៅក្នុងការប្រមូលផ្តុំគ្នានៅខាងមុខសាលាខេត្តព្រះសីហនុ បានឲ្យដឹងដូចៗគ្នាថា ជារៀងរាល់ខែ ដើម្បីចេញទៅនេសាទបានលុះត្រាតែម្ចាស់ទូកបង់ប្រាក់វេ(តាមវ៉ីង)ចាប់ពី១៥០ រហូតដល់៣០០ ដុល្លា ជារៀងរាល់ខែឲ្យទៅមន្ត្រីអធិការដ្ឋានជលផលសមុទ្រ ទើបនេសាទមិនមានការរំខានដោយមន្ត្រីខាងលើនេះ។
ជាក់ស្តែងដូចហេតុការចាប់ឃាត់បង្ខាំងទូកជនរងគ្រោះខាងលើនេះ មន្ត្រីអធិការដ្ឋានជលផលសមុទ្របានបង្ខំឲ្យបង់ប្រាក់វេរតាមវីង តាំងពី០៣លានរៀល ចុះមក១លានរៀល រហូតមកនៅសល់ត្រឹម៣០ម៉ឺនរៀល ។ ក្រោយពេលបែកធ្លាយថា ប្រជានេសាទបាននាំគ្នាមកប្រមូលផ្តុំខាងមុខសាលាខេត្ត ស្វែងរកការអន្តរាគមន៍ពីលោកអភិបាលខេត្តនិងបន្តដំណើរទៅប្រមូលផ្តុំនៅខាងមុខស្នាក់ការអធិការដ្ឋានរដ្ឋបាលជលផលសមុទ្រនៅក្នុងទីតាំងមជ្ឈមណ្ឌលស្រាវជ្រាវនិងអភិវឌ្ឍវ៉ារីវប្បកម្មសមុទ្រ នៅចំណុច( ទំនប់រលក) ចាស់ ក្នុងគោលបំណងរបស់ពួកគាត់ដើម្បីស្នើរសុំឲ្យបានដោះលែងម្ចាស់ទូកនិងកម្មករដែលត្រូវបានឃាត់និងបង្ខាំងទុកនៅលើទូកអស់រយៈពេលជាច្រើនម៉ោង។
ប្រភពពីប្រជានេសាទបានបន្តឲ្យដឹងទៀតថា បន្ទាប់ពីការប្រមូលផ្តុំនិងបែកធ្លាយហេតុការខាងលើនេះមន្ត្រីអធិការដ្ឋានរដ្ឋបាលជលផលនៅលើកប៉ាល់ដែលបានធ្វើការឃាត់ទូកនិងបង្ខាំងម្ចាស់ទូករួមទាំងកម្មករក៍បានដោះលែងទូកនេសាទខាងលើឲ្យយកផលនេសាទយកមកលក់ដោយគ្រាន់តែធ្វើកំណត់ហេតុ ដើម្បីឲ្យម្ចាស់ទូកចូលខ្លួនទៅបង់ពន្ធប្រចាំឆ្នាំលើមធ្យោបាយនេសាទតែប៉ុណ្ណោះ។ ប្រជានេសាទបានមានប្រសាសន៍ឲ្យដឹងដូចៗគ្នាថា ពួកគាត់សំណូមពរ បើឲ្យប្រជានេសាទចូលទៅបង់ពន្ធប្រចាំឆ្នាំសុំឲ្យមានការផ្សព្វផ្សាយដល់ប្រជានេសាទឲ្យបានទូរលំទូលាយ ដូចជាការបិតខិតបណ្ណ័នៅតាមកពង់ផែចំណតទូកជាដើម។ល។
ដើម្បីម្ចាស់ទូកបានចូលទៅបង់ពន្ធជូនរដ្ឋបានត្រឹមត្រូវ មានវិក្កបត្រ និងគលបញ្ជីត្រឹមត្រូវមិនមែនចុះទៅចាប់ទូកកំពុងតែនេសាទ ហើយឲ្យវេប្រាក់តាមវ៉ីងដោយមិនមានវិកយ័យបត្រពីមន្ត្រីជំនាញនិងថ្នាក់ដឹកនាំ ដែលពួកគាត់បានចាត់ទុកសកម្មភាពខាងលើ គឺជាសកម្មភាព( កន្ទេលធំ បន្លំដេក របស់មន្ត្រីខិលខូចតែប៉ុណ្ណោះ ) ។ប្រជានេសាទខាងលើបានសំណូមពរ លោកអភិបាលខេត្តព្រះសីហនុ ក៍ដូចជាការសំណូមពរយ៉ាងទទូចដល់រដ្ឋមន្ត្រី ក្រសួងកសិកម្មរុក្ខាប្រមាញ់និងនេសាទ មេត្តាជួយអន្តរាគមន៍និងពិនិត្យមើលឡើងវិញចំពោះ លោក ពុំ ស៊ីថា ប្រធានអធិការដ្ឋានរដ្ឋបាលសមុទ្រ ដែលកន្លងមកតែងតែបណ្តែតបណ្តោយឲ្យកូនចៅក្រោមឱវាទចុះធ្វើសកម្មភាពដូចពួកគាត់បានរៀបរាប់ខាងលើនេះ។
ដោយឡែក លោក ឃាង ភារម្យ អ្នកនាំពាក្យសាលាខេត្តព្រះសីហនុបានឲ្យដឹងតាមទូរសព្ទថា ជុំវិញបញ្ហាខាងលើ លោកមិនទាន់ទទួលបានរបាយការណ៍ពី មន្ត្រីជំនាញនៅឡើយទេ លោកនិងទុកពេលឲ្យមន្ត្រីជំនាញធ្វើការសិនរួចធ្វើរបាយការណ៍មកសាលាខេត្តលោកនិងផ្តល់ព័ត៏មានជាកយលាក់នៅពេលក្រោយ។ ដោយឡែក លោក ពុំ ស៊ីថាប្រធានអធិការដ្ឋានរដ្ឋបាលសមុទ្រមិនអាច ស្វែងរកប្រភពផ្តល់ព័ត៏មានបានទេ មន្ត្រីប្រចាំការបានបញ្ជាក់ថាលោក ជាប់រវល់បេសកកម្ម !
ចែករំលែកព័តមាននេះ