រាជធានីភ្នំពេញ ៖ រថយន្តឡិចស៊ីសមួយគ្រឿងត្រូវម្ចាស់វាបញ្ជាបោលបុកហាងលក់រថយន្តមួយកន្លែងបង្កឱ្យមានការភ្ញាក់ផ្អើលយ៉ាងខ្លាំង ហើយអ្នកដែលកំពុងតែដេកក្នុងផ្ទះភ័យព្រលឹងចុងសក់ឥតឧបមា ។ រថយន្តម៉ាកឡិចស៊ីសនេះស៊េរី RX300 ពណ៌ស្ករ ពាក់ស្លាកលេខ ភ្នំពេញ 2M-1827 ត្រូវគេអះអាងថា អ្នកបើកបរស្រវឹងធ្លាក់ភ្នែក បានបើកចាក់កួរលើផ្លូវមុខទីស្តីការគណៈរដ្ឋមន្ត្រី ហើយជ្រុលទៅបុកចិញ្ចើមសួនច្បារ រួចឆ្លងមហាវិថីសហព័ន្ធរុស្ស៊ី ឡើងចិញ្ចឹមផ្លូវបោលបុករបងដែកឃ្លាំងលក់រថយន្តទីតាំងលេខ១អា ស្ថិតក្នុងសង្កាត់ស្រះចក ខណ្ឌដូនពេញ កាលពីវេលាម៉ោង១២និង៤០នាទី រំលងអធ្រាត្រឈានចូលថ្ងៃទី១ មីនា ២០១១ ។ គ្រោះថ្នាក់ចរាចរណ៍ខាងលើនេះមិនមានមនុស្សណាម្នាក់ស្លាប់ ឬរងរបួសនោះទេ តែខូចខាតរបងដែក ជញ្ជាំងថ្ម អស់ជាច្រើនម៉ែត្រ និងរថយន្តចំនួន៤គ្រឿង ។
សមត្ថកិច្ចមូលដ្ឋានបានឱ្យដឹងថា មុនពេលកើតហេតុគេឃើញរថយន្តខាងលើបានបើកលើកំណាត់ផ្លូវមុខទីស្តីការគណៈរដ្ឋមន្ត្រីស្ថិតក្នុងសង្កាត់មិត្តភាព ខណ្ឌ៧មករា ឆ្ពោះទៅទិសខាងកើត លុះដល់ផ្លូវបំបែកក៏ចាក់កួរបត់ឆ្វេង ហើយជ្រុលទៅបុកចិញ្ចើមសួនច្បារលាន់គ្រាំងធ្វើឱ្យភ្ញាក់ផ្អើលដល់នគរបាលយាមទីស្តីការគណៈរដ្ឋមន្ត្រី ។ រថយន្តមិននោះបានឈប់ទេ គឺបែរជាបន្ថែមល្បឿនបើកឆ្លងកាត់មហាវិថីសហព័ន្ធរុស្ស៊ី ក៏ជ្រុលចង្កូតឡើងចិញ្ចើមផ្លូវបង្ហួសទៅបុករបងដែកឃ្លាំងលក់រថយន្តទីតាំងខាងលើដាច់សោរួចបន្តទៅបុករថយន្តតាកូម៉ាពីរគ្រឿង និងកាមរីបាឡែនមួយគ្រឿង បណ្តាលឱ្យខូចខាតផ្នែកខាងមុខធ្ងន់ធ្ងរ…ចំណែកមនុស្សនៅក្នុងឃ្លាំងស្ទុះក្រោកទាំងមមិងមមាំងព្រលឹងចុងសក់ ។ ពិតជាសំណាងផងដែរ ដែលក្នុងគ្រោះថ្នាក់នេះមិនមានមនុស្សណាម្នាក់ស្លាប់ ឬរងរបួស គ្រាន់តែខូចខាតរថយន្តក្នុងឃ្លាំងបីគ្រឿងនិងរថយន្តបង្ក១គ្រឿង របងដែក និងជញ្ជាំងថ្មជាច្រើនម៉ែត្រប៉ុណ្ណោះ ។ ចំណែកអត្តសញ្ញាណ និងទីកន្លែងស្នាក់នៅរបស់ភាគីម្ចាស់រថយន្តបង្កមិនត្រូវបានគេស្គាល់នោះ ទេ ។
សមត្ថកិច្ចបានបញ្ជាក់ថា ភាគីម្ចាស់រថយន្តបង្កបានយល់ព្រមចេញសំណងការខូចខាតទៅឱ្យម្ចាស់ហាងលក់រថយន្តខាងលើ ប៉ុន្តែមិនអាចដោះស្រាយបានដោយរថយន្តនោះធ្វើឱ្យខូចខាតចិញ្ចើមសួនច្បារដូច្នេះទើបត្រូវស្ទូចរថយន្តយកទៅរក្សាទុកនៅការិយាល័យនគរបាលចរាចរណ៍នៃស្នងការដ្ឋាននគរបាលរាជធានីភ្នំពេញ៕
ចែករំលែកព័តមាននេះ