សារព័ត៌មានដឹអីុនដេផេនដេន របស់អង់គ្លេស ផ្សាយថា លោកចៅក្រមមៃឃើល ស៊ីកខូណេតប៊ីនៃតុលាការក្រុងផេនវីល រដ្ឋអូហាយយូ សហរដ្ឋអាមេរិក បានសម្រេចកាលពីថ្ងៃទី២៩ ឧសភា ២០១៥
សារព័ត៌មានដឹអីុនដេផេនដេន របស់អង់គ្លេស ផ្សាយថា លោកចៅក្រមមៃឃើល ស៊ីកខូណេតប៊ីនៃតុលាការក្រុងផេនវីល រដ្ឋអូហាយយូ សហរដ្ឋអាមេរិក បានសម្រេចកាលពីថ្ងៃទី២៩ ឧសភា ២០១៥ ឱ្យនាងវិចតូរីយ៉ា បាខុម ជ្រើសរើសរវាងជាប់គុករយៈពេល៦០ថ្ងៃ និងដើរចម្ងាយផ្លូវប្រវែង៤៨គីឡូម៉ែត្រក្នុងរយៈពេល៤៨ម៉ោង ជារយៈចម្ងាយដែលនាងជិះតាក់ស៊ី មិនបង់ប្រាក់ ។
នាងបាខុម និងមិត្តភក្តិបានទូរស័ព្ទហៅតាក់ស៊ី ក្រោយពីចូលកម្សាន្តក្នុងរង្គសាលមួយនៅក្រុងគ្លីហ្វលែន ដើម្បីជិះត្រឡប់ទៅផ្ទះនៅក្រុងផេនវីល មានចម្ងាយ៤៨គីឡូម៉ែត្រ ។ នៅពេលទៅដល់ផ្ទះរបស់នាងបាខុមហើយ នាងនិងមិត្តភក្តិម្នាក់ទៀតចេញពីរថយន្តដោយយល់ថាមិត្តភក្តិ២នាក់ទៀតនៅក្នុងរថយន្តដែលជិះបន្តនឹងបង់ប្រាក់។ ដោយសារមិត្តភក្តិ២នាក់នោះមិនបង់ប្រាក់ជំនួសនាងបាខុម អ្នកបើកបរក៏ប្តឹងប៉ូលិស ។
លោកចៅក្រមបញ្ជាក់ថា នឹងប្រើប្រព័ន្ធ GPS ត្រួតពិនិត្យពីសកម្មភាពរបស់នាងបាខុមថា ដើរគ្រប់តាមកំណត់ ឬអត់ ? ឬណែនាំឱ្យដើរនៅជុំវិញឧទ្យាន ឡេកខោនប៊ី ហ្វែកហ្គ្រោន ប្រហែល៤០ដុំ ។ លោកចៅក្រមស៊ីកខូណេតប៊ី និយាយថា វាជាការដាក់ទោសដ៏សមរម្យ ប៉ុន្តែជាវិធីសាស្ត្រចម្លែកមួយ ។ កាលពីឆ្នាំ២០១២ លោកធ្លាប់កាត់ក្តីឱ្យបុរសម្នាក់ដែលមើលងាយកម្មករចិញ្ចឹមជ្រូកដោយហៅគេថា «អាជ្រូក» ឱ្យទៅឈរលើដងផ្លូវជិតជ្រូកធំមួយក្បាល និងមានស្លាកសរសេរថា «យើងមិនមែនជាប៉ូលិសទេ » ៕
ចែករំលែកព័តមាននេះ