រាជធានីភ្នំពេញ ៖ ការប្រកួតបាល់ទាត់ដណ្តើមពានរង្វាន់ខ្មែររៀលអីុស្ទេតលើកទី៤ ប្រចាំឆ្នាំ២០១៥ មកដល់ពេលនេះគេបានរកឃើញក្រុមមួយចំនួនត្រៀមខ្លួនឡើងទៅប្រកួតនៅវគ្គជម្រុះ៨
រាជធានីភ្នំពេញ ៖ ការប្រកួតបាល់ទាត់ដណ្តើមពានរង្វាន់ខ្មែររៀលអីុស្ទេតលើកទី៤ ប្រចាំឆ្នាំ២០១៥ មកដល់ពេលនេះគេបានរកឃើញក្រុមមួយចំនួនត្រៀមខ្លួនឡើងទៅប្រកួតនៅវគ្គជម្រុះ៨ក្រុមចុងក្រោយហើយ ដោយនៅសល់តែមួយសប្តាហ៍ទៀតប៉ុណ្ណោះនឹងត្រូវបញ្ចប់វគ្គប្រកួតជម្រុះក្នុងពូលអស់ហើយ ។
សម្រាប់ពូលA បន្ទាប់ពីឆ្លងកាត់ការប្រកួតកាលពីថ្ងៃអាទិត្យ ទី៣១ ឧសភា កន្លងមកនេះ គេបានរកឃើញក្រុមចំនួន៤ ឆ្លងផុតពីវគ្គប្រកួតជម្រុះក្នុងពូលត្រៀមឡើងទៅប្រកួតនៅវគ្គជម្រុះ៨ក្រុមចុងក្រោយជាបន្តទៀត ។ ក្រុម Khmer United FC ដែលជាក្រុមខ្លាំងមួយប្រចាំពូលបានលេងចាញ់ក្រុម Christinair នៅក្នុងលទ្ធផល៣-២ ប៉ុន្តែក្រុម២នេះសុទ្ធតែមានឱកាសឡើងទៅប្រកួតនៅវគ្គជម្រុះ៨ក្រុមចុងក្រោយដោយមាន១៦ពិន្ទុដូចគ្នា ។ ចំណែកក្រុម២ទៀតនោះ គឺជាក្រុមខ័ណ្ឌពោធិសែនជ័យ និងក្រុម HPL FC ។ ក្រុមខ័ណ្ឌពោធិសែនជ័យ បានយកឈ្នះលើក្រុមបាសាក់៦-២ មាន១៧ពិន្ទុ ឈរនៅក្នុងចំណាត់ថ្នាក់លេខ១ ក្នុងពូល រីឯក្រុម HPL FC ប្រកួតឈ្នះក្រុម Canteen FC ៥-២ មាន១៦ពិន្ទុ ។ ចំណែកក្រុម TyGi FC បានយកឈ្នះក្រុម Union FC ៣-០ ខណៈក្រុម Amru FC បានលត់ក្រុមព្រៃសិលានៅក្នុងលទ្ធផល៨-៣។ បុ៉ន្តែ៤ក្រុមចុងក្រោយនេះប្រកួតគ្នាគ្រាន់តែធ្វើឡើងដើម្បីបង្គ្រប់កិច្ចប៉ុណ្ណោះ ។
ដោយឡែកពូលB វិញ គេបានរកឃើញក្រុមចំនួន៣ ដែលត្រូវឡើងទៅប្រកួតនៅវគ្គបន្តនោះ គឺក្រុម RFL FC, ក្រុម Narita FC និងក្រុម Anvaya Keila FC ។ ក្រុម RFL FC មាន២១ពិន្ទុ បន្ទាប់ពីយកឈ្នះលើក្រុម Narita FC ៤-២ ធ្វើឱ្យក្រុម Narita FC មាន១៩ពិន្ទុ។ ចំណែកក្រុម Anvaya Keila FC មាន១៨ពិន្ទុ បន្ទាប់ពីយកឈ្នះលើក្រុម V Train FC ៤-២ ។
រីឯក្រុម V Train FC ដែលមាន១៣ពិន្ទុនៅក្នុងដៃ និងក្រុម Y FC ដែលមាន១២ពិន្ទុនោះបានក្លាយជាគូប្រជែងក្នុងការស្វែងរកកៅអី១ ដែលនៅសល់ប្រចាំពូល ហើយលទ្ធផលនេះនឹងបង្ហាញច្បាស់តាមរយៈការប្រកួតមួយលើកចុងក្រោយនៅសប្តាហ៍ក្រោយនេះ ៕
ចែករំលែកព័តមាននេះ