រាជធានីភ្នំពេញ ៖ ជនសង្ស័យចំនួន៧នាក់ត្រូវបានចាប់ខ្លួនបន្តបន្ទាប់ពីបទជួញដូរគ្រឿងញៀននៅខណ្ឌប្ញស្សីកែវ និងខណ្ឌទួលគោក ក្នុងរវាងថ្ងៃទី៤ និងទី៥ មីនា ហើយក៏បានដកហូតម៉ាទឹកកកបានចំនួន៣៩កញ្ចប់ផងដែរ។
ទាក់ទិននឹងការចាប់ខ្លួននេះ គឺជនសង្ស័យ៣នាក់ត្រូវកងរាជអាវុធហត្ថខណ្ឌទួលគោក សហការជាមួយកម្លាំងការិយាល័យគ្រឿងញៀននៃកងរាជអាវុធហត្ថរាជធានីភ្នំពេញ ឃាត់ខ្លួនកាលពីវេលាម៉ោង១២និង៣០នាទីថ្ងៃត្រង់ ថ្ងៃទី៤ មីនា និងដកហូតបានគ្រឿងញៀនប្រភេទម៉ាទឹកកកចំនួន២៤កញ្ចប់ ដែលក្នុងនោះមាន២៣កញ្ចប់តូច និង១កញ្ចប់ធំ។
ជនសង្ស័យដែលត្រូវចាប់ខ្លួន ១-ឈ្មោះញឹក រិន ភេទស្រី អាយុ៤៦ឆ្នាំ ជាអ្នករើសអេតចាយ, ២-ឈ្មោះហ៊ាន ឈឿន ភេទប្រុស អាយុ៤៦ឆ្នាំ ជាអ្នករើសអេតចាយ។ អ្នកទាំង២នាក់ជាប្តីប្រពន្ធ មានទីលំនៅផ្ទះជួលក្រុមទី១១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ, ៣-ឈ្មោះញ៉ែម ចំរ៉ុង ភេទស្រី អាយុ២០ឆ្នាំ ជាកម្មការិនី មានទីលំនៅផ្ទះជួលនៅភូមិព្រៃទា សង្កាត់កាកាប ខណ្ឌដង្កោ រាជធានីភ្នំពេញ។ នៅក្នុងការឃាត់ខ្លួននោះសមត្ថកិច្ចដកហូតបានថ្នាំញៀនប្រភេទម៉ាទឹកកកចំនួន១៥កញ្ចប់តូច។
មន្ត្រីកងរាជអាវុធហត្ថខណ្ឌទួលគោកឱ្យដឹងថា បន្ទាប់ពីឃាត់ខ្លួនស្ត្រីជាប្រពន្ធ សមត្ថកិច្ចបានទៅសហការជាមួយការិយាល័យគ្រឿងញៀនកងរាជអាវុធហត្ថរាជធានីភ្នំពេញ ឈានទៅឆែកឆេរលំនៅឋាននៅចំណុចផ្ទះជួលក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ នៅបន្ទប់ផ្ទះជួលលេខ១៦១F ក្រុមទី១៥ ភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ និងឃាត់ខ្លួនបានអ្នកជួញដូរ៤នាក់ទៀតកាលពីវេលាម៉ោង១១ព្រឹក ថ្ងៃទី៥ មីនា ២០១១ ហើយដកហូតបានថ្នាំញៀនប្រភេទម៉ាទឹកកក១៥កញ្ចប់ ដែលក្នុងនោះមាន១៤កញ្ចប់តូច និង១កញ្ចប់ធំ។
ជនសង្ស័យដែលត្រូវចាប់ខ្លួនសមត្ថកិច្ចឱ្យដឹងថា ១-ឈ្មោះអ៊ិន ស្រ៊ុន ហៅដេក ភេទប្រុស អាយុ២៣ឆ្នាំ, ២-ឈ្មោះអ៊ិន សុទ្ធារី ហៅសិដ្ឋ ភេទប្រុស អាយុ១៨ឆ្នាំ ជាសិស្ស, ៣-ឈ្មោះអ៊ិន ទេព ហៅសយ ភេទប្រុស អាយុ១៨ឆ្នាំ ជាសិស្ស និង៤-ឈ្មោះអ៊ិន ចាន់ថុល ភេទស្រី អាយុ៤២ឆ្នាំ អ្នកទាំង៤នាក់ត្រូវជាបងប្អូន និងម្តាយមីង មានទីលំនៅផ្ទះជួលលេខ១៦១F ដែលជាផ្ទះត្រូវឃាត់ខ្លួនខាងលើ៕
ចែករំលែកព័តមាននេះ