រាជធានីភ្នំពេញ ៖ គិតត្រឹមថ្ងៃទី១៦ខែវិច្ឆិកា ឆ្នាំ២០២០ កម្ពុជានៅសល់ត្រឹមតែ៩០០ថ្ងៃគត់ ក្នុងការរៀបចំខ្លួនធ្វើជាម្ចាស់ផ្ទះប្រកួតកីឡាស៊ីហ្គេមលើកទី៣២ឆ្នាំ២០២៣ ។ នេះបើតាមការឱ្យដឹងពីលោកវ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣(CAMSOC) កាលពីព្រឹកថ្ងៃទី១៦ វិច្ឆិកា ។
លោក វ៉ាត់ ចំរើន បានមានប្រសាសន៍ថា នេះគឺជាពេលវេលាមួយដ៏សំខាន់ដើម្បីក្រើនរំលឹកទៅដល់កីឡាករ-កីឡាការិនី គ្រូបង្វឹក ព្រមទាំងសហព័ន្ធកីឡាជាតិទាំងអស់ ក្នុងការពង្រឹងសមត្ថភាពត្រៀមដណ្ដើមយកឧត្តមភាព និងជ័យជម្នះមកជូនជាតិ ។ រីឯគណៈកម្មាធិការជាតិរៀបចំការប្រកួតកីឡាស៊ីហ្គេម ក្រោមការដឹកនាំដោយសម្ដេចពិជ័យសេនាទៀ បាញ់ និងលោកបណ្ឌិត ថោង ខុន បានដំណើរការទៅយ៉ាងរលូន ហើយក៏បានជំរុញទៅដល់គណៈកម្មការជំនាញនីមួយៗធ្វើការងាររបស់ខ្លួនឱ្យបានរលូន និងការទទួលខុសត្រូវខ្ពស់ផងដែរ ។
អគ្គលេខាធិការCAMSOCរូបនេះក៏បានថ្លែងសារនៅក្នុងឱកាសដ៏មានសារៈសំខាន់មួយនេះ ដើម្បីអំពាវនាវទៅដល់កីឡាករ កីឡាការិនី គ្រូបង្វឹកជាពិសេសសហព័ន្ធកីឡាជាតិ ឱ្យខិតខំប្រឹងប្រែងក្នុងការរៀបចំត្រៀមលក្ខណៈឱ្យកាន់តែមុតស្រួច និងយកចិត្តទុកដាក់ខ្ពស់លើការហ្វឹកហាត់ ជំរុញនិងការតាមដានត្រួតពិនិត្យវាយតម្លៃជាប់ជានិច្ច ចំពោះបច្ចេកទេស និងគុណផលកីឡាករ កីឡាការិនីយើង កុំឱ្យមានការធ្វេសប្រហែស ពីព្រោះការប្រកួតកីឡាស៊ីហ្គេមឆ្នាំ២០២៣ជិតមកដល់ហើយ ។
ជាមួយគ្នានេះ លោក វ៉ាត់ ចំរើន បានអំពាវនាវដល់មហាជន អាជ្ញាធរគ្រប់ជាន់ថ្នាក់ សូមចូលរួមគាំទ្រឱ្យបានរួសរាន់ឡើង ព្រោះអីយើងនៅសល់តែ៩០០ថ្ងៃទៀតប៉ុណ្ណោះ ការប្រកួតកីឡាស៊ីហ្គេមនឹងមកដល់ហើយ ។
លោកបន្តថា ក្នុងនាមជាម្ចាស់ផ្ទះរៀបចំកីឡាស៊ីហ្គេមត្រូវមានសេចក្ដីថ្លៃថ្នូរ រៀបចំឱ្យបានស្អាត បរិស្ថានល្អ ដោយគោរពទៅតាមអនុសាសន៍ណែនាំដ៏ខ្ពង់ខ្ពស់របស់សម្ដេចពិជ័យសេនាទៀ បាញ់ និងលោកបណ្ឌិត ថោង ខុន លើកយុទ្ធនាការអប់រំសង្គម ប្រជាជនម្នាក់លេងកីឡាមួយមុខ យុទ្ធនាការកម្ពុជាស្អាត កម្ពុជាបៃតងនិងបដិសណ្ឋារកិច្ចល្អ ព្រមទាំងយុទ្ធនាការកាត់បន្ថយក៏ដូចជាលុបបំបាត់គ្រឿងញៀននិងគ្រោះថ្នាក់ចរាចរណ៍ជាដើម ។
ដូច្នេះសូមអំពាវនាវទៅដល់ប្រជាពលរដ្ឋទាំងអស់ត្រូវយកស្មារតី៩០០ថ្ងៃនៃដំណើរឆ្ពោះទៅការប្រកួតកីឡាស៊ីហ្គេម និងអាស៊ានប៉ារ៉ាហ្គេម ក្លាយទៅជាឆន្ទះដ៏មោះមុត ផ្ដុំកម្លាំងគ្នាដើម្បីសម្រេចឱ្យបានគ្រប់ភារកិច្ចនិងជ័យជម្នះ បើទោះបីពេលនេះជំងឺកូវីដ-១៩នៅមិនទាន់ថយចុះក៏ដោយ យើងត្រូវអនុវត្តតាមវិធានការណែនាំរបស់ក្រសួងសុខាភិបាល ក្នុងការទប់ស្កាត់ទាំងអស់គ្នា ធ្វើដំណើរយ៉ាងស្វាហាប់ ស្វែងរកឧត្តមភាព និងជោគជ័យនៅស៊ីហ្គេមឆ្នាំ២០២៣។
លោក វ៉ាត់ ចំរើន បានបញ្ជាក់ថា ការប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជានឹងប្រារព្វធ្វើឡើងចាប់ពីថ្ងៃទី៥ ឧសភានិងប្រារព្វពិធីបិទនៅថ្ងៃទី១៧ ខែឧសភា ឆ្នាំ២០២៣ ។ ចំណែកការប្រកួតកីឡាជនពិការប្រចាំតំបន់ដ៏ធំមួយទៀតគឺការប្រកួតកីឡាអាស៊ានប៉ារ៉ាហ្គេមលើកទី១២ នឹងចាប់ផ្ដើមពីថ្ងៃទី១-១០មិថុនា ឆ្នាំ២០២៣ ៕
ចែករំលែកព័តមាននេះ