ខេត្តកណ្តាល ៖ នៅព្រឹកថ្ងៃទី៣១ ឧសភា ២០១៥ ប្រតិភូសាខាកាកបាទក្រហមកម្ពុជាខេត្ត ដឹកនាំដោយលោក ម៉ៅ ភិរុណ ប្រធានកិត្តិយសសាខា លោក ជាវ តាយ ប្រធានគណៈកម្មធិការសាខា រួមទាំងលោក លោកស្រីក្នុងជួររាជរដ្ឋាភិបាល គណៈអភិបាលខេត្ត អស់លោក លោកស្រីប្រធាន អនុប្រធាន មន្ទីរអង្គភាពជុំវិញខេត្តជាច្រើនរូបទៀត បានអញ្ជើញចុះសួរសុខទុក្ខ និងនាំយកថវិកាចំនួន២៥លានរៀលទៅឧបត្ថម្ភដល់គ្រួសាររងគ្រោះដោយខ្យល់កន្ត្រាក់ដល់លំនៅឋានផ្ទាល់ចំនួន៨៧គ្រួសារ នៅភូមិអន្លង់ស្លែង ឃុំសំបួរមាស ស្រុកមុខកំពូល ដែលបានទទួលរងផលប៉ះពាល់ដោយសារខ្យល់កន្ត្រាក់រលំផ្ទះ និងប៉ើងដំបូលចំនួន៨៧ខ្នងកាលពីរសៀលម៉ោង៣ និង៣០នាទី ថ្ងៃទី៣០ ឧសភា ២០១៥ ។
ក្នុងឱកាសចុះជួបសំណេះសំណាល និងពិនិត្យពីស្ថានភាពជាក់ស្តែងដែលបានរងផលប៉ះពាល់ដោយសារខ្យល់កន្ត្រាក់នេះ លោក ម៉ៅ ភិរុណ និង លោកជាវ តាយ បាននាំនូវការផ្តាំផ្ញើសាកសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនបងប្អូនប្រជាពលរដ្ឋរងគ្រោះទាំងអស់ដោយក្តីនឹករឭក ។
លោកជាវ តាយ ប្រធានគណៈកម្មាធិការសាខាកាកបាទក្រហមកម្ពុជាខេត្ត បានបញ្ជាក់នៅចំពោះមុខប្រជាពលរដ្ឋដែលរងគ្រោះទាំងអស់ថា ថវិកាដែលសាខាបានយកមកឧបត្ថម្ភជូននាពេលនេះ គឺមួយផ្នែកបានមកពីការចូលរួមរបស់សប្បុរសជនតាមរយៈការខិតខំអំពាវនាវរបស់អាជ្ញាធរខេត្ត ហើយមួយផ្នែកទៀត គឺបានមកពីការចូលរួមរបស់សប្បុរសជននានាក្នុងមិទ្ទីងខួបទី១៥២ ទិវាពិភពលោកកាកបាទក្រហម អឌ្ឍចន្ទក្រហម ដែលសាខាកាកបាទក្រហមកម្ពុជាខេត្ត បានប្រារព្ធឡើងកាលពីថ្ងៃទី០៣ ឧសភា ២០១៥ កន្លងទៅថ្មីៗនេះ ។
សូមបញ្ជាក់ជូនថា ក្នុងចំណោមប្រជាពលរដ្ឋរងគ្រោះទាំង៨៧គ្រួសារ មានលំនៅឋានរលំដល់ដីចំនួន២៤ខ្នង និងប៉ើងដំបូលសរុបចំនួន៦៣ខ្នង ។ ក្នុងឱកាសចុះសួរសុខទុក្ខប្រជាពលរដ្ឋរងគ្រោះដល់លំនៅឋានផ្ទាល់ ប្រតិភូសាខាខេត្តបានឧបត្ថម្ភអំណោយជាថវិកាជូនមានទឹកប្រាក់សរុបចំនួន ២៥.០០០.000រៀល (ម្ភៃប្រាំលានរៀល) ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ