រាជធានីភ្នំពេញ ៖ ក្នុងគោលបំណងរក្សាអ្នកដែលមានជំហរស្រឡាញ់ប្រជាធិបតេយ្យគណបក្សនយោបាយចំនួន៣ បានសម្រេចចងសម្ព័ន្ធភាពជាមួយគ្នាដោយបង្កើតជា« សម្ព័ន្ធភាពអ្នកប្រជាធិបតេយ្យខ្មែរ» ដែលនឹងប្រកាស នៅដើមខែធ្នូ ឆ្នាំ២០២០ ។
លោក អ៊ុំ សុមន្ថា អនុប្រធានគណបក្សខ្មែរួបរួមជាតិបានឲ្យកោះសន្តិភាពដឹង នៅថ្ងៃទី១៦ ខែវិច្ឆិកា ឆ្នាំ២០២០ថា គណបក្សនយោបាយចំនួនបី គឺគណបក្សសំបុកឃ្មុំ សង្គមប្រជាធិបតេយ្យ របស់លោក ម៉ម សូណង់ដូ គណបក្សខ្មែររួបរួមជាតិ របស់លោក ញឹក ប៊ុនឆៃ និងគណបក្សខ្មែរតែមួយ របស់លោក កែម រិទ្ធិសិត បានសម្រេចចងសម្ព័ន្ធភាពជាមួយគ្នាដោយដាក់ឈ្មោះថា «សម្ព័ន្ធភាព អ្នកប្រជាធិបតេយ្យខ្មែរ ( ស . ប . ខ ) THE ALLIANCE OF KHMER DEMOCRATS ( A.K.D)» ។
លោកបញ្ជាក់ថា៖«យើងធ្វើសម្ព័ន្ធភាពអ្នកប្រជាធិបតេយ្យភាពនេះ គណបក្សទាំង៣ជាស្ថាបនិក ក៏ប៉ុន្តែមិនមែនជាច្របាច់បញ្ចូលគ្នានោះទេ ។ អ្នកប្រជាធិបតេយ្យនេះយើងមានគោលបំណងយើង គឺបណ្តុះបណ្តាលគំនិតដល់អ្នកជំនាន់ក្រោយ ដោយមិនប្រើលទ្ធិក្តិចត្រួយប៉ែងជើងគ្នានោះ គឺអត់ទេ» ។ លោកបន្ថែមថា ទោះបីជាមានការចងសម្ព័ន្ធគ្នាក៏ដោយគណបក្សទាំង៣ នៅតែរក្សាអត្ថសញ្ញារៀងៗខ្លួនដដែល ។ តែការធ្វើនេះ ដើម្បីធ្វើសហប្រតិបត្តិការជួយគ្នាទៅវិញទៅមកនៅពេលការបោះឆ្នោតក្រុមប្រឹក្សាឃុំសង្កាត់ ឆ្នាំ២០២០ និងបោះឆ្នោតជ្រើសតាំងអ្នកតំណាង រាស្ត្រនៅឆ្នាំ២០២៣ ។
អនុប្រធានបក្សខ្មែររួបរួមជាតិបានគូសបញ្ជាក់ថា ៖«មិនមែនយើងច្របាច់បញ្ចូលគ្នានោះទេ អាហ្នឹង គឺយើងរក្សាអត្ថសញ្ញារបស់គណបក្សរៀងៗខ្លួន ។ ក្នុងសម្ព័ន្ធនេះបានសម្រេចឲ្យលោក ម៉ម សូណង់ដូជាប្រធាន លោក ញឹក ប៊ុនឆៃជាអនុប្រធាន និងលោកគុជ លី ជាអ គ្គលេខាធិការ» ។ លោកក៏បានបង្ហាញពីមូលហេតុដែរនៃការចងសម្ព័ន្ធភាពនេះថា គណបក្សទាំងអស់បានឯកភាពគ្នាចងជាគោលនយោបាយរួចហើយ គឺសម្រាប់ការបោះឆ្នោតក្រុមប្រឹក្សាឃុំ សង្កាត់មាន ៥ចំណុច និងបោះឆ្នោតជ្រើសរើសសមាជិករដ្ឋសភាមាន១០ចំណុច ហើយគោលបោបាយនេះក៏ផ្អែកលើសន្ធិសញ្ញាទីក្រុងប៉ារីស ឆ្នាំ១៩៩១ ។
ជាមួយគ្នានោះដែរលោកអនុប្រធានគណបក្សក៏បានការបង្កើតសម្ព័ន្ធភាពអ្នកប្រជាធិបតេយ្យគណបក្សទាំង៣ បានឯកភាពគ្នាធ្វើសន្និសីទសារព័ត៌មាន នៅខែវិច្ឆិកា ដើម្បីបង្ហាញពីគោលជំហរដែល ប៉ុន្តែដោយសារតែជំងឺកូវីដ១៩ វាយលុកក៏បានផ្អាកសិន ។ ប៉ុន្ទែអាចដើមខែធ្នូ ឆ្នាំ២០២០ នឹងធ្វើសន្និសីទសារព័ត៌មានមួយ ។ ចំពោះសំណួរថា តើនៅពេលបោះ ហើយគណបក្សបានសម្លេងឆ្នោតមានករណីច្របាច់បញ្ចូលគ្នាឬទេ ? លោកអនុប្រធានគណបក្សបានលើកឡើងថា មិនមានការកំណត់ច្បាស់លាស់នោះទេ ព្រោះដំណាក់កាលនេះ បានត្រឹមតែចង់សម្ព័ន្ធភាពគ្នាទៅវិញទៅមកប៉ុណ្ណោះ ។
លោក បានលើកឧទាហរណ៍ថា នៅពេលគណបក្សខ្មែររួបរួមជាតិឈរ៥ខេត្ត នៅពេលបោះឆ្នោតគណបក្ស២ទៀតមិនដាក់បេក្ខភាពឈរឈ្មោះទេ ផ្ទុយទៅអ្នកគាំទ្របោះឆ្នោតជួនគណបក្សខ្មែររួបរួមជាតិ ឬគណបក្សដែលចង់សម្ព័ន្ធភាពគ្នា ។ លោកសង្កត់ធ្ងន់ថា៖ «គោលការណ៍យើងអញ្ចឹង ចំណែកការច្របាច់បញ្ចួលគ្នានៅពេលណានោះយើងមិនទាន់ច្បាស់លាស់ទេ ។ តែយើងធ្វើនេះ គឺចង់ប្រមួលអ្នកដែលមានគំនិតប្រជាធិបតេយ្យប្រហាក់ប្រហែលគ្នា ចូលរួមជាមួយគ្នា យើងធ្វើហ្នឹង ដើម្បីអ្នកនយោបាយឯករាជ្យក៏អាចចូលមកបាន ហើយយើងបើកចំហរស្វាគមន៍គណបក្សផ្សេងទៀត» ។
លោក អ៊ុំ សុមន្ថា ក៏បានឲ្យដឹងថា កន្លងមកក៏មានគណបក្សនយោបាយផ្សេងទៀតចំនួន៤ ចង់មកចូលរួម ប៉ុន្តែដោយសារផ្ទៃក្នុងគណបក្សមិនទាន់ស្រុះស្រួលគ្នាយើងចាប់ផ្តើមចងសម្ព័ន្ធភាព តែ៣ គណបក្សសិន ។ ពាក់ព័ន្ធនឹងសម្ព័ន្ធភាពរវាងគណបក្សខ្មែររួបរួមជាតិជាមួយគណបក្សហ្វ៊ុន ស៊ិនប៉ិច អនុប្រធានគណបក្សរូបនេះបានអះអាងថា មុនដំបូងគណបក្សទាំង២ បម្រុងរៀបចំបញ្ចូលគ្នា ដោយមានការកែបទបញ្ជាផ្ទៃក្នុង និងលក្ខន្តិកៈគណបក្ស ហើយគណបក្សខ្មែររួបរួមជាតិនឹងចូលរួមជាមួយគណបក្សហ្វ៊ុនស៊ិនប៉ិចប៉ុន្តែដោយសារតែផ្ទៃក្នុងគណបក្សហ្វ៊ុនស៊ិនប៉ិចសមាសភាពមិនទាន់ត្រូវបានក្រសួងមហាផ្ទៃទទួលស្គាល់ច្បាស់លាស់ចំពោះប្រធាន ។
ដូច្នេះបានធ្វើឲ្យគណបក្សខ្មែររួបរួមជាតិចេញមកវិញ ហើយសព្វថ្ងៃនេះក៏មិនចងសម្ព័ន្ធភាពជាមួយគណ បក្សហ្វ៊ុនស៊ិនប៉ិចដែរ ។
លោក ម៉ម សូណង់ដូ ប្រធានគណបក្សសំបុកឃ្មុំសង្គមអ្នកប្រជាធិបតេយ្យបានលើកឡើងថា ការចងសម្ព័ន្ធអ្នកប្រជាធិបតេយ្យខ្មែរ គឺត្រូវធ្វើឲ្យបានគង់វង្សល្អ ហើយចង់បានលេខបូកដោះស្រាយ បញ្ហាសង្គមឲ្យមានភាពយុត្តិធម៌ ។ លោកថា៖«បើសិនជា យើងបានជោគជ័យហើយបានសន្តិភាព ហើយបើសិនជាយើងមិនធ្វើលេខបូកទេ យើងនៅតែមានគំនិតចង់ធ្វើលេខសងចង់ចាញ់ចង់ឈ្នះចង់ដណ្តើមតួនាទី គ្នាគឺ ជំហរវាមិនរឹងមាំ ។ យើងធ្វើដំណើរការដើម្បីលេខបូកយើង មិនធ្វើលេខសងដូចពួកសម រង្ស៊ីទេ ។ ប៉ុន្តែអ្វីដែលយើងមាន យើងត្រូវតែទទួលស្គាល់ គោរព យកទៅអនុវត្ត ក្នុងទិដៅវិជ្ជមាន»។
លោក សូណង់ដូ បានបន្តថា ការចងសម្ព័ន្ធភាព អ្នកប្រជាធិបតេយ្យ ខ្មែរ គឺធ្វើជាគំរូ ដោយ ចាប់ផ្តើម ធ្វើពីគណបក្សបី គឺគណបក្សសំបុក ឃ្មុំ សង្គម ប្រជាធិបតេយ្យ គណបក្ស ខ្មែរ រួបរួម ជាតិ និង គណបក្ស ខ្មែរ តែមួយ ។ គណបក្សទាំងបី មានគោលនយោបាយប្រហាក់ប្រហែលគ្នា និងទិសដៅដូចគ្នាទាក់ទងរឿង ជាតិសន្តិភាព និងយុវជន ។ ហើយក៏មានការលើកឡើងអំពីសន្ធិសញ្ញា សន្តិភាព ២៣ តុលា ផងដែរ ។
លោកបានបញ្ជាក់បន្ថែមថា ការចងសម្ព័ន្ធភាព នេះ គឺ គណបក្ស ទាំងបី មិន ច្របាច់ បញ្ចូល គ្នា ទេ ដោយ គណបក្ស និមួយៗរក្សាទុកនៅដដែលពោលគឺ មិនច្របាច់ចូលគ្នា តែមួយ ហើយក៏មិនរំលាយគណបក្សទាំងបីចូលគ្នាដែ រ។ ហើយអ្វីដែលធ្វើនេះ គឺមានបំណងចង់ឲ្យគណបក្សនយោបាយនានាចូលរួម ជាមួយសម្ព័ន្ធភាពអ្នកប្រជាធិបតេយ្យខ្មែរ ៕
ចែករំលែកព័តមាននេះ