រាជធានីភ្នំពេញ ៖ បន្ទាប់ពីមានការប្រកាសថា ការប្រកួតកីឡាបាញ់កាំភ្លើងជ្រើសរើសជើងឯកថ្នាក់ជាតិ និងដណ្ដើមពានរង្វាន់សហព័ន្ធកីឡាបាញ់កាំភ្លើងកម្ពុជា ប្រចាំឆ្នាំ២០២០ដែលគ្រោងធ្វើពីថ្ងៃទី១៦ ដល់ថ្ងៃទី២០ ខែវិច្ឆិកា ឆ្នាំ២០២០ ត្រូវបានលើកពេល…
រាជធានីភ្នំពេញ ៖ បន្ទាប់ពីមានការប្រកាសថា ការប្រកួតកីឡាបាញ់កាំភ្លើងជ្រើសរើសជើងឯកថ្នាក់ជាតិ និងដណ្ដើមពានរង្វាន់សហព័ន្ធកីឡាបាញ់កាំភ្លើងកម្ពុជា ប្រចាំឆ្នាំ២០២០ដែលគ្រោងធ្វើពីថ្ងៃទី១៦ ដល់ថ្ងៃទី២០ ខែវិច្ឆិកា ឆ្នាំ២០២០ ត្រូវបានលើកពេល ហាក់ធ្វើឱ្យកីឡាករនៅក្នុងវិស័យមួយនេះមានការខកចិត្តយ៉ាងខ្លាំង ខណៈដែលកីឡាករនៅក្នុងវិស័យនេះ ក៏ត្រូវគេកត់សម្គាល់ថា មានកំណើន ដែលបង្ហាញថា វិស័យនេះ មានការរីកចម្រើនបើធៀបនឹងអំឡុងពេលមុន ។
យោងតាមសេចក្តីជូនដំណឹងរបស់សហព័ន្ធ កីឡាបាញ់កាំភ្លើងកម្ពុជា ចុះថ្ងៃទី១០ ខែវិច្ឆិកា ឆ្នាំ២០២០ បានប្រកាសមិនឱ្យមានការរៀបចំនោះទេ ដើម្បីបញ្ចៀសនូវការឆ្លងរាលដាលនៃជំងឺកូវីដ-១៩ដែលកើតចេញពីព្រឹត្តិការណ៍ថ្ងៃ៣ វិច្ឆិកា ។ យ៉ាងណាក៏ដោយ ក្រសួងអប់រំ និងសហព័ន្ធ បានជំរុញឱ្យកីឡាករទាំងអស់ត្រូវពង្រឹងសមត្ថភាពក្នុងអំឡុងពេលដែលមានការពន្យារពេលនាពេលនេះផងដែរ ដោយមន្ត្រីទទួលបន្ទុកបានស្នើមិនឱ្យកីឡាករទាំងអស់យកបញ្ហាកូវីដហើយរយាលដៃក្នុងការហ្វឹកហាត់ឬក៏ពង្រឹងសមត្ថភាព ដែលធ្វើឱ្យឱកាសក្នុងការប្រកួតប្រជែងត្រូវបានបាត់បង់នោះទេ ។
មន្ត្រីទទួលបន្ទុកបន្តថា ពន្យារពេលរៀបចំការប្រកួតនេះ មិនមែនធ្វើឱ្យកីឡាករខូចគម្រោង ហើយបែរជាធ្វើឱ្យប៉ះពាល់សមត្ថភាពនោះឡើយ។ មន្ត្រីទទួលបន្ទុកបន្តថា មកទល់ពេលនេះ កីឡា បាញ់កាំភ្លើង កាន់តែវិវត្តឈានឡើង ដោយមានកីឡាករមិនតិចទេ បានក្លាយជាធនធានល្អៗសម្រាប់សហព័ន្ធទាំងមូល ។ ដូច្នេះហើយទើបសហព័ន្ធនឹងឆាប់រៀបចំការប្រកួតឡើងវិញឱ្យបានឆាប់ ដើម្បីកុំឱ្យកីឡាករដែលបានត្រៀមខ្លួនរួចរាល់ ខកចិត្តធ្វើឱ្យសមត្ថភាពដែលបានពង្រឹងមានការថមថយ។
លោក មៀច សុផាន់ណា ប្រធានសហព័ន្ធ កីឡាបាញ់កាំភ្លើងកម្ពុជា សម្រាប់អាណត្តិថ្មី បានអះអាងថា មកទល់ពេលនេះ ថ្វីដ្បិតតែការប្រកួតទាំងមូលត្រូវបានលើកពេល តែលោកបានជំរុញឱ្យមន្ដ្រីក្រោមឱវាទបន្តរៀបចំជើងព្រួលមិនឱ្យធ្លាក់ដៃនោះទេ ជាពិសេសនៅក្នុងកាលៈទេសៈ ដែលមនុស្សស្ថិតក្នុងភាពភ័យបារម្ភ ហើយមិនសូវយកចិត្តទុកដាក់ក្នុងការពង្រឹងសមត្ថភាពនោះ ។
លោកថា កីឡាករផ្នែកបាញ់កាំភ្លើង មិនត្រឹមតែមានចំនួនច្រើនឡើងប៉ុណ្ណោះទេ តែកីឡាករនីមួយៗក៏មានសមត្ថភាពខ្ពស់អាចឈានចូលក្នុងឆាកអន្តរជាតិផងដែរ ទើបសហព័ន្ធមួយនេះ ត្រូវតែរៀបចំការប្រកួតប្រជែងឱ្យបានមួយឆ្នាំម្ដង ដើម្បីស្វែងរកអ្នកខ្លាំងទៅកាន់ព្រឹត្តិការណ៍ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះនោះ។
គួរបញ្ជាក់ផងដែរថា សហព័ន្ធកីឡាបាញ់កាំភ្លើងកម្ពុជាអាណត្តិទី១ ត្រូវបានទទួលស្គាល់ជាផ្លូវការដោយគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡាកាលពីថ្ងៃទី២៩ ធ្នូ ឆ្នាំ២០១៥ ។ កាលពីអាណត្តិដំបូង សហព័ន្ធកីឡាបាញ់កាំភ្លើងកម្ពុជាមានសមាជិកប្រតិបត្តិចំនួន១៧រូប ក្នុងនោះ មានលោកឧត្តមសេនីយ៍មៀច សុផាន់ណា អនុរដ្ឋលេខាធិការក្រសួងមហាផ្ទៃជាប្រធាននិងមានអនុប្រធានចំនួន៤រូបមានលោកឧត្តម សេនីយ៍ឯកចាប ភក្ដី មេបញ្ជាការកងទ័ពឆត្រយោង៩១១, លោកឧត្តមសេនីយ៍ឯក ប៊ុត សុភាព, លោក វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និង លោកឧត្តមសេនីយ៍ឯក នុត សវនា ។
ចំណែកអគ្គលេខាធិការសហព័ន្ធគឺលោក ប៊ួយ សោភ័ណ្ឌ ដែលមានអគ្គលេខាធិការរងចំនួន៣រូបទៀតនិងអគ្គហិរញ្ញឹកគឺលោក ខៃ វណ្ណៈ ។ ប៉ុន្តែសម្រាប់រយៈពេលចុងក្រោយ សមាសភាពនៅក្នុងសហព័ន្ធ និងកីឡាករគឺមានចំនួនច្រើនជាងក្នុងឆ្នាំដំបូង ។ ក្នុងចំណោមសមាជិកប្រតិបត្តិសហព័ន្ធកីឡាបាញ់កាំភ្លើងកម្ពុជា ទាំង១៧រូបនេះ ភាគច្រើនជាមន្ត្រីជាន់ខ្ពស់យោធា និងប៉ូលិស និងមានជនបរទេស២រូបទៀតត្រូវ បានសហព័ន្ធតែងតាំងជាទីប្រឹក្សាបច្ចេកទេស ៕
ចែករំលែកព័តមាននេះ