ខេត្តកំពង់ស្ពឺ ៖ មនុស្សចំនួន១០នាក់ដែលជាអ្នកញៀនល្បែងស៊ីសងត្រូវបាននគរបាលស្រុកឱរ៉ាល់ឃាត់ខ្លួន ខណៈកំពុងតែប្រមូលផ្តុំគ្នាលេង កាលពីវេលាម៉ោង១១ព្រឹក ថ្ងៃទី៣០ ឧសភា ២០១៥ នៅចំណុចក្នុងព្រៃខាងកើតសាលាបឋមសិក្សាដំបងវេញ ឃុំសង្កែសាទប ស្រុកឱរ៉ាល់ ។
ការបង្ក្រាបនេះធ្វើឡើងក្រោមការដឹកនាំរបស់លោកអនុសេនីយ៍ឯក កែវ សុភ័ក្ត នាយប៉ុស្តិ៍សង្កែសាទប រួមជាមួយក្រុមប្រជាការពារដំបងវេញ និងទួលឈើនាង សរុប១០នាក់ តាមបញ្ជារបស់លោក វរសេនីយ៍ត្រី ប៊ុត ប៊ុនធឿន អធិការនគរបាលស្រុកឱរ៉ាល់ បានបង្ក្រាបបទល្មើស ០២ករណីព្រមគ្នា មានល្បែងយូគី និងកន្ទុយលេខ ឃាត់ខ្លួនឈ្មោះ សែម វុត្ថា ភេទប្រុស អាយុ៤៨ឆ្នាំ មុខរបរមេយូគី និងកន្ទុយលេខ រស់នៅភូមិផ្សារកន្ទួត ឃុំសង្កែសាទប ស្រុកឱរ៉ាល់ ។
ក្រោយពីឃាត់ខ្លួនជនសង្ស័យទាំង១០នាក់ សមត្ថកិច្ចបានដកហូតសម្ភារដូចជា កន្ទេលសម្រាប់ក្រាល០៣, ស្បៃប្រក់ការពារកំដៅថ្ងៃ០១, កាបូបជ័រប្លាស្ទិច០១, ស្បែកជើងចំនួន៩គូកន្លះ, កំរាលកាតុងយូគី០១, ក្រដាសយូគី៦៣សន្លឹក, សៀវភៅកត់កន្ទុយលេខ០១ក្បាល, ក្រដាសកាប៉ោន០១, ប៊ិច ០១ដើម, ប្រាក់ចំនួន ៤០.៥០០រៀល។
ពេលនេះសមត្ថកិច្ចកំពុងបញ្ជូនបន្តមកស្នងការដ្ឋាននគរបាលខេត្តកំពង់ស្ពឺកសាងសំណុំរឿងដើម្បីចាត់ការតាមនីតិវិធី៕
ចែករំលែកព័តមាននេះ