រាជធានីភ្នំពេញ ៖ ក្នុងយរៈពេល៨ខែ ដើមឆ្នាំ២០២០នេះ កម្ពុជាទទួលបានគម្រោងវិនិយោគលើឯកជនចំនួន១១៣គម្រោង ។ បើធៀបនឹងរយៈពេលដូចគ្នា កាលពីឆ្នាំ២០១៩មានការធ្លាក់ចុះប្រមាណ១៦ភាគរយដោយសារតែឥទ្ធិពលនៃជំងឺកូវីដ១៩ ។ នេះបើយោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ ។
យោងតាមរបាយការណ៍ដដែលនេះបានឱ្យដឹងថា គម្រោងវិនិយោគទាំង១១៣គម្រោងនេះ គិតជាទឹកប្រាក់មានចំនួន ២.៣២៩លានដុល្លារអាមេរិក បើធៀបនឹងរយៈពេលដូចគ្នា កាលពីឆ្នាំ២០១៩ មានការថយចុះរហូតដល់៥៧,១ភាគរយ ។ យ៉ាងណាក្ដី ក្នុងចំណោមគម្រោងទាំងជាង១០០គម្រោងនេះដែរ គឺបានផ្ដល់ឱកាសការងារដល់ប្រជាពលរដ្ឋប្រមាណជាង ៨៤ពាន់កន្លែង ។
លោកសំ សុខនឿន ប្រធានសមាគមអចលនទ្រព្យសកល បានឱ្យដឹងផងដែរថា ដោយសារកម្ពុជានៅពឹងលើលំហូរវិនិយោគពីបរទេស ហើយនៅពេលដែលកូវីដ១៩រីករាលដាលក្នុងប្រទេសនិងក្រៅប្រទេសដែរនោះ ធ្វើឱ្យបរទេសមិនអាចចូលមកកម្ពុជាស្វែងរកការវិនិយោគបាន ដូច្នេះហើយ ក៏ធ្វើឱ្យការវិនិយោគមួយចំនួនត្រូវបានថយចុះ ។
លោកបន្តថា ទោះបីជាកម្ពុជាជួបប្រទះនឹងជំងឺកូវីដ១៩ក្ដី តែស្ថានភាពវិនិយោគនៅកម្ពុជា បើធៀបនឹងបណ្ដាប្រទេសជិតខាងឃើញថានៅតែទទួលបានគម្រោងវិនិយោគជាហូរហែដោយសារស្ថានភាពកូវីដ១៩នៅក្នុងប្រទេសកម្ពុជា មិនបណ្ដាលឱ្យអ្នកណាម្នាក់ស្លាប់នៅឡើយ ។ លោកបានបន្តថា «ក្នុងវិស័យអចលនទ្រព្យវិញ បើពិនិត្យមើលឱ្យមែនទែន វាក៏រងផលប៉ះពាល់ ដូចនឹងវិស័យដទៃទៀតដែរ ។
ចាប់តាំងពីខែសីហា កញ្ញា មកវិស័យនេះហាក់ទទួលបានសន្ទុះងើបឡើងវិញបន្តិចវិញហើយ តែនៅរយៈពេលប៉ុន្មានថ្ងៃកន្លងទៅនេះ ស្រាប់តែមានតែហេតុការណ៍មួយ ធ្វើឱ្យវិស័យអចលនទ្រព្យនិងវិស័យផ្សេងទៀត ចាប់ផ្ដើមមានហានិភ័យឡើងវិញ ដែលអាចឈានដល់សញ្ញាអាក្រក់នៅចុងឆ្នាំនេះ » ។ លោកតែ តាំងប៉រ ប្រធានសមាគមសម្ព័ន្ធសហគ្រាសខ្នាតតូច និងមធ្យមកម្ពុជា បានមានប្រសាសន៍ផងដែរថា ផលប៉ះពាល់នៃកូវីដ១៩នេះ សហគ្រាសផលិតចំណីអាហារក្នុងស្រុក មានបើកមានបិទជារឿងធម្មតា តែសំខាន់ត្រង់ថាយើងនៅតែមានលទ្ធភាព ក្នុងការផលិតនិងផ្គត់ផ្គង់ទៅកាន់ទីផ្សារបាន ។ អ្វីដែលពិសេសគឺការជួយសង្គ្រោះរបស់រាជរដ្ឋាភិបាលសម្រាប់វិស័យ SME ។
គួរបញ្ជាក់ថាគម្រោងវិនិយោគឯកជនសំដៅដល់គម្រោងវិនិយោគក្រៅតំបន់សេដ្ឋកិច្ចពិសេសដែលទទួលបានការអនុញ្ញាតដោយក្រុមប្រឹក្សាអភិវឌ្ឍន៍កម្ពុជា។ ទោះបីជាក្នុងអំឡុងពេលមានវិបត្តិដោយសារតែកូវីដ១៩ នេះក្ដីរដ្ឋាភិបាលក៏បានដាក់ចេញនូវប្រព័ន្ធចុះបញ្ជីពាណិជ្ជកម្មតាមប្រព័ន្ធអនឡាញដើម្បីជួយសម្រួលដល់វិនិយោគិនដែលចង់បើកក្រុមហ៊ុនផងដែរ ៕
ចែករំលែកព័តមាននេះ