ប្រទេសអេហ្ស៊ីប ៖ មានគ្រោះថ្នាក់មួយកើតមាននៅតំបន់ស៊ីណៃអ៊ីអេហ្ស៊ីប បណ្ដាលឲ្យសមាជិកកងកម្លាំងសង្កេតការណ៍ពហុជាតិ FMO ៨នាក់បានត្រូវបាត់បង់ជីវិត កាលពីថ្ងៃទី១២ ខែវិច្ឆិកា ឆ្នាំ២០២០ ក្នុងការធ្លាក់ឧទ្ធម្ភាគចក្រ១គ្រឿងរបស់ពួកគេ។
តាមសេចក្ដីប្រកាសមួយរបស់កងកម្លាំងនោះថា ក្នុងចំណោមជនរងគ្រោះមានជនជាតិអាមេរិក៦នាក់ បារាំងម្នាក់ និងឆេកម្នាក់។ សមាជិកម្នាក់របស់កងកម្លាំងនោះ ជាជនជាតិអាមេរិកនៅរស់រានមានជីវិតពីគ្រោះថ្នាក់នេះ ហើយត្រូវបាននាំចេញដើម្បីព្យាបាល។ សេចក្ដីប្រកាសរបស់កងកម្លាំងនោះបញ្ជាក់ថា គ្រោះថ្នាក់ធ្លាក់ឧទ្ធម្ភាគចក្រកើតមាន ក្នុងពេលបំពេញបេសកកម្មជាធម្មតានៅជិតទីក្រុង CHARM EL CHEIKH ប្រទេសអេហ្ស៊ីប។
កងកម្លាំង FMO ជាកងកម្លាំងមួយ ទទួលបន្ទុកត្រួតពិនិត្យ កិច្ចព្រមព្រៀងសន្តិភាព រវាងអ៊ីស្រាអែល និងអេហ្ស៊ីប ។ ៣ឆ្នាំក្រោយការចុះហត្ថលេខាលើកិច្ចព្រមព្រៀងនោះ ជាមួយការជួយទ្រទ្រង់របស់អាមេរិក ប្រទេសទាំង២បានយល់ព្រមលើការបង្កើតកងកម្លាំងនេះ ដែលដាក់ពង្រាយពីឆ្នាំ១៩៨២មក។
កងកម្លាំងនេះចាត់ទុកជាអង្គការអន្តរជាតិឯករាជ្យ ថែរក្សាសន្តិភាពមួយ។ កងកម្លាំង FMO បច្ចុប្បន្នមានទាហាន១.១០០នាក់ មានសញ្ជាតិផ្សេងៗគ្នាក្នុងនោះមានអាមេរិក អូស្ត្រាលី កាណាដា បារាំងជាដើម។
តំបន់ស៊ីណៃអ៊ីអេហ្ស៊ីប ធ្លាប់ជាទីលាននៃការប៉ះទង្គិចគ្នាខ្លាំងក្លា រវាងអ៊ីស្រាអែលនិងអេហ្ស៊ីបមុនពេលប្រទេសទាំង២ ចុះហត្ថលេខាលើកិច្ចព្រមព្រៀងសន្តិភាពឆ្នាំ១៩៧៩៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ