រាជធានីភ្នំពេញ ៖ លោកស្រី លី ស្រីវីណា ត្រូវបានគេស្គាល់ថា ជាអតីមន្ត្រីជាន់ខ្ពស់អតីតគណបក្សសង្គ្រោះជាតិ បានសម្រេចចូលរួមជីវភាពនយោបាយជាមួយគណបក្សប្រជាជនកម្ពុជា បន្ទាប់ទទួលបានសម្បទានសិទ្ធិធ្វើនយោបាយ។ លោកស្រី លី ស្រីវីណា ត្រូវបានព្រះកុរណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅថ្ងៃទី១២ ខែវិច្ឆិកា ឆ្នាំ២០២០នេះ បានចេញព្រះរាជក្រឹត្យផ្តល់នីតិសម្បទានយោបាយ។ ការផ្តល់សម្បទានសិទ្ធិនយោបាយនេះបន្ទាប់ពីលោកស្រី លី ស្រីវីណា អតីតតំណាងរាស្ត្រនៃអតីតគណបក្សសង្គ្រោះជាតិ ដែលត្រូវបានតុលាការកំពូល សម្រេចមិនឱ្យធ្វើនយោបាយរយៈពេល៥ឆ្នាំ ហើយលោកស្រីស្នើសុំក្រសួងមហាផ្ទៃដើម្បីស្នើសុំបន្តទៅកាន់នាយករដ្ឋមន្ត្រី។
តាមព្រះរាជក្រឹត្យរបស់ព្រះមហាក្សត្រចេញផ្សាយនៅរសៀលថ្ងៃទី១២ ខែវិច្ឆិកា ឆ្នាំ២០២០បានឲ្យដឹងថាព្រះមហាក្សត្រ ដែលផ្ដល់នីតិសម្បទាធ្វើនយោបាយឡើងវិញដល់អតីតថ្នាក់ដឹកនាំគណបក្សប្រឆាំងរូបនេះ។ ការផ្តល់នេះបានធ្វើឡើងបន្ទាប់ពីមានការក្រាបបង្គំទូលថ្វាយរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បន្ទាប់ពីលោកស្រី លី ស្រីវីណា បានដាក់លិខិតស្នើទៅក្រសួងមហាផ្ទៃ ដើម្បីសុំនីតិសម្បទាធ្វើនយោបាយ និងលិខិតគោរពស្នើសុំចូលរួមជីវភាពនយោបាយគណបក្សប្រជាជនកម្ពុជា។ យោងតាមលិខិតមួយច្បាប់ផ្សេងទៀតបានឲ្យដឹងថា លិខិតគោរពស្នើសុំរបស់លោកស្រី លី ស្រីវីណា ចូលរួមជីវភាពនយោបាយជាមួយគណបក្សប្រជាជនកម្ពុជា ក៏ត្រូវបានសម្តេចតេជោ ហ៊ុន សែន ប្រធានគណបក្សប្រជាជនកម្ពុជា យល់ព្រមហើយក្នុងការទទួលយកលោកស្រីមកធ្វើជាសមាជិកគណបក្ស។
លិខិតរបស់លោកស្រីដែលស្នើសុំសម្តេចតេជោបានបញ្ជាក់ថា លោកស្រីមិនមានការពាក់ព័ន្ធជាមួយគណនយោបាយណាមួយនោះទេ។ សូមបញ្ជាក់ថា អតីតថ្នាក់ដឹកនាំគណបក្សសង្គ្រោះជាតិ សរុប១១៨នាក់ ត្រូវបានតុលាការកំពូលកម្ពុជាចេញសាលដីកា សម្រេចផ្អាកមិនឱ្យធ្វើសកម្មភាពនយោបាយ រយៈពេល៥ឆ្នាំ កាលពីថ្ងៃទី១៦ ខែវិច្ឆិកា ឆ្នាំ២០១៧ កន្លងទៅ បន្ទាប់ពីកាត់ទោសរំលាយគណបក្សសង្គ្រោះជាតិ ដែលជាប់ពាក់ព័ន្ធនឹងអំពើឃុបឃិតជាមួយបរទេស ដើម្បីផ្តួលរំលំរាជរដ្ឋាភិបាលស្របច្បាប់។
រហូតមកដល់ពេលនេះ មានអតីតថ្នាក់ដឹកនាំ នៃអតីតគណបក្សសង្គ្រោះជាតិចំនួន១៤រូបហើយ ត្រូវបានព្រះមហាក្សត្រ និងប្រមុខរដ្ឋស្តីទី ផ្តល់នីតិសម្បទានយោបាយឡើងវិញ ដែលក្នុងនោះរួមមាន ទី១៖ លោក គង់ គាំ អតីតទីប្រឹក្សាជាន់ខ្ពស់គណបក្សសង្គ្រោះជាតិ ទី២-លោក គង់ បូរ៉ា អតីតតំណាងរាស្ត្រគណបក្សសង្គ្រោះជាតិ ទី៣-លោក ស៊ីម សុវណ្ណនី និងទី៤-លោក រៀល ខេមរិន្ទ ដែលជាអតីតតំណាងរាស្ត្រ នៃអតីតគណបក្សសង្គ្រោះជាតិ, ទី៥-លោក អ៊ូ ច័ន្ទរ័ត្ន, ទី៦-លោកស្រី ទេព សុទ្ធី, ទី៧-លោក កង គឹមហាក់ ទី៨- លោក ជីវ កត្តា ទី៩-លោក ច័ន្ទ សិលា ទី១០-លោក សុន ឆ័យ ទី១១-លោក តាវ គឹមឈន, ទី១២- លោក វ៉ា សាម៉ុន, ទី១៣-លោក ស៊ុន សុភ័ក្រ និងចុងក្រោយទី១៤-គឺលោកស្រី លី ស្រីវីណា៕ ដោយ ៖ អ៊ាង ប៊ុនរិទ្ធ
ចែករំលែកព័តមាននេះ