ខេត្តប៉ៃលិន ៖ កសិករម្នាក់បានជួលក្រុមកម្មករឱ្យចូលទៅសម្រុកប្រមូលផលមើមដំឡូងមីនៅក្នុងចម្ការរបស់ខ្លួនចំនួន២ហិកតាយ៉ាងសស្រាក់សស្រាំ បើទោះបីជាមិនទាន់គ្រប់ខែ ត្រូវប្រមូលផលក៏ដោយ ខណៈពេលភ្លៀងធ្លាក់ជោកជាំជារៀងរាល់ថ្ងៃ ខ្លាចក្រែងរលួយមើមអស់ ទើបនាំគ្នាដកលក់ ។ ជាក់ស្តែងកាលពីម៉ោង១០និង៣០នាទីព្រឹក…
ខេត្តប៉ៃលិន ៖ កសិករម្នាក់បានជួលក្រុមកម្មករឱ្យចូលទៅសម្រុកប្រមូលផលមើមដំឡូងមីនៅក្នុងចម្ការរបស់ខ្លួនចំនួន២ហិកតាយ៉ាងសស្រាក់សស្រាំ បើទោះបីជាមិនទាន់គ្រប់ខែ ត្រូវប្រមូលផលក៏ដោយ ខណៈពេលភ្លៀងធ្លាក់ជោកជាំជារៀងរាល់ថ្ងៃ ខ្លាចក្រែងរលួយមើមអស់ ទើបនាំគ្នាដកលក់ ។
ជាក់ស្តែងកាលពីម៉ោង១០និង៣០នាទីព្រឹក ថ្ងៃទី១១ ខែវិច្ឆិកា ឆ្នាំ២០២០ មានកសិករម្នាក់ ឈ្មោះ វួច ធី ភេទប្រុស អាយុ៥៥ឆ្នាំ រស់នៅភូមិតាង៉ែនលើ សង្កាត់ប៉ៃលិន បានរៀបរាប់ឱ្យដឹងថា ៖ គាត់បានដាំដំឡូងមីចំនួន២ហិកតានៅលើដីចម្ការរបស់ខ្លួន កាលពីខែមីនា ឆ្នាំ២០២០ កន្លងទៅ ។
កសិកររូបនេះបន្តថា ប៉ុន្តែចាប់តាំងពីដាំដំឡូងមីដុះលូតលាស់បានយ៉ាងល្អ រហូតមកដល់ពេលប្រមូលផលនេះ គឺមិនទាន់គ្រប់អាយុនោះទេ ពោលគឺមិនទាន់ដល់ពេលត្រូវដកដំឡូងមីនៅឡើយ ព្រោះទើបតែបានរយៈពេល៧ទៅ៨ខែប៉ុណ្ណោះ ។ ប៉ុន្តែដោយសារសង្កេតឃើញមេឃចេះតែបង្អុរធ្លាក់ភ្លៀងជោកជាំជារៀងរាល់ថ្ងៃ បណ្តាលឱ្យដីក្នុងចម្ការជាំទឹកត្រង់កន្លែងដីទំនាប ធ្វើឱ្យមើមដំឡូងមីរបស់គាត់ក្លាយទៅជាស្អុយរលួយត្រង់ដីទំនាប ហើយដីទួលនៅសើមផងដែរ ។
កសិកររូបនេះបន្តទៀតថា ដូច្នេះបើសិនជាគាត់នៅដំអក់យូរបន្តិចទៀត អាចនឹងរលួយទាំងអស់ជាក់ជាមិនខាន ទោះបីជាដំឡូងមីមិនទាន់គ្រប់អាយុ១ឆ្នាំដែលត្រូវប្រមូលផលក្តី ក៏គាត់នៅតែព្យាយាមជួលកម្មករប្រមូលផលលក់ ដើម្បីបានថវិកាខ្លះសម្រាប់យកទៅសងបំណុលគេ និងទុកសម្រាប់ផ្គត់ផ្គង់ជីវភាពប្រចាំថ្ងៃ ។ ប៉ុន្តែនៅចុងឆ្នាំនេះ ផលដំណាំដំឡូងមីរបស់គាត់ មានការធ្លាក់ចុះជាងឆ្នាំមុនដោយសារតែគ្រោះធម្មជាតិ មើលទៅមិនបានចំណេញប៉ុន្មាននោះទេ ព្រោះជួលកម្មករប្រមូលផលឡើងថ្លៃ ជួលរថយន្តដឹកយកទៅលក់នៅស្តង់ដំឡូងមីថែមទៀត ។
កសិករខាងលើបញ្ជាក់ថា ទីផ្សារមើមដំឡូងមីបច្ចុប្បន្ន គឺនៅតាមស្តង់ក្បែរៗចម្ការរបស់គាត់ ឈ្មួញទិញក្នុង១គីឡូក្រាម តម្លៃ២បាត (ប្រាក់ថៃ) ដែលគិតទៅគឺមានតម្លៃខ្ពស់ជាងខែមុនបន្តិច ។ ចំណែកចម្ការដំឡូងមីរបស់ប្រជាពលរដ្ឋរស់នៅក្នុងខេត្តប៉ៃលិនផ្សេងៗទៀត ក៏កំពុងតែទទួលរងការខូចខាតស្ទើរតែអស់រលីងទៅហើយ ដោយម្នាក់ៗនៅឆ្នាំ២០២០នេះ មានការលំបាកចិត្តយ៉ាងខ្លាំង អ្នកខ្លះខ្ចីលុយធនាគារ និងនាយទុនយកទៅធ្វើចម្ការ ដោយសង្ឃឹមថា នៅចុងឆ្នាំ២០២០នេះ អាចទទួលបានផល លក់សងបំណល់ជំពាក់គេ ស្រាប់តែមានរឿងគ្រោះធម្មជាតិកើតឡើងដ៏គួរឱ្យព្រួយបារម្ភទៅវិញ ៕
ចែករំលែកព័តមាននេះ