រាជធានីភ្នំពេញ ៖ អ្នកដឹកនាំរឿងជនជាតិកាណាដា លោក Ken Simpson បានចែករំលែកភាពប៉ិនប្រសប់ក្នុងការសហការផលិតខ្សែភាពយន្តរឿង «សង្គ្រាមបងប្អូន» ។
រាជធានីភ្នំពេញ ៖ អ្នកដឹកនាំរឿងជនជាតិកាណាដា លោក Ken Simpson បានចែករំលែកភាពប៉ិនប្រសប់ក្នុងការសហការផលិតខ្សែភាពយន្តរឿង «សង្គ្រាមបងប្អូន» ។
Simpson ក្នុងនាមជាអ្នកផលិតភាពយន្ត គឺយល់ច្បាស់ពីចំណុចសំខាន់ ពីសភាពយ៉ាងស្មុគស្មាញនៃការថតភាពយន្ត និងយល់យ៉ាងច្បាស់ពីការប្រើបច្ចេកវិទ្យានៃឧបករណ៍ថតកុន និងការស្រមើស្រមៃលើឈុត នីមួយៗ ។ ការប្រឹងប្រែងរបស់លោកទៅលើការបង្កើតល្បិច ថ្មីៗនៃការថត និងការយល់ច្បាស់លើឈុត នីមួយៗ រួមទាំងការពូកែដឹកនាំរឿង កាត់ត និងរចនា ទើបភាពយន្តថ្មីនេះលេចចេញជារូបរាងមកជាមួយលទ្ធផលដ៏ឥតខ្ចោះ ។
រដូវក្តៅក្នុងឆ្នាំ២០១៣ ជាឆ្នាំដែលភាពយន្តដំបូងរបស់លោក Simpson បានចាក់បញ្ចាំង គឺខ្សែភាពយន្តរឿង Headcase ជាខ្សែភាពយន្តដែលបានចូលរួមប្រកួតក្នុងកម្មវិធី Seattle True Independent Film Festival នៅទីក្រុង Toronto ប្រទេសកាណាដា ។ នៅដើមឆ្នាំ២០១៤ លោក Simpson បានដឹកនាំផលិតភាពយន្តឯកសារមួយមានចំណងជើងថា The Trouble with Dying ជាសាច់រឿងនិយាយពីភាពចម្រូងចម្រាស ការធ្វើអត្តឃាតផលប៉ះពាល់ដល់សង្គម និងនយោបាយនៅក្នុងប្រទេសកាណាដា ។ The Trouble with Dying សម្តែងដោយ Christopher Plummer ដែលគាត់ជាតារាសម្តែងម្នាក់ធ្លាប់បានទទួលពានរង្វាន់ Academy Award ។ The Trouble with Dying បានចាក់ផ្សាយទូទាំងប្រទេសកាណាដា តាមរយៈទូរទស្សន៍ Vision TV ។
លោក Simpson និយាយថា «ខ្ញុំពិតជារំភើបយ៉ាងខ្លាំងចំពោះខ្សែភាពយន្ត «សង្គ្រាមបងប្អូន» ព្រោះតាមរយៈខ្សែភាពយន្តនេះខ្ញុំអាចចែករំលែកទេព្យកោសល្យ និងភាពប៉ិនប្រសប់របស់ខ្ញុំផ្នែកវិស័យសិល្បៈទៅក្នុងតំបន់ ហើយនេះជាជាកិត្តិយសដ៏ធំមួយសម្រាប់ខ្ញុំ» ។
លោក Simpson បានកោតសរសើរពីទេពកោសល្យ និងក្រមសីលធម៌ការងាររបស់តារាសម្តែងដែលបានចូលរួមសម្តែងនៅក្នុងខ្សែភាពយន្តមួយនេះ ។
រឿង «សង្គ្រាមបងប្អូន» ដែលជាការសហការផលិតរវាងទូរទស្សន៍ CTN និងបណ្តាញទូរទស្សន៍ GMA 7 របស់ប្រទេសហ្វ៊ីលីពីន ពេលនេះកំពុងមមាញឹកថតនៅគ្រប់ទីកន្លែងក្នុងប្រទេសកម្ពុជា និងហ្វ៊ីលីពីន ។
ខ្សែភាពយន្តរឿង «សង្គ្រាមបងប្អូន» សម្តែងដោយតារាហ្វ៊ីលីពីន Mikael Daez និង Andrea Torres រួមជាមួយតារាសម្តែងជើងចាស់របស់កម្ពុជា លោក ទេព រិនដារ៉ូ និង តារាកំពុងរះ កញ្ញា ថន ស្រីណៃ និងលោក ខាត់ វ៉ៃហាំង ។
ដោយយោងទៅតាមគំនិតរបស់អ្នកស្រីប៉ុល ពិសី ដែលជាអ្នកនិពន្ធផលិតកម្មភូមិពេជ្រ លោក Simpson និង Romily Belcourt ក៏បានរួមគ្នានិពន្ធរឿង «សង្គ្រាមបងប្អូន» នេះឡើង ៕
ចែករំលែកព័តមាននេះ