ផ្អាកសាលារៀនក្នុងឃុំចំនួន៤ នៅស្រុកព្រៃនប់
- ព្រះសីហនុ
ខេត្តព្រះសីហនុ ៖ មន្ត្រីអ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យ បានឱ្យដឹងកាលពីថ្ងៃ១០ វិច្ឆិកា ឆ្នាំ២០២០ កន្លងទៅនេះថា សាលារៀនក្នុងឃុំចំនួន៤…
ខេត្តព្រះសីហនុ ៖ មន្ត្រីអ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យ បានឱ្យដឹងកាលពីថ្ងៃ១០ វិច្ឆិកា ឆ្នាំ២០២០ កន្លងទៅនេះថា សាលារៀនក្នុងឃុំចំនួន៤ នៅស្រុកព្រៃនប់ គឺឃុំព្រៃនប់, ឃុំទទួលទទឹង, ឃុំអូរឧកញ៉ាហេង និងឃុំរាម ត្រូវបានផ្អាកការសិក្សាជាបណ្តោះអាសន្នចំនួន២សប្តាហ៍ ក្នុងពេលដែលផ្នែកសុខាភិបាលកំពុងធ្វើចត្តាឡីសក័លើអ្នកដែលបានជួបប្រាស្រយ័ផ្ទាល់ជាមួយមន្ត្រីពាក់ពន្ធ័នឹងព្រឹត្តិការណ៍ថ្ងៃ៣ វិច្ឆិកា ដើម្បីបង្ការជំងឺកូវីដ១៩។
បើតាមមន្ត្រីអ្នកនាំពាក្យរដ្ឋបាលខេត្តបានបញ្ជាក់ថា មានប្រជាពលរដ្ឋមួយចំនួននៅក្នុងឃុំទាំង៤ ដែលមានការប្រាស្រយ័ផ្ទាល់ជាមួយមន្ត្រីជាប់ពាក់ពន្ធ័ព្រឹត្តិការណ៍ថ្ងៃ៣ វិច្ឆិកា ត្រូវបាននាំមកធ្វើចត្តាឡីសក័នៅសណ្ឋាគារមួយកន្លែងក្នុងក្រុងព្រះសីហនុ ដូច្នេះហើយអំឡុងពេលនេះទើបមានការផ្អាកជាបណ្តោះអាសន្ននូវការសិក្សាតាមសាលារៀនក្នុងឃុំទាំង៤ខាងលើ។
មន្ត្រីអ្នកនាំពាក្យដដែលបានបញ្ជាក់បន្តថា វិធានការនេះធ្វើឡើង បន្ទាប់ពីក្រសួងអប់រំ យុវជន និងកីឡា បានចេញសេចក្ដីជូនដំណឹងកាលពីព្រឹកថ្ងៃទី១០ ខែវិច្ឆិកា ឆ្នាំ២០២០ ស្ដីពីការពង្រឹងវិធានការទប់ស្កាត់ការរីករាលដាលនៃជំងឺកូវីដ-១៩ នៅតាមគ្រឹះស្ថានសិក្សាក្នុងខេត្ត ដែលមានការពាក់ព័ន្ធនឹងព្រឹត្តិការណ៍ថ្ងៃ៣ វិច្ឆិកា ៕ (កែសម្រួលដោយ ៖ ធីតា)
ចែករំលែកព័តមាននេះ