ខេត្តបន្ទាយមានជ័យ៖ លោកឧត្តមសេនីយ៍ត្រី អាត់ ខែម ស្នងការនគរបាលខេត្ត ដាក់បទបញ្ជាដល់កងកម្លាំងនគរបាលការិយាល័យប្រឆាំងគ្រឿងញៀន សហការជាមួយកម្លាំងនគរបាលគ្រប់អធិការដ្ឋាននគរបាលស្រុក/ក្រុង និងគ្រប់វរសេនាតូចនគរបាលការពារព្រំដែនគោកទាំង៤ ចំពោះបញ្ហាគ្រឿងញៀនត្រូវបង្ក្រាបឱ្យដូចភ្លៀងរលឹម ។
ជាក់ស្តែង កាលពីវេលាម៉ោង៥និង១៥នាទីល្ងាចថ្ងៃទី២៥ ឧសភា កម្លាំងនគរបាលការិយាល័យប្រឆាំងគ្រឿងញៀនខេត្ត សហការជាមួយកម្លាំងនគរបាលក្រុងប៉ោយប៉ែត ធ្វើការស្រាវជ្រាវតាមវិធានការជំនាញឈានដល់បង្ក្រាបនិងចាប់ឃាត់ខ្លួនជនសង្ស័យម្នាក់ពីបទជួញដូរគ្រឿងញៀន នៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ។
លោកវរសេនីយ៍ទោ ស៊ិន ធិនដេត នាយការិយាល័យនគរបាលប្រឆាំងញៀងញៀនបានឲ្យដឹងថា ជនសង្ស័យដែលចាប់ឃាត់ខ្លួននេះ ឈ្មោះ ឡុងដាលីន ភេទប្រុស អាយុ៣៧ឆ្នាំ នៅភូមិបាលិយ្យ២ សង្កាត់ប៉ោយប៉ែត ក្រុងប៉ោយប៉ែត ជាជាងកាត់កញ្ចក់ ។ ការចុះបង្ក្រាបនេះ សមត្ថកិច្ចដកហូតវត្ថុតាង មានថ្នាំញៀនប្រភេទមេតំហ្វេតាមីនអាយស៍ម្សៅពណ៌សថ្លា (ខេទឹកកក) ចំនួន៥កូនថង់តូច ដែលជនសង្ស័យដាក់ក្នុងកញ្ចប់បារីហ្វ៊ីន ទូរស័ព្ទ២គ្រឿង និងម៉ូតូ១គ្រឿង ម៉ាកហុងដាឌ្រីម ពណ៌ខ្មៅ ដែលជនសង្ស័យជិះធ្វើសកម្មភាព ។
ចំពោះលទ្ធផលដែលកម្លាំងនគរបាលអនុវត្តបានសម្រេចនេះ គឺដោយមានការចង្អុលបង្ហាញពីលោកឧត្តមសេនីយ៍ត្រី អាត់ ខែម និងមានការសម្របសម្រួលពីលោក ផាន់ វណ្ណារ័ត្ន ព្រះរាជអាជ្ញាអមសាលាដំបូងខេត្តផងដែរ ។
លោកនាយការិយាល័យបានបញ្ជាក់ថា នៅចំពោះមុខសមត្ថកិច្ចជនសង្ស័យបានឆ្លើយសារភាពថា រូបគេធ្លាប់ជួញដូរថ្នាំញៀននេះ មានរយៈពេល១ខែមកហើយ មុនពេលសមត្ថកិច្ចចាប់ឃាត់ខ្លួន ។ ដោយផ្អែកទៅលើចម្លើយសារភាព និងវត្ថុតាងជាក់ស្តែង ជនឈ្មោះ ឡុង ដា លីន ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ