ខេត្តត្បូងឃ្មុំ ៖ ហ្វូងផ្សោតភាគច្រើនត្រូវបានគេប្រទះឃើញតែនៅតាមដងទន្លេមេគង្គក្នុងខេត្តក្រចេះតែប៉ុណ្ណោះ។ ហើយបានធ្វើឲ្យអ្នកទេសចរណ៍ជាតិ និងអន្តរជាតិមានការចាប់អារម្មណ៍ តែគួរឲ្យសោកស្ដាយបែរជាមានផ្សោតមួយក្បាល ត្រូវបានប្រជាពលរដ្ឋប្រទះឃើញស្លាប់ហើយស្អុយទៅហើយ កាលពីរសៀលថ្ងៃទី៧ ខែវិច្ឆិកា ឆ្នាំ២០២០ នៅគុម្ពត្រែងមាត់ទន្លេភូមិទី៦ ឃុំព្រែកអាជី ស្រុកក្រូចឆ្មារ។
ជាមួយនោះក៏បានផ្ដល់ដំណឹងទៅឱ្យអង្គការអភិរក្សសត្វផ្សោត នៅខេត្តក្រចេះឱ្យបានដឹងទៀតផង។លោក សយ ទូច អភិបាលស្រុកក្រូចឆ្មារប្រាប់ឲ្យដឹងថា បើតាមអ្វីដែលលោកធ្លាប់សិក្សានាពេលកន្លងមកពពួកថនិកសត្វផ្សោតនេះ នៅសល់ប្រមាណតែជាង ៧០ក្បាលប៉ុណ្ណោះ ភាគច្រើនតែងតែហែលបង្ហាញខ្លួននៅលើផ្ទៃទឹកទន្លេមេគង្គក្នុងខេត្តក្រចេះ។ មួយវិញទៀតផ្សោតនេះនៅលើពិភពលោកស្ទើរតែផុតពូជទៅហើយ ។ អភិបាលស្រុកក្រូចឆ្មារប្រាប់បន្តឲ្យដឹងទៀតថា ផ្សោតមួយក្បាលដែលស្លាប់នៅមាត់ច្រាំងមិនដឹងថាញីឬឈ្មោលនោះទេ ត្រូវបានប្រជាពលរដ្ឋរស់នៅមូលដ្ឋានប្រទះឃើញហើយក៏រាយការណ៍មកសមត្ថកិច្ចឲ្យបានដឹងនឹងចុះទៅពិនិត្យមើលឃើញថាពិតជាផ្សោតមួយក្បាលបានស្លាប់មែន។
តាមការសន្និដ្ឋានផ្សោតនេះអាចត្រូវជាប់មករបស់អ្នកនេសាទនៅតាមដងទន្លេមេគង្គ ជាហេតុបណ្ដាលឲ្យអស់រំអិលហើយថប់ដង្ហើមទើបបណ្ដាលឲ្យស្លាប់យ៉ាងដូច្នេះ។ តាមការប៉ានស្មានផ្សោតនេះមានទម្ងន់ប្រហែល៧០គីឡូក្រាម ជាមួយនោះក៏បានទាក់ទងទៅជំនាញខណ្ឌរដ្ឋបាលជលផលខេត្ត ព្រមទាំងអង្គការអភិរក្សសត្វផ្សោតនៅខេត្តក្រចេះឱ្យបានដឹងទៀតផង។
លោក សយ ទូច អភិបាលស្រុកក្រូចឆ្មារបានរំឭកថា ក្នុងអំឡុងឆ្នាំ១៩៨០ ជាងនៅក្រោយសាលាស្រុកក្រូចឆ្មាជាប់នឹងមាត់ទន្លេដែលមានសម្បូរទៅដោយកោះផងនោះគឺជារាយតែតែឃើញហ្វូងផ្សោតហែលដេញចាប់ត្រីធ្វើជាចំណីតែក្រោយមកទៀតកចេះតែខ្សត់ទៅនោះពេលដែលឃើញម្ដងក៏ស្លាប់ដូចខាងលើ។ អភិបាលស្រុកបន្ថែមថា នៅលើពិភពលោកផ្សោតកាន់តែខិតជិតអស់ពូជ គឺមានតែនៅក្នុងខេត្តក្រចេះ ប្រទេសកម្ពុជាតែមួយប៉ុណ្ណោះដែលសម្បូរហើយត្រូវបានយកចិត្តទុកដាក់ធ្វើការអភិរក្សទៀតផង៕ ដោយ ៖ យ៉ាន់ ចាន់ថេត
ចែករំលែកព័តមាននេះ