អង្គការសិទ្ធិមនុស្សស៊ីរី ដែលមានប្រភពព័ត៌មានច្រើនក្នុងប្រទេសនោះ អះអាងកាលពីថ្ងៃទី២៤ ឧសភា ថា ក្រុមរដ្ឋអ៊ិស្លាម បានប្រហារជីវិតមនុស្សយ៉ាងតិច២១៧នាក់ ក្នុងនោះរួមមានជនស៊ីវិលជាច្រើននាក់ផង ចាប់តាំងពីក្រុមនេះដណ្តើមត្រួតត្រាផ្នែកមួយនៃខេត្តហូម ស៊ីរី ដែលរួមមានទីក្រុងបុរាណ Palmyre ផង កាលពី៩ថ្ងៃមុន នេះមក ។
OSDH និយាយថា ខ្លួនមានភស្តុតាងគ្រប់គ្រាន់ពីការប្រហារជីវិតជនស៊ីវិល៦៧នាក់ ក្នុងនោះមានកុមារៗផង ព្រមទាំងសមាជិកកងកម្លាំងស៊ីរី១៥០នាក់ ដោយពួកជីហាដក្នុងតំបន់ជាច្រើននៃខេត្តហូម ចាប់តាំងពីថ្ងៃទី១៦ ឧសភា មក ។
OSDH គូសបញ្ជាក់ថា ពួករដ្ឋអ៊ិស្លាមបានប្រហារជីវិតជនស៊ីវិល៦៧នាក់ ក្នុងនោះមានកុមារ១៤នាក់ និងនារី១២នាក់ នៅ Soukhna Amiriya នៅជុំវិញបណ្តាបន្ទាយទាហានព្រមទាំងនៅទីក្រុង Palmyre ។ ពួករដ្ឋអ៊ិស្លាមក៏ប្រហារជីវិតសមាជិកកងកម្លាំងសន្តិសុខ និងសមាជិកកងជីវពលនៃរបបក្រុងដាម៉ាស់ ជាង១៥០នាក់ ។
យោងតាមនាយករបស់ OSDH លោក រ៉ាមី អាប់ដែលរ៉ាហ៍ ម៉ាន់ ថា បណ្តាគ្រួសារទាំងមូលត្រូវប្រហារជីវិត ក្នុងនោះមានពួកកូនៗ និងឪពុកម្តាយពួកគេ ។ ការប្រហារជីវិតមនុស្សភាគច្រើននៅក្រុង Palmyre ។ ជនរងគ្រោះមួយចំនួនត្រូវបាញ់សម្លាប់ ហើយមួយចំនួនទៀតត្រូវកាត់ក្បាល ឬចាក់សម្លាប់ដោយកាំបិត ។
OSDH ផ្តល់តុល្យការនេះប៉ុន្មានម៉ោង បន្ទាប់ពីសារព័ត៌មានផ្លូវការស៊ីរីអះអាងថា ពួករដ្ឋអ៊ិស្លាមបានប្រព្រឹត្តការសម្លាប់រង្គាលនៅក្រុង Palmyre ដោយសម្លាប់ជនស៊ីវិលប្រមាណជា៤០០នាក់ ភាគច្រើនជានារី និងកុមារ ។
OSDH និយាយថា មនុស្ស៦០០នាក់ ក្នុងនោះមានពួកទាហាន ពួកជីវពលស្និទ្នរដ្ឋាភិបាល និងបណ្តាជនស៊ីវិលដែលចោទប្រកាន់ថាមានទំនាក់ទំនងជាមួយរបបស៊ីរី ត្រូវចាប់ជាឈ្លើយសឹក ហើយមនុស្សទាំងនោះពិតណាស់នឹងត្រូវក្រុមសាហាវនេះសម្លាប់ចោល ៕
ចែករំលែកព័តមាននេះ