រាជធានីភ្នំពេញ ៖ ជនម្នាក់សន្លប់ស្តូកស្តឹង ខណៈពេលចូលទៅលួចទូរស័ព្ទដែលដោតសាកថ្មទុកចោល ត្រូវម្ចាស់តាមទាន់ ហើយពលរដ្ឋនាំគ្នាវាយទ្រពខ្លួន កាលពីវេលាម៉ោង៧និង៥០នាទីយប់ថ្ងៃទី២៤ ឧសភា នៅក្នុងស្ថានីយប្រេងឥន្ធនៈស៊ូគីម៉ិច ខាងកើតរង្វង់មូលចោមចៅ នៅភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ ។
ជននេះ ឈ្មោះ ជុំ ប៉ែត ភេទប្រុស អាយុ៣០ឆ្នាំ ស្នាក់នៅភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ ជននេះបានចូលទៅលួចទូរស័ព្ទរបស់បុគ្គលិកចាក់សាំងស៊ូគីម៉ិច ហើយរត់គេចខ្លួន ពេលនោះម្ចាស់ទូរស័ព្ទក្រឡេកឃើញទាន់ក៏ដេញតាមចាប់បាន និងយកទូរស័ព្ទដៃមកវិញ តែអ្នកឃើញហេតុការណ៍នាំគ្នាវាយរហូតសន្លប់ស្តូកស្តឹង ។
ក្រោយពេលកើតហេតុ ជនសង្ស័យត្រូវបានរថយន្តសង្គ្រោះរបស់អង្គភាព៧១១ ដឹកយកទៅព្យាបាលនៅមន្ទីរពេទ្យព្រះកុសុមៈ បានធូរស្រាលត្រូវសមត្ថកិច្ចនាំយកទៅសាកសួរនៅប៉ុស្តិ៍នគរបាលរដ្ឋបាលចោមចៅ ដោយសារតែម្ចាស់ទូរស័ព្ទមិនបានដាក់ពាក្យបណ្តឹង ទើបសមត្ថកិច្ចគ្រាន់តែអប់រំណែនាំ និងហៅអាណាព្យាបាលមកធ្វើកិច្ចសន្យា ហើយដោះលែងឱ្យត្រឡប់ទៅវិញ ៕
ចែករំលែកព័តមាននេះ