ខេត្តតាកែវ ៖ លោក មិន ឃិន រដ្ឋមន្ត្រីក្រសួងធម្មការនិងសាសនា និងលោកស្រីជាភរិយា កាលពីថ្ងៃទី២៤ ខែឧសភា ឆ្នាំ២០១៥បាននាំបច្ច័យនិងទេយ្យវត្ថុយកទៅប្រគេនព្រះសង្ឃដែលបានជួបគ្រោះឧប្បទវហេតុផ្ទុះចង្ក្រានហ្គាស រលាកពេញព្រះកាយ នាបរិ វេណវត្តអង្គលង្គញ់ ស្ថិតនៅឃុំសំរោង ស្រុកសំរោង ខេត្តតាកែវ ។
នៅក្នុងឱកាសនោះ លោក មិន ឃិន រដ្ឋមន្ត្រីក្រសួងធម្មការនិងសាសនាមានប្រសាសន៌ដោយពាំនាំនូវការនឹករលឹកពីសម្តេចទាំងបី ប្រគេនចំពោះព្រះសង្ឃគ្រប់អង្គព្រមទាំងបានកោតសរសើរព្រះចៅអធិការវត្តអង្គលង្គញ់លើការខិតខំបណ្តុះ បណ្តាលអប់រំធនធានព្រះសង្ឃឲ្យឈរលើគោលគ្រឹះសីល សម្មាធិនិងបញ្ញា ដែលគោលធម៌ទាំងបីនេះហើយទើបធ្វើឲ្យព្រះពុទ្ធសាសនាមានការរីកចម្រើនរហូតមកដល់សព្វថ្ងៃនេះ ជាពិសេស សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងយកចិត្តទុកដាក់គិតគូរអំពីសុវត្ថិភាព ជីវភាពរស់នៅរបស់ព្រះសង្ឃក៏ដូចជាប្រជាពលរដ្ឋនៅទូទាំងប្រទេស។
ក្នុងនាមថ្នាក់ដឹកនាំ លោក មិន ឃិន បានចូលរួមសោកស្តាយចំពោះគ្រោះអគ្គីដែលបានកើតឡើងជាយថាហេតុមកលើព្រះសង្ឃទាំងប្រាំបួនអង្គ ហើយប្រជាពលរដ្ឋខ្មែរទូទាំងប្រទេសតែងតែប្រកាន់ខ្ជាប់នូវប្រពៃណីទំនៀមទម្លាប់ព្រះពុទ្ធសាសនាជាពិសេសការនាំនូវទេយ្យវត្ថុនិងគ្រឿងបរិក្ខាផ្សេងៗមកប្រគេនដល់ព្រះសង្ឃក្នុងឱកាសដែលព្រះសង្ឃគ្រប់អង្គកំពុងជួបនូវការលំបាកនិងមានសារៈសំខាន់ណាស់ប្រៀបដូចជាមហាគ្រួសារមួយដែលផ្សារភ្ជាប់ការងារដឹកនាំជាតិជាមួយជីវភាពជាក់ស្តែងរបស់ព្រះសង្ឃព្រមទាំងបង្កើតបាននូវភាពស្និទ្ធស្នាលស្គាល់សុខស្គាល់ទុក្ខរួមរស់ប្រាស្រ័យទំនាក់ទំនងល្អរវាងថ្នាក់ដឹកនាំជាមួយព្រះសង្ឃនិងប្រជាពលរដ្ឋគ្រប់មជ្ឈដ្ឋាន។
លោករដ្ឋមន្ត្រីក្រសួងធម្មការបានទូលប្រគេនបន្តទៀតថា ក្រោមការដឹកនាំពីប្រមុខរាជរដ្ឋាភិបាល ដែលមានសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាវិស័យពុទ្ធចក្របានកំពុងរីកយ៉ាងស្គុស ស្គាយនៅទូទាំងប្រទេសរហូតមកដល់ពេលនេះមានវត្តសរុប៤,៥១៤វត្ត ក្នុងនោះវត្តគណៈធម្មយុត្តិកនិកាយ១៧៤វត្ត និងព្រះសង្ឃទាំងពីរគណៈចំនួន៥៦,៨២០អង្គ ការរីកចម្រើនទីវត្តអារាមនេះ ក៏ដោយសារមានការចូលរួមយ៉ាងស្អិតរមួតពីប្រជាពុទ្ធបរិស័ទជាអ្នកមានជំនឿលើព្រះពុទ្ធសាសនានិងបានសំណូមពរព្រះសង្ឃគ្រប់អង្គខិតខំបន្តការសិក្សារៀនសូត្រដែលជាវិស័យស្នូលដើម្បីទ្រទ្រង់ព្រះពុទ្ធសាសនាឲ្យបានយូរអង្វែង។
ចែករំលែកព័តមាននេះ