ការឆ្លងរាលដាលនៃវីរុស COVID-19 ៖ ពេលដែលពិភពលោកកំពុងតែផ្ដោតការចាប់អាម្មណ៍លើការបោះឆ្នោតប្រធានាធិបតីសហរដ្ឋអាមេរិក ការឆ្លងរាលដាលនៃវីរុស COVID-19 កំពុងតែកើនខ្លាំងក្លាបំផុតនៅអឺរ៉ុប។ តំបន់នោះ ពេលនេះមានអ្នកឆ្លងវីរុសឡើងដល់ជាង១២លាននាក់ និងអ្នកបាត់បង់ជីវិតឡើងដល់ជិត៣០០.០០០នាក់…
ការឆ្លងរាលដាលនៃវីរុស COVID-19 ៖ ពេលដែលពិភពលោកកំពុងតែផ្ដោតការចាប់អាម្មណ៍លើការបោះឆ្នោតប្រធានាធិបតីសហរដ្ឋអាមេរិក ការឆ្លងរាលដាលនៃវីរុស COVID-19 កំពុងតែកើនខ្លាំងក្លាបំផុតនៅអឺរ៉ុប។
តំបន់នោះ ពេលនេះមានអ្នកឆ្លងវីរុសឡើងដល់ជាង១២លាននាក់ និងអ្នកបាត់បង់ជីវិតឡើងដល់ជិត៣០០.០០០នាក់ ប្រសិនបើរាប់នៅប្រទេសរុស្ស៊ីដែរ។ អង្គការសុខភាពពិភពលោក WHOព្រមានថា នាប៉ុន្មានសប្ដាហ៍ខាងមុខនេះ ស្ថានភាពនៃការឆ្លងរាលដាលនៃវីរុស កាន់តែលំបាកថែមទៀត គឺផ្ទុះខ្លាំងតែម្ដង។
ប្រធានការិយាល័យអឺរ៉ុបរបស់ WHO លោក HANS KLUGE បានលើកឡើងថា មែនហើយអឺរ៉ុបពេលនេះ ជាតំបន់ដែលមានអ្នកឆ្លងថ្មីនាំមុខតំបន់អាមេរិកឡាទីន។ លោកបន្តថា ពិតណាស់មានភាពធូររលុងមួយចំនួន ក្នុងការតបតទប់ទល់ការឆ្លងនៅអឺរ៉ុប។ ប្រទេសជាច្រើនបានបន្ធូរដៃ ក្នុងការចាត់បណ្ដាវិធានការ សុខាភិបាលសាធារណៈ កាលពីក្នុងរដូវក្ដៅ។ ការពាក់ម៉ាសលែងមានជាទូទៅ។ ការប្រមូលផ្ដុំមនុស្សច្រើនក៏មិនមានការត្រួតពិនិត្យ។ ដូច្នេះបានជាគេឃើញការបញ្ចេញឥទ្ធិពលខ្លាំងក្លានៃវីរុស។
WHO បានណែនាំយ៉ាងម៉ឺងម៉ាត់ឲ្យមានការពាក់ម៉ាសជាកាតព្វកិច្ច ដោយថា ប្រសិនបើមានការពាក់ម៉ាស មិនធ្វេសប្រហែសគ្រប់ទីកន្លែងនៅអឹរ៉ុបនោះជីវិតមនុស្ស ជាង២៦០.០០០នាក់ត្រូវបានសង្គ្រោះ។ WHO ក៏អំពាវនាវដែរ ដល់បណ្ដារដ្ឋឲ្យបើកទ្វារសាលារៀនឲ្យបានយូរ ដើម្បីចៀសវាងកុំឲ្យមនុស្សមួយជំនាន់ត្រូវធ្វើពលីកម្ម។
អេស្ប៉ាញអ្នកឆ្លងកើនដល់ជាង១,៣លាននាក់
យោងតាមទិន្នន័យផ្ដល់ដោយអាជ្ញាធរសុខាភិបាលថា ចំនួនអ្នកឆ្លងវីរុស COVID-19 នៅអេស្ប៉ាញមកដល់ថៃ្ងទី៥ វិច្ឆិកា កើនដល់១.៣០៦.៣១៦នាក់ និងចំនួនអ្នកបាត់បង់ជីវិតឡើងដល់៣៨.៤៨៦នាក់ ក្នុងនោះ១.០០២នាក់បាត់បង់ជីវិតរយៈពេល៧ថ្ងៃចុងក្រោយនេះ។
អ៊ីតាលីចំនួនអ្នកឆ្លងថ្មី១ថ្ងៃដល់៣៤.៥០៥នាក់
តាមតួលេខរបស់ក្រសួងសុខាភិបាលថា ប្រទេសអ៊ីតាលីនាថ្ងៃទី៥ ខែវិច្ឆិកា កំណត់ឃើញអ្នកឆ្លងវីរុសថ្មី ដល់ទៅ៣៤.៥០៥នាក់២៤ម៉ោងចុងក្រោយនេះ ដែលនោះជាចំនួនអ្នកឆ្លងប្រចាំថ្ងៃកម្រិតខ្ពស់បំផុតពុំធ្លាប់មាន។ អាជ្ញាធរក៏រៀបរាប់ដែរ ពីអ្នកបាត់បង់ជីវិតថ្មី៤៤៥នាក់ថែមទៀត២៤ម៉ោងចុងក្រោយនេះ។ ចំនួនអ្នកឆ្លងវីរុសនៅអ៊ីតាលីពេលនេះបានកើនដល់៨២៤.៨៧៩នាក់ ហើយចំនួនអ្នកបាត់បង់ជីវិតកើនដល់៤០.១៩២នាក់។
លើពិភពលោកគិតដល់ថ្ងៃទី៥ វិច្ឆិកា ចំនួនអ្នកឆ្លងវីរុស COVID-19 បានកើនដល់ជាង៤៨,៣លាននាក់ ហើយអ្នកបាត់បង់ជីវិតកើនដល់ជាង១,២៣លាននាក់។ សហរដ្ឋអាមេរិកនៅតែជាប្រទេស រងការប៉ះពាល់ខ្លាំងជាងគេជាមួយអ្នកឆ្លងឡើងដល់ជាង៩,៦៩លាននាក់ និងអ្នកបាត់បង់ជីវិតកើនដល់ជាង២៣៥.០០០នាក់។
ឥណ្ឌាចំនួនអ្នកឆ្លងកើនដល់ជាង៨,៤១លាននាក់ និងអ្នកបាត់បង់ជីវិតជាង១២៥.០០០នាក់។ ប្រេស៊ីលអ្នកឆ្លងឡើងដេល់៥,៦១លាននាក់ អ្នកបាត់បង់ជីវិតឡើងដល់ជាង១៦២.០០០នាក់។ រុស្ស៊ីអ្នកឆ្លងឡើងដល់ជាង១,៧១លាននាក់ អ្នកបាត់បង់ជីវិតដល់២៩.៥០៩នាក់។ បារាំងអ្នកឆ្លងកើនដល់ជាង១,៦លាននាក់ អ្នកបាត់បង់ជីវិតឡើងដល់៣៩.០៣៧នាក់៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ