ខេត្តកំពត ៖ គ្រួសារទុរគតជនមួយ ប្រពន្ធមានផ្ទៃពោះជិតគ្រប់ខែ មកស៊ីឈ្នួលដាំម្រេចមួយកន្លែង ក្នុងភូមិព្រៃពាយ ឃុំត្រពាំងភ្លាំង ស្រុកឈូក កាលពីព្រឹកថ្ងៃទី២០ ឧសភា ២០១៥ នេះ
ខេត្តកំពត ៖ គ្រួសារទុរគតជនមួយប្រពន្ធមានផ្ទៃពោះជិតគ្រប់ខែ មកស៊ីឈ្នួលដាំម្រេចមួយកន្លែង ក្នុងភូមិព្រៃពាយ ឃុំត្រពាំងភ្លាំង ស្រុកឈូក កាលពីព្រឹកថ្ងៃទី២០ ឧសភា ២០១៥ នេះ នាងបានមកជួបអ្នកសារព័ត៌មាន ដើម្បីជួយពាំនាំពីទុក្ខលំបាកក្នុងគ្រួសាររបស់នាងជូនដល់ថ្នាក់ដឹកនាំ និងសប្បុរសជន ដើម្បីជួយឧបត្ថម្ភជាថវិកា និងសម្ភារគ្រាន់បានសង់ទីជម្រកស្នាក់នៅ ប្រកបរបររកស៊ីដោះស្រាយចិញ្ចឹមជីវិត ដូចបងប្អូនប្រជាពលរដ្ឋក្នុងភូមិព្រៃពាយនេះនឹងគេ។
ស្ត្រីទុរគតដែលមានផ្ទៃពោះជិតគ្រប់ខែម្នាក់នេះ មានឈ្មោះស្រី ពៅ អាយុ២៨ឆ្នាំ និងប្តីឈ្មោះឈុន វូច អាយុ២៩ឆ្នាំ នាងមានកូនពីរនាក់ ទាំងនៅពរពោះ។ នាងពីរនាក់ប្តីប្រពន្ធជាកូនកំព្រាដូចគ្នា នាងមានស្រុកកំណើតនៅខេត្តកំពង់ចាម ហើយបានចាប់ដៃគ្នាកសាងសុភមង្គល ដោយសារនាងដើរស៊ីឈ្នួលគេ ហើយបានជួបបុរសជាប្តីនេះ ដែលគាត់ជាអ្នកដើរស៊ីឈ្នួលធ្វើកម្មករដែរ ក៏បានចាប់ដៃគ្នាជាប្តីប្រពន្ធរហូតបានកូនជិតពីរនាក់ទៅហើយ ។ នាងបានរៀបរាប់ឲ្យដឹងទៀតថា មុននឹងមកដល់ភូមិព្រៃពាយ ឃុំត្រពាំងភ្លាំង ស្រុកឈូក នេះ នាងបានសុំដីអ្នកស្រុកនៅស្រុកដងទង់ សង់ខ្ទមមួយតូចស្នាក់នៅ ដើម្បីមានឱកាសឲ្យប្តីនាងទៅធ្វើកម្មករសំណង់នៅក្បែរនោះ ។ ប៉ុន្តែក្រោយមកត្រូវបានម្ចាស់ដីគេឲ្យរុះរើផ្ទះចេញឈប់ឲ្យស្នាក់នៅទីនោះ នាង និងប្តីក៏បានឮដំណឹងថា នៅភូមិព្រៃពាយនេះ មានក្រុមហ៊ុនចំការម្រេចមួយ គេត្រូវការរើសកម្មករ ដើម្បីដាំ និងមើលថែទាំម្រេច នាងក៏បាននាំប្តីចាកចេញពីស្រុកដងទង់ ដើម្បីសុំការងារធ្វើក្នុងក្រុមហ៊ុនដាំម្រេចនេះ ។ សព្វថ្ងៃនេះនាងគ្មានដី គ្មានជម្រកស្នាក់នៅទេ នាងស្នាក់នៅក្នុងរោងកម្មកររបស់ក្រុមហ៊ុន មិនដឹងថ្ងៃណាមួយក្រុមហ៊ុនគេឈប់ត្រូវការប្តីនាង ហើយនាង និងប្តី ព្រមទាំងកូនពីរនាក់ទៅស្នាក់នៅទីណាទេ ។
នាងសូមអំពាវនាវដល់ប្រមុខរាជរដ្ឋាភិបាល សប្បុរសជនក្នុង និងក្រៅប្រទេស មេត្តាជួយដោះស្រាយដីឲ្យក្រុមគ្រួសារនាងបានសង់ផ្ទះស្នាក់នៅ និងបានដាំដំណាំគ្រាន់នឹងដោះស្រាយជីវភាពគ្រួសារ ដូចពលរដ្ឋឯទៀតៗផង ៕
ចែករំលែកព័តមាននេះ