សហរដ្ឋអាមេរិក ៖ ការិយាល័យរាប់សន្លឹកឆ្នោតមួយស្ថិតនៅជាយក្រុង PHOENIX រដ្ឋអារីហ្សូណា ត្រូវផ្អាកការរាប់សន្លឹកឆ្នោតភ្លាមៗ កាលពីយប់ថ្ងៃទី៤ វិច្ឆិកា មោ៉ងក្នុងស្រុក ហើយប៉ូលិសបាននាំបណ្ដាអ្នកធ្វើការងារនោះទៅរកជម្រក។ ចំណែកបណ្ដាអ្នកកាសែតរបស់ទូរទស្សន៍ FOX NEWS ដែលទៅយកព័ត៌មាននៅនឹងកន្លែង ត្រូវចាកចេញពីទីនោះភ្លាមៗក្រោមកិច្ចការពារ។
យោងតាមសារព័ត៌មានថា វិធានការទាំងនោះ ត្រូវបានប្រកាន់យកដោយសារវត្តមានបែបប្រទូស្តរ៉ាយ របស់មនុស្សជាង៥០នាក់ជាអ្នកមានសមានចិត្ត ចំពោះលោកដូណាល់ត្រាំ ដោយក្នុងចំណោមពួកគេ មួយចំនួនប្រដាប់ដោយកាំភ្លើងផង។ បែបនេះជាការបង្ហាញឲ្យឃើញថែមទៀតពីភាពតានតឹងជុំវិញការបោះឆ្នោតប្រធានាធិបតីអាមេរិក ដែលអូសបន្លាយពេលចេញលទ្ធផល ខណៈនាបណ្ដាម៉ោងចុងក្រោយ លោកចូបៃដេនកំពុងឈានទៅរកការឈ្នះ។
ចំណែកនាយប់ថ្ងៃទី៤ ខែវិច្ឆិកា ឆ្នាំ២០២០ ពួកអ្នកគាំទ្រលោកចូបៃដេនជាច្រើនពាន់នាក់ បាននាំគ្នាដើរហែក្បួននៅក្រុងញូវយ៉ក ដើម្បីទាមទារឲ្យមានការរាប់សន្លឹកឆ្នោតទាំងអស់ ខណៈពួកអ្នកគាំទ្រលោកត្រាំ បានលើកគ្នាធ្វើបាតុកម្មនៅទីក្រុង DETROIT រដ្ឋមីជីហ្គេន ទាមទារផ្ទុយពីនេះ ឲ្យបញ្ឈប់ការរាប់សន្លឹកឆ្នោតក្នុងរដ្ឋគន្លឹះនោះ ។
បាតុកម្មនៅក្រុងញូវយ៉ក ប្រព្រឹត្តទៅក្នុងភាពស្ងៀមស្ងាត់ហើយចូលរួមដោយមនុស្សគ្រប់វ័យ។ ចំណែកបាតុកម្មនៅក្រុង DETROIT ខាងក្រៅមជ្ឈមណ្ឌលជាកន្លែងរាប់សន្លឹកឆ្នោត ហាក់មានភាពតានតឹង៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ