រាជធានីភ្នំពេញ ៖ ប៉ូលិសប៉ុស្តិ៍ទឹកថ្លា បានធ្វើការឃាត់ខ្លួនអ្នកបើករថយន្តឱ្យស្ត្រីម្នាក់ជាអ្នកចងការប្រាក់នៅសង្កាត់ចោមចៅ ក្រោយពីប៉ូលិសតាមដានជាច្រើនថ្ងៃមកហើយ ពីព្រោះប៉ូលិសបានស្គាល់សាវតាជនម្នាក់នេះច្បាស់ មិនមានការងារពិតប្រាកដមូលហេតុអ្វីបានជាមានអាវុធខ្លី និងអាយឌីសៀត និងចូលទៅផឹកកាហ្វេអួតគេឯង ។
ទីបំផុត ខណៈសមត្ថកិច្ចឃាត់ខ្លួនជននេះភ្លាម រកពិនិត្យឃើញថា គ្មានលិខិតស្នាមកាន់កាប់អាវុធត្រឹមត្រូវនោះទេ ហើយនៅវេលាម៉ោង០៨ និង៣០នាទីយប់ថ្ងៃទី២១ ឧសភា ២០១៥ ខណៈជនម្នាក់កំពុងជិះម៉ូតូនៅតាមផ្លូវ ។
លោកសុខ សុផល មេប៉ុស្តិ៍រដ្ឋបាលទឹកថ្លាបានឱ្យដឹងថា ជនប្រើប្រាស់អាវុធខុសច្បាប់នេះ ឈ្មោះតុ ច័ន្ទណាត អាយុ៣២ឆ្នាំ ជាអ្នកបើកបរឱ្យស្ត្រីម្នាក់ ជាអ្នកជំនួញចងការនៅចោមចៅ និងស្នាក់នៅផ្ទះលេខ២៨២ ក្នុងភូមិប៉ប្រកខាងជើង សង្កាត់កាកាប ខណ្ឌពោធិ៍សែនជ័យ ។
លោកបន្តថា សមត្ថកិច្ចបានស្គាល់ជននេះ ពីមុនជាអ្នករត់ម៉ូតូកង់៣ រកស៊ីនៅស្កាត់ទឹកថ្លា ប៉ុន្តែមួយរយៈនេះ ស្រាប់តែឃើញជននេះសៀតកាំភ្លើង និងសៀតអាយឌី ចូលទៅផឹកកាហ្វេ និងស្លៀកពាក់ស៊ីវិលថែមទៀត ។
ចែករំលែកព័តមាននេះ